ᠦᠷᠦᠬᠦᠨ ᠪᠤᠯᠭᠠᠨ ᠤ ᠨᠠᠷᠠ ᠶᠢ ᠡᠵᠢ ᠶᠢᠨ ᠢᠶᠠᠨ ᠡᠷᠬᠦᠭᠰᠡᠨ ᠰᠠᠴᠤᠯᠢ ᠶᠢᠨ ᠭᠡᠭᠡ ᠪᠠᠷ ᠬᠠᠷᠠᠵᠤ | ᠦᠬᠦᠯ ᠭᠡᠳᠡᠭ ᠬᠠᠷᠠᠩᠭᠤᠢ ᠶᠢ ᠮᠠᠷᠳᠠᠨ ᠰᠦᠨ ᠵᠠᠮ ᠢᠶᠠᠷ ᠴᠠᠭ ᠬᠤᠭᠤᠴᠠᠭᠠ ᠲᠠᠢ ᠵᠤᠯᠭᠠᠨ | ᠦᠨᠲᠤᠰᠤ ᠪᠠᠷ ᠢᠶᠠᠨ ᠭᠠᠵᠠᠷ ᠤᠨ ᠬᠦᠬᠦ ᠰᠢᠮᠡᠵᠤ ᠦᠨᠳᠡᠶᠢᠭᠰᠡᠨ ᠮᠤᠳᠤᠳ ᠤᠨ | ᠦᠳᠭᠡᠨ ᠰᠢᠷᠭᠠᠯ ᠨᠠᠪᠴᠢᠰ ᠵᠤᠯᠭᠠᠷᠠᠬᠤ ᠮᠦᠴᠡ ᠪᠦᠷᠢ ᠪᠠᠷ ᠨᠠᠰᠤ ᠪᠠᠨ ᠲᠤᠭᠠᠯᠠᠨ | ᠡᠪᠡᠰᠦᠨ ᠤ ᠪᠤᠷᠠ ᠬᠤᠭᠤᠷᠠᠬᠤ ᠶᠢᠨ ᠭᠱᠠᠨ ᠳᠤ | ᠡᠮᠵᠡᠭᠯᠡᠬᠦ ᠶᠢᠨ ᠰᠢᠨᠠᠯᠤᠯ ᠵᠢᠷᠦᠬᠡᠨ ᠳᠤ ᠮᠡᠳᠡᠷᠡᠭᠳᠡᠵᠤ | ᠤᠰᠤᠨ ᠤ ᠤᠷᠤᠰᠬᠠᠯ ᠴᠢᠯᠠᠭᠤ ᠢᠷᠯᠡᠵᠤ ᠮᠡᠯᠮᠡᠷᠡᠬᠦ ᠳᠤ | ᠤᠬᠠᠭᠠᠨ ᠴᠡᠯᠮᠡᠵᠦ ᠬᠠᠷᠠᠭᠠ ᠲᠡᠯᠡᠭᠰᠡᠨ | ᠤᠢ ᠲᠠᠶᠢᠭᠠ ᠪᠤᠶᠤ ᠡᠯᠡᠰᠦ ᠮᠠᠩᠬᠠᠨ ᠤ ᠬᠦᠨ ᠳᠤ ᠨᠡᠪᠴᠢᠨ ᠪᠤᠴᠠᠮᠠᠷ | ᠦᠳᠡᠰᠢ ᠪᠤᠯᠭᠠᠨ ᠤ ᠰᠠᠷᠠ ᠡᠵᠢ ᠶᠢᠨ ᠮᠢᠨᠢ ᠢᠮᠡᠷᠳᠡᠭ ᠮᠠᠨᠢ ᠶᠢᠨ ᠡᠷᠢᠬᠡᠨ ᠳᠤ ᠬᠡᠷᠡᠯᠳᠦᠵᠦ | ᠨᠢᠬᠦᠯ ᠬᠡᠳᠡᠭ ᠬᠠᠷᠠᠩᠭᠤᠢ ᠦᠷᠬᠦᠨ ᠲᠠᠪᠤᠨ ᠮᠦᠰᠦᠨ ᠤ ᠰᠤᠷᠭᠠᠯ ᠨᠦᠮᠦᠷᠢᠨ | ᠰᠢᠬᠦᠳᠡᠷᠢ ᠶᠢᠨ ᠪᠤᠯᠤᠷ ᠮᠦᠬᠦᠯᠢᠭ ᠡᠪᠡᠰᠦᠨ ᠲᠤᠯᠤᠭᠠᠢ ᠠᠴᠠ ᠰᠢᠯᠦᠭ ᠭᠡᠯᠬᠢᠨ ᠲᠠᠰᠤᠷᠠᠬᠤ ᠳᠤ | ᠰᠦᠨᠢᠵᠢᠨ ᠰᠢᠪᠡᠷᠡᠭᠰᠡᠨ ᠪᠤᠷᠤᠭᠠᠨ ᠨᠠᠮᠳᠠᠵᠤ ᠰᠤᠯᠤᠩᠭᠠ ᠨᠦᠮᠦᠷᠢᠨ ᠦᠷ ᠭᠡᠭᠡᠷᠡᠵᠦ | ᠤᠷᠭᠤᠬᠤ ᠨᠤᠭᠤᠭᠠᠨ ᠤ ᠠᠨᠢᠷ ᠵᠡᠬᠦᠳᠦ ᠰᠡᠷᠡᠭᠡᠨ ᠬᠦᠭᠵᠢᠮᠳᠡᠵᠦ | ᠠᠭᠤᠯᠠᠰ ᠤᠨ ᠤᠩᠭᠤᠨ ᠤᠷᠬᠢᠯ ᠳᠤ ᠤᠳᠤᠳ ᠪᠡᠯᠴᠢᠨ ᠵᠤᠰᠠᠳᠠᠭ | ᠪᠦᠪᠡᠢ ᠶᠢᠨ ᠤᠶᠠᠬᠠᠨ ᠠᠶᠠᠯᠭᠤ ᠠᠴᠠ ᠬᠠᠶᠢᠷᠠ ᠶᠢᠨ ᠭᠡᠷᠡᠯ ᠰᠠᠴᠤᠷᠠᠵᠤ | ᠪᠤᠷᠬᠠᠨ ᠴᠤ ᠰᠦᠬᠦᠷᠡᠳᠡᠭ ᠲᠡᠷᠡ ᠯᠡ ᠠᠭᠤᠤ ᠵᠦᠭ ᠠᠴᠠ | ᠪᠦᠰᠡᠬᠦᠢ ᠬᠦᠮᠦᠨ ᠤ ᠬᠦᠬᠡ ᠲᠡᠭᠷᠢ ᠲᠤᠯᠭᠠᠨ ᠤ ᠲᠡᠷᠭᠡᠲᠡ ᠠᠴᠠ ᠬᠠᠶᠠᠭᠠᠷᠠᠳᠠᠭ ᠶᠤᠮ | ᠪᠤᠷᠤᠭᠠᠨ ᠪᠤᠯᠭᠠᠨ ᠤ ᠲᠤᠰᠤᠯ ᠳᠤ ᠡᠵᠢ ᠶᠢᠨ ᠮᠢᠨᠢ ᠵᠠᠯᠪᠠᠷᠢᠯ ᠪᠠᠭᠲᠠᠳᠠᠭ ᠠᠴᠠ | ᠪᠤᠷᠤᠭᠤ ᠦᠢᠯᠡ ᠶᠢᠨ ᠰᠢᠯᠲᠠᠭ ᠤᠶᠢᠷᠠᠲᠤᠳᠠᠭ ᠦᠭᠡᠢ | ᠪᠤᠭᠤᠷᠤᠯ ᠪᠤᠯᠲᠠᠯᠠ ᠪᠠᠨ ᠭᠤᠯᠤᠮᠲᠠ ᠶᠢᠨ ᠢᠶᠠᠨ ᠭᠠᠯ ᠳᠠᠭᠠᠨ ᠰᠠᠭᠠᠭᠰᠠᠨ ᠰᠥ ᠪᠠᠨ ᠡᠷᠭᠦᠵᠦ | ᠪᠤᠷᠤᠬᠠᠨ ᠭᠤᠪᠢ ᠶᠢᠨ ᠲᠡᠭᠷᠢ ᠳᠤ ᠡᠬᠡ ᠵᠢᠷᠭᠤᠭᠠᠨ ᠵᠦᠢᠯ ᠢ ᠲᠠᠭᠠᠳᠬᠠᠳᠠᠭ ᠠᠴᠠ | ᠪᠤᠴᠠᠬᠤ ᠭᠠᠯᠠᠭᠤᠳ ᠤᠨ ᠴᠤᠪᠤᠭᠠ ᠡᠷᠦᠭᠡᠨ ᠤ ᠤᠭᠤᠰᠤᠷ ᠰᠢᠭ᠋ ᠡᠷᠬᠢᠯᠳᠤᠵᠤ | ᠪᠤᠷᠠᠬᠨ ᠬᠠᠯᠳᠤᠨ ᠤ ᠵᠥᠭ ᠠᠴᠠ ᠤᠷᠢᠨ ᠤᠷᠤᠨ ᠢ ᠵᠤᠷᠢᠨ ᠭᠠᠲᠤᠯᠬᠤ | ᠲᠡᠯᠭᠡᠭᠰᠡᠨ ᠠᠷᠭᠠᠮᠵᠢᠶᠠ ᠰᠢᠭ᠋ ᠵᠡᠯᠡᠯᠡᠭᠰᠡᠨ ᠰᠤᠮᠤᠨ ᠬᠤᠰᠢᠭᠤ | ᠲᠡᠯᠡᠬᠡᠢ ᠶᠢᠨ ᠬᠤᠶᠠᠷ ᠲᠦᠢᠯ ᠢ ᠬᠤᠯᠪᠤᠵᠤ ᠨᠡᠬᠦᠬᠦ ᠳᠤ | ᠲᠡᠪᠡᠯ ᠢᠶᠠᠨ ᠨᠦᠮᠦᠷᠢᠭᠰᠡᠨ ᠡᠵᠢ ᠶᠢᠨ ᠮᠢᠨᠢ ᠪᠠᠷᠠ ᠬᠤᠨ ᠤ ᠨᠢᠳᠦᠨ ᠳᠤ ᠬᠡᠷᠡᠯ ᠬᠤᠪᠢᠯᠵᠤ ᠮᠦᠩᠭᠡᠷᠡᠳᠡᠭ | ᠴᠠᠰᠤ ᠪᠤᠯᠭᠠᠨ ᠤ ᠰᠢᠷᠭᠡᠭ ᠡᠵᠢ ᠶᠢᠨ ᠮᠢᠨᠢ ᠰᠠᠨᠴᠢᠭ ᠲᠤ ᠡᠷᠬᠡᠯᠡᠨ ᠨᠢᠯᠬᠠᠷᠠᠳᠠᠭ ᠪᠤᠯᠬᠤᠷ | ᠴᠠᠭᠠᠨ ᠬᠡᠷᠡᠯ ᠢᠶᠠᠷ ᠤᠷᠴᠢᠯᠠᠩ ᠰᠦᠯᠡᠭᠳᠡᠵᠤ ᠽᠠᠨᠳᠠᠨ ᠨᠠᠰᠤᠨ ᠤ ᠬᠢᠨᠢ ᠮᠦᠰᠢᠶᠡᠳᠦ ᠪᠠᠷ ᠲᠤᠶᠠᠭᠠᠷᠠᠳᠠᠭ | ᠪᠤᠷᠠᠨᠲᠠᠭ ᠲᠠᠮᠤᠵᠤ ᠬᠦᠯᠥᠷᠡᠭᠰᠡᠨ ᠠᠯᠠᠭᠠᠨ ᠤ ᠭᠡ ᠲᠠᠭᠤᠷᠢᠶᠠᠵᠤ | ᠪᠤᠯᠠᠭᠠᠨ ᠬᠦᠷᠡᠩ ᠴᠤᠬᠢᠶᠠᠳ ᠡ᠊ᠩᠬᠡᠷ ᠠᠴᠠ ᠪᠠᠨ ᠬᠠᠯᠠᠭᠤᠴᠠᠵᠦ ᠡᠪᠦᠯᠵᠢᠬᠦ ᠪᠠᠷ | ᠪᠤᠲᠤᠭᠤᠨ ᠤ ᠲᠠᠭᠠᠬᠢᠨ ᠳᠤ ᠬᠤᠶᠢᠯᠠᠷᠠᠵᠤ ᠶᠢᠰᠤ ᠶᠢᠨ ᠬᠦᠢᠲᠡᠨ ᠨᠠᠮᠬᠠᠷᠠᠳᠠᠭ | ᠪᠠᠭᠤᠷᠢ ᠡᠯᠡᠬᠡᠭᠰᠡᠨ ᠤᠨ ᠲᠤᠭᠠᠯᠠᠯ ᠠᠲᠠᠨ ᠲᠡᠮᠡᠭᠡᠨ ᠤ ᠲᠠᠪᠠᠭ ᠲᠤ ᠡᠯᠡᠭᠳᠡᠵᠦ | ᠪᠤᠳᠤᠯ ᠠᠷᠭᠠᠮᠵᠢᠭᠰᠠᠨ ᠨᠤᠲᠤᠭ ᠤᠨ ᠰᠢᠷᠭᠠᠯ ᠰᠢᠷᠤᠢ | ᠪᠤᠶᠢᠲᠤᠭ ᠤᠨ ᠮᠦᠷ᠂ ᠬᠡᠦᠬᠡᠳ ᠨᠠᠰᠤ ᠶᠢ ᠮᠢᠨᠢ ᠮᠠᠨᠴᠦ᠋ᠢᠯᠠᠵᠤ | ᠪᠤᠷᠬᠠᠨᠯᠢᠭ ᠤᠬᠠᠭᠠᠨ ᠤ ᠭᠡᠭᠡ ᠡᠵᠢ ᠠᠴᠠ ᠮᠢᠨᠢ ᠨᠠᠰᠢ ᠦᠷᠬᠦᠯᠵᠢᠯᠡᠳᠡᠭ | ᠤᠯᠠᠷᠢᠯ ᠪᠤᠯᠭᠠᠨ ᠤ ᠦᠩᠭᠡ ᠡᠵᠢ ᠶᠢᠨ ᠮᠢᠨᠢ ᠠᠷᠠᠨᠰᠢᠨ ᠢ ᠦᠪᠯᠡᠳᠡᠭ ᠪᠤᠯᠬᠤᠷ | ᠤᠪᠤᠭᠠᠨ ᠳᠤ ᠨᠡᠮᠡᠭᠳᠡᠬᠦ ᠴᠢᠯᠠᠭᠤᠳ ᠨᠢ ᠪᠤᠷᠬᠠᠨ ᠤ ᠮᠡᠯᠮᠡᠢ ᠪᠠᠷ ᠭᠡᠷᠡᠯᠲᠦᠳᠡᠭ | ᠠᠭᠤᠯᠠ ᠶᠢᠨ ᠬᠦᠭᠡ ᠰᠠᠯᠬᠢ ᠠᠳᠤᠭᠤ ᠢᠰᠭᠡᠷᠴᠦ ᠱᠤᠤᠬᠢᠬᠤ ᠳᠤ | ᠠᠯᠤᠰ ᠤᠨ ᠨᠢᠳᠦᠨ ᠱᠠᠩᠳᠠ ᠠᠴᠠ ᠬᠦᠷᠦᠭᠡᠰᠦ ᠤᠮᠳᠠᠯᠠᠵᠤ ᠪᠤᠴᠠᠳᠠᠭ | ᠤᠨᠠᠭᠠᠨ ᠤ ᠵᠥ᠋ ᠰᠢᠭ᠋ ᠰᠢᠯᠢ ᠨᠢᠷᠤᠭᠤᠳ ᠤᠨᠢᠶᠠᠷ ᠢᠶᠠᠨ ᠰᠢᠯᠭᠡᠭᠡᠵᠦ ᠴᠡᠩᠬᠡᠷᠯᠡᠬᠦ ᠳᠤ | ᠤᠷᠭᠠ ᠶᠢᠨ ᠭᠤᠭᠴᠤᠭᠠᠨ ᠳᠤ ᠨᠠᠷᠠ ᠬᠦᠯᠦᠷᠡᠨ ᠦᠳᠡᠯᠡᠵᠦ ᠲᠤᠭᠤᠷᠭᠠ ᠵᠦᠪ ᠡᠷᠭᠢᠨ ᠵᠢᠷᠭᠠᠳᠠᠭ | ᠤᠷᠤᠢ ᠦᠭᠡᠢ ᠮᠦᠩᠭᠡ ᠲᠡᠭᠷᠢ ᠶᠢᠨ ᠬᠦᠴᠦᠨ ᠠᠴᠠ ᠬᠤᠲᠤᠭ ᠭᠤᠶᠤᠵᠤ | ᠡᠭᠡᠰᠢᠭ ᠲᠤᠯᠤᠭᠠᠨ ᠦᠰᠦᠭ ᠤᠨ ᠡᠷᠳᠡᠨᠢ ᠶᠢᠨ ᠠᠪᠢᠶᠠ ᠪᠠᠷ ᠢᠷᠦᠬᠡᠯ ᠡᠷᠭᠦᠨ | ᠡᠵᠢ ᠳᠡᠭᠡᠨ ᠤᠴᠢᠬᠤ ᠵᠦᠭ ᠢ ᠪᠤᠷᠬᠠᠨ ᠤ ᠵᠦᠭ ᠭᠡᠳᠡᠭ ᠶᠤᠮ᠃ | ︵ᠵᠣᠬᠢᠶᠠᠭᠴᠢ᠄ ᠬᠤᠶᠢᠳ ᠨᠠᠶᠠᠨᠲᠠᠢ︶ |