| ᠰᠢᠷᠠ ᠲᠠᠯᠠ ᠶᠢᠨ ᠳᠤᠮᠤᠭ | ᠰᠢᠷᠠ ᠲᠠᠯᠠ ᠶᠢᠨ ᠴᠠᠰᠤ | ᠨᠠᠪᠴᠢᠨ ᠤ ᠬᠡ ᠲᠠᠢ | ᠨᠠᠷᠠᠨ ᠤ ᠤᠭᠤᠷᠠᠭ ᠢᠶᠠᠷ ᠰᠢᠩᠬᠤᠳᠠᠭᠰᠠᠨ | ᠨᠠᠶᠢᠷᠠᠭ ᠤᠨ ᠤᠩᠭᠤᠳ ᠪᠦᠵᠢᠵᠦ ᠪᠠᠭᠤᠭᠰᠠᠨ ᠨᠢ ᠲᠡᠷᠡ ᠶᠤᠮ ᠪᠢᠵᠠ | ᠰᠢᠷᠠ ᠲᠠᠯᠠ ᠶᠢᠨ ᠤᠰᠤ | ᠨᠢᠯᠪᠤᠰᠤᠨ ᠤ ᠠᠮᠲᠠ ᠲᠠᠢ | ᠨᠡᠭᠦᠳᠡᠯ ᠤᠨ ᠬᠦᠯ ᠠᠴᠠ ᠬᠠᠷᠠᠩᠭᠤᠰᠴᠤ ᠬᠤᠴᠤᠷᠤᠭᠰᠠᠨ | ᠨᠢᠯᠬᠠ ᠬᠤᠷᠠᠭᠠ ᠶᠢᠨ ᠭᠠᠰᠢᠭᠤᠨ ᠮᠠᠶᠢᠯᠠᠭᠠ ᠨᠢ ᠲᠡᠷᠡ ᠶᠤᠮ ᠪᠢᠵᠠ | ᠰᠢᠷᠠ ᠲᠠᠯᠠ ᠶᠢᠨ ᠵᠡᠷᠭᠡᠯᠭᠡ | ᠲᠡᠭᠷᠢ ᠶᠢᠨ ᠦᠩᠭᠡ ᠲᠠᠢ | ᠲᠡᠯᠠᠮᠡᠨ ᠵᠢᠷᠤᠭᠠ ᠮᠤᠷᠢᠳ ᠤᠨ ᠶᠦᠷᠭᠡᠭᠡᠨ ᠳᠤ | ᠲᠠᠯᠠ ᠪᠠᠨ ᠲᠡᠯᠡᠵᠦ ᠬᠤᠯᠠ ᠳᠠᠪᠭᠢᠭᠰᠠᠨ ᠤ ᠬᠢ ᠲᠡᠷᠡ ᠶᠤᠮ ᠪᠢᠵᠠ | ᠰᠢᠷᠠ ᠲᠠᠯᠠ ᠶᠢᠨ ᠴᠡᠴᠡᠭᠡᠰ | ᠬᠠᠶᠢᠷᠠ ᠶᠢᠨ ᠮᠢᠰᠢᠶᠡᠯ ᠲᠠᠢ | ᠬᠦᠯᠢᠶᠡᠯᠲᠡ ᠪᠠᠷ ᠴᠤᠭᠰᠢᠭᠰᠠᠨ ᠤᠲᠤᠷ ᠤᠨ ᠭᠠᠯ | ᠬᠠᠷᠠᠴᠠ ᠨᠡᠪᠲᠡ ᠤᠶᠢᠵᠤ ᠬᠤᠨᠤᠳᠠᠭ ᠪᠤᠯᠤᠭᠰᠠᠨ ᠤ ᠬᠢ ᠲᠡᠷᠡ ᠶᠤᠮ ᠪᠢᠵᠠ | ᠰᠢᠷᠠ ᠲᠠᠯᠠ ᠶᠢᠨ ᠴᠢᠯᠠᠭᠤᠳ | ᠲᠤᠮᠤᠭ ᠤᠨ ᠬᠡᠯᠡ ᠲᠠᠢ | ᠳᠡᠯᠡᠬᠡᠢ ᠪᠦᠰᠡᠯᠡᠭᠰᠡᠨ ᠶᠡᠭᠡ ᠴᠤᠪᠤᠭᠠᠨ ᠤ ᠲᠠᠰᠤᠷᠬᠠᠢ | ᠳᠠᠭᠤᠤ ᠪᠠᠨ ᠡᠭᠰᠢᠭᠡᠵᠦ ᠦᠯᠡᠳᠡᠭᠡᠭᠰᠡᠨ ᠤ ᠬᠢ ᠲᠡᠷᠡ ᠶᠤᠮ ᠪᠢᠵᠠ᠃ | ᠰᠢᠷᠠ ᠲᠠᠯᠠ ᠶᠢᠨ ᠬᠠᠷᠠᠭᠤᠰᠤᠯ | ᠳᠦᠷᠦᠭᠡᠨ ᠳᠠᠭᠤᠨ ᠳᠤ ᠲᠠᠳᠠᠭᠳᠠᠬᠤ ᠮᠡᠲᠦ | ᠲᠤᠯᠭᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠦᠨᠳᠡᠯᠵᠡᠨᠡ | ᠲᠦᠭᠡ ᠬᠦᠷᠬᠦ ᠦᠭᠡᠢ ᠴᠤᠴᠠᠯᠢ ᠶᠢᠨ ᠮᠤᠳᠤᠳ | ᠲᠦᠯᠡᠭᠳᠡᠭᠰᠡᠨ ᠲᠤᠭ ᠤᠨ ᠡᠰᠢ ᠰᠢᠭ ᠪᠤᠲᠠᠷᠠᠵᠠᠢ | ᠲᠦᠷᠪᠡᠭᠡᠨ ᠬᠦᠷᠪᠡᠭᠡᠨ ᠳᠤ ᠲᠦᠢᠯᠳᠠᠭᠰᠠᠨ | ᠳᠦᠷᠦᠭᠦᠴᠢ ᠶᠢᠨ ᠤᠨ ᠵᠢᠯ ᠤᠳ ᠨᠠᠮ ᠲᠤᠭᠵᠢᠷᠠᠵᠠᠢ᠃ | ᠢᠵᠢᠯᠢ ᠪᠠᠨ ᠦᠭᠡᠶᠢᠯᠡᠬᠦ ᠮᠡᠲᠦ | ᠤᠨᠠᠭᠠᠨ ᠵᠢᠷᠤᠭᠠ ᠮᠤᠷᠢᠳ ᠨᠢ ᠦᠦᠷᠰᠡᠨᠡ | ᠤᠷᠤᠯᠳᠤᠭᠠᠨ ᠳᠤ ᠤᠳᠤ ᠲᠠᠢ ᠬᠤᠶᠢᠴᠢᠰ ᠨᠢ | ᠠᠳᠤᠭᠤ ᠪᠠᠨ ᠮᠠᠨᠠᠨ ᠬᠡᠬᠡᠷᠡ ᠬᠤᠨᠤᠵᠠᠢ | ᠡᠵᠡᠨ ᠮᠢᠨᠢ ᠡᠷᠭᠢᠵᠦ ᠢᠷᠡᠨᠡ ᠬᠡᠮᠡᠨ | ᠨᠤᠲᠤᠭ ᠢᠶᠠᠨ ᠰᠠᠬᠢᠵᠤ ᠡ᠊ᠠᠳᠡ ᠤᠳᠠᠵᠠᠢ᠃ | ᠪᠤᠷᠪᠢ ᠪᠠᠷ ᠢᠶᠠᠨ ᠬᠤᠭᠤᠷᠠᠵᠤ ᠤᠶᠢᠴᠢᠭᠰᠠᠨ ᠮᠡᠲᠦ | ᠪᠠᠭᠤᠳᠠᠯ ᠰᠠᠭᠤᠳᠠᠯ ᠤᠨ ᠲᠤᠷᠤ ᠭᠦᠭᠯᠡᠷᠡᠨᠡ | ᠠᠳᠤᠭᠤᠨ ᠤ ᠵᠡᠯᠡ ᠳᠠᠭᠠᠭᠤᠯᠵᠤ | ᠠᠨᠵᠢᠰᠤᠨ ᠬᠤᠰᠢᠭᠤ ᠭᠠᠵᠠᠷ ᠲᠤ ᠰᠢᠭᠢᠳᠴᠡᠢ᠃ | ᠢᠷᠠᠭᠳᠠᠭᠰᠠᠨ ᠬᠦᠷᠦᠰᠦᠨ ᠤ ᠬᠢᠨᠢ ᠳᠤᠤᠷᠠ | ᠠᠷᠭᠠᠯ ᠤᠨ ᠬᠦᠭᠡ ᠦᠨᠡᠰᠦ ᠯᠡ ᠲᠠᠭᠰᠢᠷᠠᠵᠠᠢ᠃ | ᠰᠤᠳᠤᠷ ᠠᠴᠠ ᠪᠠᠨ ᠰᠠᠯᠤᠭᠰᠠᠨ ᠪᠠᠷᠢᠨᠲᠠᠭ ᠰᠢᠭ᠋ | ᠨᠠᠪᠲᠠᠷᠬᠠᠢ ᠲᠡᠦᠬᠡ ᠶᠢᠨ ᠮᠠᠨᠠᠨ ᠬᠦᠪᠦᠨᠡ | ᠰᠤᠷᠠᠭ ᠠᠴᠠ ᠪᠠᠨ ᠠᠯᠳᠠᠷᠠᠭᠰᠠᠨ ᠵᠤᠯᠪᠢᠡᠭ ᠦᠭᠡᠰ | ᠴᠤᠭᠤᠷᠤᠬᠠᠢ ᠤᠷᠴᠢᠯᠠᠩ ᠳᠤ ᠳᠤᠷᠠ ᠪᠠᠷ ᠲᠡᠨᠦᠵᠡᠢ | ᠠᠭᠤᠯᠠᠰ ᠢᠶᠠᠨ ᠳᠠᠪᠠᠵᠤ ᠡᠭᠦᠯᠡᠰ ᠨᠢ ᠨᠡᠭᠦᠬᠦ ᠳᠤ | ᠤᠬᠠᠭᠠᠨ ᠢᠶᠠᠨ ᠲᠤᠯᠵᠤ ᠪᠤᠳᠤᠯ ᠮᠢᠨᠢ ᠬᠤᠴᠤᠷᠴᠠᠢ᠃ | ᠴᠠᠰᠣᠲᠤ ᠶᠢᠨ ᠰᠢᠷᠠ ᠲᠠᠯᠠ | ᠴᠠᠰᠤᠲᠤ ᠶᠢᠨ ᠮᠦᠰᠦᠨ ᠤᠷᠭᠢᠯ ᠤᠳ ᠦᠨᠳᠦᠷ ᠢᠶᠠᠨ ᠮᠦᠷᠦ᠋ᠢᠴᠡᠨ ᠰᠦᠮᠪᠦᠷᠯᠡᠵᠦ | ᠴᠠᠪᠴᠢᠶᠠᠯ ᠬᠠᠳᠠᠨ ᠤ ᠡ᠊ᠩᠭᠡᠷ ᠲᠤ ᠶᠠᠩᠭᠢᠷ ᠳᠡᠭᠦᠯᠢᠵᠦ ᠨᠠᠭᠠᠳᠤᠨᠠ | ᠴᠠᠭᠠᠨ ᠰᠦᠨ ᠤ ᠣᠨᠳᠣᠷᠣᠯ ᠮᠡᠲᠦ ᠴᠠᠰᠤᠨ ᠤ ᠮᠦᠩᠭᠦᠨ ᠬᠠᠯᠢᠶᠠ ᠬᠡᠯᠬᠢᠶᠡᠷᠡᠨ | ᠴᠡᠴᠡᠭᠡᠰ ᠢᠶᠠᠨ ᠪᠦᠪᠠᠶᠢᠯᠡᠵᠦ ᠨᠢᠯᠬᠠᠷᠠᠭᠰᠠᠨ ᠰᠢᠷᠠ ᠲᠠᠯᠠ ᠨᠠᠯᠠᠶᠢᠨᠠ | ᠠᠶᠠᠨ ᠤ ᠵᠠᠮ ᠳᠤ ᠤᠴᠠᠷᠠᠭᠰᠠᠨ ᠰᠠᠶᠢᠬᠠᠨ ᠪᠦᠰᠡᠭᠦᠢ ᠶᠢᠨ ᠵᠢᠰᠦᠨ ᠳᠤ | ᠨᠠᠰᠤᠨ ᠤ ᠨᠠᠮᠪᠠ ᠪᠠᠨ ᠮᠠᠷᠲᠠᠨ ᠡᠮᠨᠢᠭ ᠳᠤᠷᠠᠯᠠᠯ ᠴᠤᠪᠬᠤᠴᠢᠨᠠ | ᠨᠠᠷᠠᠨ ᠤ ᠠᠯᠲᠠᠨ ᠬᠡᠯᠲᠡᠷᠬᠡᠢ ᠪᠤᠯᠠᠭ ᠤᠨ ᠲᠤᠬᠤᠢ ᠳᠤ ᠡᠷᠬᠡᠯᠡᠭᠡᠳ | ᠤᠰᠤᠨ ᠤ ᠴᠡᠩᠭᠡᠷ ᠠᠶᠠᠯᠭᠤ ᠴᠡᠭᠡᠵᠢᠨ ᠲᠦᠰᠢᠶᠡ ᠡᠭᠡᠰᠢᠭᠯᠡᠨᠡ | ᠬᠠᠷᠠᠭᠠ ᠭᠦᠢᠴᠡᠬᠦ ᠦᠭᠡᠢ ᠨᠤᠲᠤᠭ ᠤᠨ ᠦᠷᠭᠡᠨ ᠴᠢᠯᠦᠭᠡ ᠳᠦᠭᠦᠷᠭᠡᠵᠦ | ᠬᠠᠭᠠᠨ ᠦᠷᠭᠦᠭᠡ ᠮᠡᠲᠦ ᠭᠠᠨᠳᠠᠷᠢᠰᠤᠨ ᠵᠡᠷᠭᠡᠯᠭᠡ ᠪᠤᠰᠤᠨᠠ | ᠬᠠᠲᠠᠷᠢᠭᠤᠯᠵᠤ ᠭᠠᠲᠤᠯᠬᠤ ᠦᠭᠡᠢ ᠲᠠᠯᠠ ᠶᠢᠨ ᠨᠠᠮ ᠵᠢᠮ ᠢ ᠡᠪᠳᠡᠵᠦ | ᠬᠠᠵᠠᠭᠤ ᠶᠢᠨ ᠭᠦᠪᠡᠭᠡᠨ ᠤ ᠴᠠᠭᠠᠨᠠ ᠲᠠᠷᠪᠠᠭᠠ ᠬᠤᠰᠭᠢᠷᠴᠤ ᠴᠤᠮᠴᠦ᠋ᠢᠨᠠ | ᠬᠤᠷᠤᠭᠤ ᠪᠠᠭᠲᠠᠮᠠ ᠵᠠᠢ ᠦᠭᠡᠢ ᠬᠤᠷᠠᠭᠰᠢᠭᠰᠠᠨ ᠡᠪᠡᠰᠦ ᠴᠢᠬᠢᠴᠢᠭᠡᠭᠡᠳ | ᠬᠤᠨᠢᠨ ᠤ ᠴᠤᠪᠤᠭᠠ ᠳᠠᠭᠠᠵᠤ ᠨᠡᠭᠦᠳᠡᠯ ᠤᠨ ᠰᠢᠪᠠᠭᠤᠳ ᠶᠠᠪᠠᠭᠠᠯᠠᠨᠠ | ᠬᠤᠯᠠ ᠠᠴᠠ ᠲᠠᠲᠠᠭᠰᠠᠨ ᠤᠨᠢᠶᠠᠷ ᠬᠤᠷᠮᠤᠢ ᠲᠠᠢ ᠵᠢᠭᠤᠷᠠᠯᠳᠤᠨ ᠲᠤᠭᠯᠠᠭᠠᠳ | ᠬᠤᠨᠤᠭᠠᠳ ᠪᠤᠴᠠᠬᠤ ᠶᠢᠨ ᠬᠤᠭᠤᠷᠤᠨᠳᠤ ᠬᠤᠩᠭᠤᠷ ᠰᠡᠳᠭᠢᠯ ᠤᠶᠠᠭᠳᠠᠨᠠ | ᠡᠪᠦᠭᠡᠨ ᠪᠦᠷᠭᠦᠳ ᠤᠨ ᠰᠡᠭᠦᠳᠡᠷ ᠭᠠᠵᠠᠷ ᠠᠷᠴᠢᠨ ᠪᠤᠴᠠᠬᠤ ᠳᠤ | ᠠᠭᠤᠯᠠ ᠶᠢᠨ ᠬᠦᠦᠰᠢ ᠠᠴᠠ ᠤᠷᠢᠳᠠᠵᠤ ᠪᠤᠷᠤᠭᠠᠨ ᠭᠦᠯᠯᠡᠵᠦ ᠭᠠᠲᠤᠯᠤᠨᠠ | ᠡᠷᠭᠢ ᠪᠠᠨ ᠳᠠᠪᠠᠨ ᠬᠠᠯᠬᠢᠯᠠᠬᠤ ᠦᠶᠡᠷ ᠤᠨ ᠲᠤᠭᠰᠢᠨ ᠰᠦᠷ ᠲᠤ | ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠳᠤᠷᠠᠳᠬᠠᠯ ᠢᠶᠠᠨ ᠰᠢᠪᠠᠨᠡᠵᠦ ᠪᠠᠰᠠ ᠠᠮᠵᠢᠨᠠ᠃ | ᠳᠤᠯᠤᠭᠠᠨ ᠦᠩᠭᠡ ᠶᠢᠨ ᠰᠤᠯᠤᠩᠭᠠ ᠠᠶᠤᠩᠭᠠ ᠶᠢᠨ ᠳᠠᠭᠤᠨ ᠢ ᠴᠠᠯᠮᠠᠳᠠᠵᠤ | ᠡᠯᠢᠭᠡᠨ ᠬᠦᠷᠡᠩ ᠬᠠᠳᠠᠳ ᠤᠨ ᠢᠯᠴᠢ ᠨᠢ ᠨᠠᠰᠢ ᠪᠠᠨ ᠤᠶᠢᠨᠡ | ᠲᠡᠷᠲᠡᠭᠡ ᠳᠡᠨᠵᠢ ᠶᠢᠨ ᠮᠦᠨᠳᠦᠷ ᠪᠦᠮᠪᠦᠷᠴᠡᠭ ᠤᠨ ᠰᠤᠳᠠᠰᠤ ᠤᠷᠤᠭᠤ ᠵᠤᠯᠠᠷᠠᠨ | ᠡᠨᠡᠲᠡᠭᠡ ᠭᠤᠤᠯ ᠤᠨ ᠬᠡᠪᠡᠯᠢ ᠶᠢ ᠤᠳᠠ ᠲᠡᠲᠠᠨ ᠴᠢᠳᠬᠤᠯᠠᠬᠤ ᠶᠤᠮ | ︽ᠳᠦᠮᠦᠩ ᠳᠦᠮᠦᠩ ᠬᠡᠬᠡᠷ︾ ᠤᠨ ᠠᠯᠬᠤᠭᠠ ᠭᠢᠰᠭᠢᠭᠡ ᠠᠶᠢᠵᠠᠮᠯᠠᠵᠤ | ᠳᠦᠷᠪᠡ ᠪᠠᠷ ᠬᠤᠤᠰᠯᠠᠭᠰᠠᠨ ᠭᠠᠨᠵᠤᠭᠠ ᠰᠤᠭᠰᠤᠷᠠᠭᠠ ᠳᠤᠮᠳᠠ ᠪᠠᠨ ᠴᠢᠩᠭᠠᠷᠠᠨᠠ | ᠳᠦᠷᠦᠭᠡ ᠬᠠᠷᠰᠢᠭᠤᠯᠤᠨ ᠳᠤᠪᠲᠤᠯᠬᠤ ᠨᠠᠶᠢᠵᠠ ᠶᠢᠨ ᠨᠠᠷᠭᠢᠶᠠ ᠳᠤ ᠰᠤᠭᠲᠤᠭᠤᠷᠠᠨ | ᠳᠦᠷᠪᠡᠨ ᠴᠠᠭ ᠤᠨ ᠦᠩᠭᠡ ᠶᠢ ᠠᠵᠢᠵᠦ ᠵᠠᠪᠳᠤᠯ ᠦᠭᠡᠢ ᠲᠤᠭᠤᠯᠤᠭᠰᠠᠨ ᠪᠠᠶᠢᠬᠤ ᠶᠤᠮ | ᠬᠦᠯᠦᠭ ᠤᠨ ᠲᠤᠭᠤᠷᠠᠢ ᠳᠤ ᠠᠰᠠᠭᠰᠠᠨ ᠴᠡᠴᠡᠭᠡᠰ ᠤᠨ ᠰᠠᠯᠬᠢᠨ ᠬᠡᠶᠢᠷᠬᠡᠵᠦ | ᠬᠡ ᠦᠭᠡᠢ ᠵᠤᠭᠤᠭ ᠦᠷᠨᠢᠨ ᠦᠶᠡᠷᠬᠡᠯ ᠤᠨ ᠰᠢᠯᠲᠠᠭ ᠨᠡᠮᠡᠭᠳᠡᠨᠡ | ᠬᠡᠬᠡᠷᠡ ᠶᠢᠨ ᠲᠦᠭᠦᠯ ᠠᠴᠠ ᠲᠡᠭᠦᠭᠰᠡᠨ ᠨᠠᠶᠢᠷᠠᠭ ᠤᠨ ᠵᠢᠮᠢᠰ ᠰᠢᠭ ᠬᠦᠭᠡᠷᠦᠬᠦᠨ | ᠬᠡᠭᠡᠮᠰᠦᠭ ᠪᠦᠰᠡᠭᠦᠢ ᠶᠢ ᠦᠨᠦᠰᠬᠦ ᠳᠤ ᠦᠭᠡᠨ ᠤ ᠤᠴᠢᠭ ᠳᠤᠲᠠᠭᠤᠳᠠᠨᠠ | ᠲᠤᠭᠤᠨᠤᠨ ᠳᠡᠭᠡᠷᠡ ᠪᠤᠲᠠᠷᠠᠬᠤ ᠤᠳᠤᠳ ᠤᠨ ᠭᠡᠭᠡ ᠠᠰᠬᠠᠷᠠᠵᠤ | ᠲᠤᠯᠭᠠ ᠶᠢᠨ ᠭᠠᠯ ᠤᠨ ᠲᠡᠷᠭᠡᠳᠡ ᠠᠴᠠ ᠳᠠᠭᠤᠨ ᠤ ᠠᠶᠠᠯᠭᠤ ᠰᠢᠷᠤᠩᠬᠠᠶᠢᠯᠠᠨᠠ | ᠲᠠᠯᠠ ᠰᠠᠷᠠᠨ ᠪᠦᠲᠦᠨ ᠪᠤᠯᠵᠤ ᠬᠤᠨᠤᠭᠠᠳ ᠭᠠᠲᠤᠯᠳᠠᠭ | ᠲᠡᠭᠷᠢᠯᠢᠭ ᠴᠠᠰᠤᠲᠤ ᠶᠢᠨ ᠰᠢᠷᠠ ᠲᠠᠯᠠ ᠦᠷ ᠵᠦᠭ ᠢᠶᠠᠨ ᠨᠡᠭᠦᠨᠡ᠃ | ︵ᠵᠣᠬᠢᠶᠠᠭᠴᠢ᠄ ᠮᠦᠩᠬᠡᠵᠢᠷᠭᠠᠯ︶ |