| — ᠮᠢᠨᠤ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠠᠤᠯᠠᠢ ᠱᠠᠩᠳᠠ ᠳᠠᠭᠠᠨ ᠵᠣᠷᠢᠭᠤᠯᠪᠠ | ᠲᠤᠩ ᠡᠷᠲᠡᠨ ᠤ ᠨᠢᠭᠡᠨ ᠭᠤᠣᠯ ᠠᠭᠤᠯᠠᠨ ᠠᠴᠠ ᠦᠶᠡᠷᠯᠡᠵᠤ ᠭᠡᠨᠡ | ᠲᠤᠩ ᠡᠷᠲᠡᠨ ᠤ ᠨᠢᠭᠡᠨ ᠨᠠᠷᠠ ᠡᠭᠦᠯᠡᠨ ᠠᠴᠠ ᠤᠷᠭᠤᠵᠤ ᠭᠡᠨᠡ | ᠲᠡᠷᠡ ᠭᠤᠣᠯ ᠲᠠᠤᠯᠠᠢ ᠱᠠᠩᠳᠠ ᠪᠠᠶᠢᠭᠰᠠᠨ ᠶᠤᠮ | ᠲᠡᠷᠡ ᠨᠠᠷᠠ ᠠᠪᠤ ᠮᠢᠨᠢ ᠪᠠᠶᠢᠭᠰᠠᠨ ᠶᠤᠮ᠃ | | ᠲᠠᠤᠯᠠᠢ ᠱᠠᠩᠳᠠ ᠠᠴᠠ ᠨᠠᠷᠠ ᠮᠠᠨᠳᠤᠬᠤ ᠨᠢ ᠤᠰᠤᠨ ᠪᠤᠳᠤᠭ ᠤᠨ ᠬᠢ ᠭᠡᠮᠡᠷ | ᠲᠠᠤᠯᠠᠢ ᠱᠠᠩᠳᠠ ᠳᠤ ᠨᠠᠷᠠ ᠵᠢᠷᠭᠠᠬᠤ ᠨᠢ ᠲᠣᠰᠣᠨ ᠵᠢᠷᠤᠭ ᠤᠨ ᠬᠢ ᠭᠡᠮᠡᠷ | ᠠᠪᠤ ᠮᠢᠨᠢ ᠬᠤᠳᠳᠤᠭ ᠤᠨ ᠠᠰᠬᠠᠷ ᠲᠡᠭᠡᠷᠡ ᠬᠤᠨᠢᠳ ᠢᠶᠠᠨ ᠪᠠᠷᠠᠯᠠᠨᠠ | ᠬᠤᠨᠢᠳ ᠨᠢ ᠬᠥᠳᠥᠯ ᠤᠨ ᠴᠠᠭᠠᠨᠠᠬᠠᠨ ᠱᠣᠣᠬᠢᠯᠠᠨᠠ᠃ | ᠪᠢ ᠰᠡᠭᠦᠳᠡᠷ ᠲᠠᠢ ᠪᠠᠨ ᠤᠷᠤᠯᠳᠤᠵᠤ ᠪᠤᠷᠭᠠᠰᠥᠨ ᠮᠣᠷᠢ ︽ᠬᠥᠯᠥᠷᠡᠨᠡ︾᠃ | ᠭᠤᠣᠯ ᠤᠰᠤᠨ ᠤ ᠠᠶᠢᠯ ᠤᠳ ᠮᠠᠨᠠᠶᠢᠬᠢᠨ ᠠᠴᠠ ᠠᠮᠠᠨ ᠤᠰᠤ ᠪᠠᠨ ᠵᠥᠭᠡᠭᠡᠨᠡ | ᠭᠤᠶᠤᠤ ᠴᠤᠮᠪᠤᠯᠠᠵᠤ᠂ ᠱᠠᠭᠠᠵᠠᠭᠠᠢ ᠱᠠᠭᠰᠢᠵᠤ ᠡᠮᠥᠨᠡ ᠬᠥᠳᠥᠯ ᠢᠶᠠᠷ ᠠᠶᠠᠨ ᠤ ᠬᠥᠮᠥᠨ ᠶᠠᠪᠤᠨᠠ | ᠭᠤᠣᠯ ᠢᠶᠠᠨ ᠨᠤᠷᠭᠠᠵᠤ᠂ ᠰᠤᠨᠢᠨ ᠰᠠᠶᠢᠬᠠᠨ ᠲᠡᠯᠭᠡᠵᠤ ᠶᠢᠷᠳᠢᠨᠴᠥ ᠡᠬᠢᠯᠡᠬᠦ ᠳᠤ ᠨᠠᠮᠤᠷ ᠪᠤᠯᠤᠨᠠ᠃ | ᠡᠭᠦᠯᠡ ᠬᠤᠷᠠᠪᠠᠯ ᠪᠤᠷᠤᠭᠠᠯᠠᠬᠤ ᠨᠢ ᠡ ᠭᠡᠵᠤ ᠡᠪᠦᠭᠡ ᠡᠷᠢᠭᠡ ᠪᠠᠨ ᠰᠢᠪᠳᠣᠷᠣᠨᠠ | ᠦᠷᠮᠥᠭ ᠳᠠᠯᠢᠩ ᠢᠶᠠᠨ ᠲᠤᠬᠤᠵᠤ ᠠᠪᠤ ᠬᠡᠨᠵᠡ ᠲᠥᠯ ᠳᠡᠭᠡᠨ ᠶᠠᠪᠤᠨᠠ | ᠡᠮᠥᠨᠡᠭᠦᠷ ᠬᠤᠶᠢᠭᠤᠷ ᠨᠢ ᠬᠥᠶᠥᠵᠤ ᠪᠢ ᠥᠨᠥᠴᠢᠨ ᠰᠢᠬᠢᠷ ᠤᠨ ᠭᠤᠷᠢᠳᠠᠯᠭᠠ ᠲᠠᠯᠪᠢᠨᠠ᠃ | | ᠡᠷᠲᠡ ᠤᠷᠢᠳᠥ ᠶᠢᠨ ᠨᠢᠭᠡᠨ ᠭᠤᠣᠯ ᠠᠭᠤᠯᠠᠨ ᠠᠴᠠ ᠦᠶᠡᠷᠯᠡᠭᠰᠡᠨ ᠭᠡᠨᠡ | ᠡᠷᠲᠡ ᠤᠷᠢᠳᠥ ᠶᠢᠨ ᠨᠢᠭᠡᠨ ᠨᠠᠷᠠ ᠡᠭᠦᠯᠡᠨ ᠠᠴᠠ ᠤᠷᠭᠤᠭᠰᠠᠨ ᠭᠡᠨᠡ | ᠲᠡᠷᠡ ᠭᠤᠣᠯ ᠤᠨ ᠨᠡᠷᠡ ᠶᠢ ᠲᠠᠤᠯᠠᠢ ᠱᠠᠩᠳᠠ ᠭᠡᠳᠡᠭ | ᠲᠡᠷᠡ ᠨᠠᠷᠠ ᠶᠢ ᠠᠪᠤ ᠭᠡᠳᠡᠭ ᠡ᠃ | | ᠲᠠᠤᠯᠠᠢ ᠱᠠᠩᠳᠠ ᠠᠴᠠ ᠨᠠᠷᠠ ᠮᠠᠨᠳᠤᠬᠤ ᠨᠢ ᠥᠯᠢᠭᠡᠷ ᠤᠨ ᠶᠤᠮᠰᠢᠭ | ᠲᠠᠤᠯᠠᠢ ᠱᠠᠩᠳᠠ ᠳᠤ ᠨᠠᠷᠠ ᠵᠢᠷᠭᠠᠬᠠᠤ ᠨᠢ ᠥᠯᠢᠭᠡᠷ ᠤᠨ ᠲᠡᠭᠦᠰᠭᠡᠯ ᠶᠤᠮᠰᠢᠭ | ᠠᠪᠤ ᠮᠢᠨᠢ ᠬᠤᠳᠠᠨ ᠤ ᠪᠠᠨ ᠳᠤᠮᠳᠠ ᠬᠤᠨᠢᠳ ᠢᠶᠠᠨ ᠵᠢᠰᠥᠯᠡᠨᠡ | ᠬᠡᠪᠢᠭᠰᠡᠨ ᠬᠤᠨᠢᠳ ᠠᠴᠠ ᠨᠠᠷᠠ᠂ ᠨᠠᠮᠤᠷ ᠬᠠᠩᠬᠤᠯᠥᠨᠡ | ᠪᠢ ᠲᠡᠭᠦᠨ ᠤ ᠵᠠᠬᠠ ᠳᠤ ᠤᠭᠵᠢᠭᠤᠷ ᠪᠣᠷᠣ ᠪᠠᠨ ︽ᠤᠷᠭᠠᠯᠠᠨᠠ︾᠃ | ᠥᠷᠯᠥᠭᠡ ᠰᠡᠷᠢᠬᠦ ᠳᠤ ᠲᠡᠪᠥᠷᠡ ᠲᠠᠢ ᠴᠠᠢ ᠭᠠᠯ ᠲᠡᠭᠡᠷᠡ ᠳᠠᠷᠬᠢᠯᠤᠨᠡ | ᠡᠷᠥᠭᠡ ᠪᠠᠨ ᠰᠡᠬᠦᠬᠦ ᠳᠤ ᠨᠠᠷᠠ ᠵᠣᠯᠠᠢ ᠲᠡᠭᠡᠷᠡ ᠠᠴᠠ ︽ᠳᠠᠷᠬᠢᠯᠤᠨᠠ︾᠃ | ᠭᠤᠪᠢ ᠶᠢᠨ ᠪᠣᠷᠤᠭᠠ ᠭᠤᠣᠯ ᠠᠴᠠ ᠪᠠᠨ ᠠᠮᠢᠲᠠᠢ ᠭᠡᠵᠤ ᠡᠪᠦᠭᠡ ᠰᠠᠬᠠᠯ ᠢᠶᠠᠨ ᠰᠢᠪᠳᠣᠷᠣᠨᠠ | ᠭᠤᠶᠤᠯᠠᠯ ᠤᠨ ᠲᠡᠪᠡᠯ ᠢᠶᠠᠨ ᠬᠡᠳᠥᠷᠴᠥ ᠰᠤᠮᠤ ᠶᠢᠨ ᠨᠠᠭᠠᠳᠤᠮ ᠳᠤ ᠠᠪᠤ ᠶᠠᠪᠤᠨᠠ | ᠭᠠᠭᠴᠠᠬᠠᠨ ᠡᠳᠥᠷ ᠤᠨ ᠬᠤᠨᠢᠨ ᠤ ︽ᠳᠠᠭᠠᠭᠠᠮᠠᠯ︾ ᠪᠣᠯᠵᠤ ᠪᠢ ᠰᠥᠨᠢᠵᠢᠨ ᠡᠷᠢᠯ ᠪᠤᠯᠭᠠᠨᠠ᠃ | | ᠬᠤᠳᠠ ᠶᠢᠨ ᠨᠠᠮᠤᠷ ᠵᠡᠭᠦᠳᠥᠨ ᠳᠤ ᠨᠣᠳᠤᠭ ᠢᠷᠡᠨᠡ | ᠬᠥᠥ ᠪᠠᠨ ᠬᠥᠯᠢᠶᠡᠭᠰᠡᠨ ᠠᠪᠤ | ᠭᠡᠷ ᠤᠨ ᠢᠶᠠᠨ ᠭᠠᠳᠠᠭᠠ ᠲᠤᠷᠠᠨᠳᠠᠵᠤ ᠰᠠᠭᠤᠭᠠ ᠨᠢ ᠦᠵᠡᠭᠳᠡᠨᠡ᠂ | ᠠᠪᠤ ᠮᠢᠨᠢ ᠲᠠ ᠣᠳᠣ ᠠᠯᠢᠬᠠᠨ ᠭᠠᠵᠠᠷ ᠮᠡᠯᠮᠡᠷᠡᠵᠤ ᠰᠠᠭᠤᠭᠠ ᠶᠤᠮ ᠪᠣᠯ︖ | ᠬᠤᠳᠠ ᠶᠢᠨ ᠨᠠᠮᠤᠷ ᠤᠷᠦ᠋ᠢᠳᠠᠭᠰᠠᠨ ᠪᠤᠷᠤᠭᠠ ᠰᠥᠨᠢᠵᠢᠨ ᠰᠢᠪᠡᠷᠡᠨᠡ | ᠤᠶᠢᠳᠬᠠᠷ ᠬᠢᠰᠬᠢᠯᠡᠵᠤ ᠪᠢ ᠭᠤᠳᠤᠮᠵᠢᠨ ᠳᠤ ᠰᠥᠨᠢ ᠶᠢᠨ ᠰᠠᠷᠠ ᠲᠠᠢ ᠬᠠᠨᠢᠰᠤᠨᠠ᠂ | ᠰᠠᠷᠠᠨ ᠤ ᠨᠣᠲᠤᠭ ᠲᠤ ᠪᠠᠰᠠ ᠨᠠᠮᠤᠷ ᠪᠤᠯᠤᠭᠠ ᠶᠤᠮ ᠪᠣᠯᠪᠠ ᠤᠤ︖ | | ᠰᠡᠪᠡᠯᠵᠡᠬᠦ ᠶᠠᠭᠠᠨ ᠰᠠᠯᠬᠢᠨ ᠳᠤ ᠰᠡᠭᠦᠳᠡᠷ ᠮᠢᠨᠢ ᠶᠠᠪᠤᠴᠢᠬᠬᠠᠤ ᠭᠡᠳ ᠪᠠᠶᠢᠨᠠ | ᠨᠣᠳᠤᠭ ᠮᠢᠨᠢ ᠴᠢ ᠰᠠᠯᠬᠢᠨ ᠤ ᠤᠶᠠᠭᠠ ᠴᠦ ᠶᠤᠮ ᠪᠢᠯᠡ ᠤᠤ︖ | ᠰᠡᠷᠭᠦᠯᠡᠩ ᠪᠠᠭᠠ ᠨᠠᠰᠤᠨ ᠳᠠᠭᠠᠨ ᠰᠥᠨᠡᠰᠥ ᠮᠢᠨᠢ ᠪᠣᠴᠠᠴᠢᠬᠠᠬᠤ ᠭᠡᠳ ᠪᠠᠶᠢᠨᠠ | ᠨᠣᠳᠤᠭ ᠮᠢᠨᠢ ᠴᠢ ᠢᠰᠡᠭᠡᠢ ᠦᠨᠡᠭᠡ ᠴᠤ ᠶᠤᠮ ᠪᠢᠯᠡ ᠤᠤ︖ | | ᠲᠠᠤᠯᠠᠢ ᠤᠰᠤ ᠶᠢ ᠨᠢ ᠲᠣᠯᠢᠶᠠᠴᠢᠬᠠᠭᠠᠳ | ᠰᠠᠷᠠᠨ ᠳᠤ ᠭᠠᠷᠤᠭᠰᠠᠨ ᠭᠡᠨᠡ ᠯᠠᠢ᠂ ᠲᠠᠤᠯᠠᠢ ᠱᠠᠩᠳᠠ ᠮᠢᠨᠢ | ᠰᠢᠪᠡᠷᠡᠭᠰᠡᠨ ᠪᠣᠷᠣᠭᠠᠨ ᠢ ᠪᠢ ᠰᠠᠷᠠᠨ ᠤ ᠨᠢᠯᠪᠤᠰᠥ ᠭᠡᠵᠤ ᠰᠠᠨᠠᠨᠠᠮ︕ | ᠲᠤᠤᠯᠢᠰ ᠤᠨ ᠪᠠᠭᠠᠳᠤᠷ ᠤᠳ ᠠᠳᠠ | ᠦᠳᠡᠯᠡᠭᠡᠳ ᠮᠣᠷᠳᠠᠭᠰᠠᠨ ᠭᠡᠨᠡ ᠯᠠᠢ᠂ ᠲᠠᠤᠯᠠᠢ ᠱᠠᠩᠳᠠ ᠮᠢᠨᠢ | ᠤᠮᠠᠷᠠ ᠶᠢᠨ ᠬᠥᠬᠡ ᠵᠢᠪᠠᠷ ᠢ ᠪᠢ ᠤᠬᠠᠭᠠᠨᠳᠤ ᠶᠡᠬᠡᠰ ᠤᠨ ᠬᠠᠲᠠᠭᠤ ᠵᠠᠬᠢᠶᠠ ᠭᠡᠵᠤ ᠪᠤᠳᠤᠨᠠᠮ︕ | ᠱᠠᠩᠳᠠ ᠯᠡ ᠶᠤᠮ ᠪᠣᠯᠬᠤᠷ ᠢᠶᠠᠨ | ᠭᠠᠵᠠᠷ ᠲᠠᠭᠠᠨ ᠰᠢᠩᠭᠡᠴᠢᠭᠡᠳᠡᠭ ᠶᠤᠮ ᠭᠡᠨᠡ ᠯᠠᠢ᠂ ᠲᠠᠤᠯᠠᠢ ᠱᠠᠩᠳᠠ ᠮᠢᠨᠢ | ᠤᠷᠭᠤᠭᠰᠠᠨ ᠴᠡᠴᠡᠭᠡᠰ ᠢ ᠪᠢ ᠤᠰᠤᠨ ᠤ ᠦᠷᠬᠦᠯᠵᠢᠯᠡᠯ ᠭᠡᠵᠤ ᠪᠤᠳᠤᠨᠠᠮ︕ | ᠰᠥᠷᠥᠭ ᠰᠥᠷᠥᠭ ᠲᠡᠮᠡᠭᠡᠳ | ᠠᠳᠠ ᠠᠴᠠ ᠤᠤᠭᠤᠭᠠᠳ ᠭᠠᠷᠤᠭᠰᠠᠨ ᠭᠡᠨᠡ ᠯᠠᠢ᠂ ᠲᠠᠤᠯᠠᠢ ᠱᠠᠩᠳᠠ ᠮᠢᠨᠢ | ᠮᠠᠨᠳᠤᠵᠤ ᠪᠠᠶᠢᠭᠠ ᠨᠠᠷᠠ ᠶᠢ ᠪᠢ ᠮᠠᠨ ᠤ ᠤᠳᠤᠮ ᠤᠨ ᠭᠠᠯ ᠭᠡᠵᠤ ᠪᠤᠳᠤᠨᠠᠮ︕ | | ᠬᠥᠮᠥᠰᠭᠡ ᠵᠠᠩᠬᠢᠳᠬᠤ ᠮᠡᠳᠥ ᠬᠥᠷᠡᠩ ᠡᠭᠦᠯᠡᠰ ᠲᠤᠯᠤᠭᠠᠶᠢᠯᠠᠨᠠ | ᠬᠥᠭᠡᠮᠡᠢ ᠰᠢᠭ ᠨᠠᠮᠤᠷ ᠨᠠᠳᠠ ᠲᠤᠮᠳᠠᠭᠤᠷ ᠥᠩᠭᠡᠷᠡᠨᠡ | ᠲᠠᠤᠯᠠᠢ ᠱᠠᠩᠳᠠ ᠶᠢᠨ ᠪᠣᠷᠣ ᠲᠤᠯᠤᠭᠠᠳ ᠰᠢᠷᠭᠠᠯᠳᠤᠴᠢᠬᠠᠭᠰᠠᠨ ᠪᠠᠶᠢᠨᠠ ᠯᠠᠢ︕ | | ᠬᠤᠨᠢᠨ ᠵᠢᠯ ᠲᠠᠢ ᠠᠪᠤ᠂ ᠲᠠᠤᠯᠠᠢ ᠱᠠᠩᠳᠠ ᠬᠤᠶᠠᠷ | ᠲᠥᠷᠪᠡᠨ ᠮᠥᠩᠭᠡᠳᠡ ᠶᠢᠨ ᠵᠢᠷᠤᠭ ᠪᠣᠯᠵᠤ | ᠬᠥᠬᠡ ᠮᠣᠷᠢᠨ ᠵᠢᠯ ᠤᠨ ᠨᠠᠮᠤᠷ ᠵᠡᠬᠦᠳᠥᠨ ᠳᠤ ᠢᠷᠡᠨᠡ᠂ | ᠬᠠᠭᠤᠴᠢᠷᠠᠭᠰᠠᠨ ᠪᠣᠷᠣ ᠣᠩᠭᠤᠴᠠ ᠵᠢᠪᠡ ᠵᠠᠭᠤᠵᠤ | ᠬᠤᠳᠳᠤᠭ ᠪᠠᠯ ᠵᠠᠭᠤᠵᠤ ᠨᠠᠮᠠᠢᠢ ᠤᠭᠳᠤᠨᠠ | ᠠᠷᠭᠠᠳᠠᠨ ᠠᠷᠭᠠᠳᠠᠨ ᠪᠠᠶᠢᠵᠤ ᠠᠮᠠᠨ ᠳᠤᠨᠢ ᠰᠦ ᠲᠤᠰᠤᠭᠠᠪᠠ ᠪᠢ᠃ | ᠴᠠᠩᠭᠠᠭᠰᠠᠨ ᠬᠥᠬᠡ ᠲᠡᠭᠳᠡᠭᠡᠭᠡᠢ ᠴᠢᠳᠠᠯ ᠤᠷᠤᠭᠰᠠᠨ ᠮᠡᠳᠥ ᠲᠡᠪᠳᠡᠷᠢᠨ ᠭᠠᠷᠬᠤ ᠳᠤ | ᠥᠯᠥᠨ ᠴᠢᠬᠢᠭᠳᠡᠢ ᠬᠤᠳᠳᠤᠭ ᠲᠤ ᠰᠢᠪᠠᠭᠤ ᠡᠭᠦᠷᠯᠡᠭᠰᠡᠨ ᠪᠠᠶᠢᠵᠠᠢ ᠁ | ᠡᠪᠥᠯ ᠠᠴᠠ ᠤᠷᠢᠳᠠᠵᠤ ᠥᠳᠥᠨ ᠳᠤᠨᠢ ᠬᠢᠷᠠᠭᠤ ᠤᠨᠠᠴᠢᠬᠠᠭᠰᠠᠨ ᠪᠠᠶᠢᠪᠠ᠃ | ᠪᠣᠷᠬᠠᠨ ᠠᠪᠤ ᠶᠢ ᠮᠢᠨᠢ ᠨᠠᠳᠠ ᠠᠴᠠ ᠰᠠᠶᠢᠨ ᠲᠠᠨᠢᠳᠠᠭ ᠲᠡᠷᠡ ᠰᠢᠪᠠᠭᠤ | ᠪᠤᠯᠠᠭᠠᠨ ᠭᠤᠪᠢ ᠶᠢᠨ ᠠᠷᠭᠠᠯ ᠥᠨᠥᠷᠳᠥᠭᠰᠡᠨ ᠬᠤᠳᠳᠤᠭ ᠢ ᠲᠡᠭᠡᠵᠤ ᠰᠠᠬᠢᠳᠠᠭ ᠪᠠᠶᠢᠵᠠᠢ ᠁ | | ᠨᠠᠮᠤᠷ ᠤᠨ ᠰᠢᠪᠠᠭᠤᠳ ᠬᠠᠪᠤᠷ ᠢᠷᠡᠬᠦ ᠳᠡᠭᠡᠨ | ᠡᠶᠢᠮᠥ ᠨᠢᠭᠡᠨ ᠦᠯᠢᠭᠡᠷ ᠵᠠᠭᠤᠵᠤ ᠢᠷᠡᠨᠡ | ᠲᠡᠷᠡ ᠦᠯᠢᠭᠡᠷ ᠢ ᠬᠥᠥ ᠮᠢᠨᠢ ᠰᠤᠨᠤᠰᠴᠥ ᠬᠡᠯᠡ ᠳᠤ ᠤᠷᠤᠨᠠ ᠁ | ᠡᠷᠲᠡ ᠤᠷᠢᠳᠥ ᠶᠢᠨ ᠨᠢᠭᠡᠨ ᠭᠤᠣᠯ ᠠᠭᠤᠯᠠᠨ ᠠᠴᠠ ᠦᠶᠡᠷᠯᠡᠭᠰᠡᠨ ᠭᠡᠨᠡ | ᠡᠷᠲᠡ ᠤᠷᠢᠳᠥ ᠶᠢᠨ ᠨᠢᠭᠡᠨ ᠨᠠᠷᠠ ᠡᠭᠦᠯᠡᠨ ᠠᠴᠠ ᠤᠷᠭᠤᠭᠰᠠᠨ ᠭᠡᠨᠡ | ᠲᠡᠷᠡ ᠭᠤᠣᠯ ᠤᠨ ᠨᠡᠷᠡ ᠶᠢ ᠲᠠᠤᠯᠠᠢ ᠱᠠᠩᠳᠠ ᠭᠡᠳᠡᠭ | ᠲᠡᠷᠡ ᠨᠠᠷᠠ ᠶᠢ ᠠᠪᠤ ᠭᠡᠳᠡᠭ ᠡ ᠁ | （ᠵᠣᠬᠢᠶᠠᠭᠴᠢ᠄ ᠲᠤᠷᠭᠤᠳ ᠰᠠᠷᠠᠩᠳᠤᠩᠭᠠᠯᠠᠭ） |