— ᠮᠣᠩᠭᠤᠯ᠂ ᠲᠥᠪᠡᠳ ᠬᠡᠯᠡᠨ ᠤ ᠳᠠᠷᠬᠠᠨ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ᠂ ᠭᠦᠨ ᠤᠬᠠᠭᠠᠨᠳᠠᠨ᠂ | ᠮᠡᠷᠭᠡᠳ ᠤᠨ ᠡᠷᠬᠡᠳᠥ ᠠᠭᠸᠠᠩᠳᠠᠨᠳᠠᠷ ᠯᠾᠠᠷᠠᠮᠪᠠ ᠶᠢᠨ ᠮᠡᠨᠳᠥᠯᠡᠭᠰᠡᠨ ᠤ 255 ᠵᠢᠯ ᠤᠨ ᠤᠢ ᠳᠤ | ᠨᠣᠳᠤᠭ ᠨᠢᠭᠡᠳᠥ ᠰᠠᠷᠠᠨᠳᠤᠩᠭᠠᠯᠠᠭ ᠬᠡᠮᠡᠭᠴᠢ ᠬᠤᠯᠪᠤᠨ ᠰᠢᠯᠥᠭᠯᠡᠭᠰᠡᠨ ᠨᠢ ᠡᠨᠡ ᠪᠤᠶᠤ︕ | | ᠪᠠᠶᠠᠨᠨᠢᠷᠤᠭᠤᠨ ᠤ ᠨᠠᠯᠠᠷᠬᠠᠢ ᠡᠪᠡᠰᠥ ᠪᠠᠷ ᠪᠠᠳᠠᠭ ᠰᠢᠯᠥᠭ ᠥᠨᠡᠭᠡᠴᠢᠯᠡᠵᠤ ᠪᠢ ᠥᠭᠢᠷᠡᠭᠰᠡᠨ ᠮᠣᠳᠤᠨ ᠤ ᠳᠣᠣᠷᠠ | ᠤᠴᠢᠨᠠ | ᠤᠭ ᠨᠢ ᠲᠡᠷᠡ ᠳᠠᠨᠳᠠᠷ ᠪᠠᠨᠳᠢ ᠶᠢᠨ ᠲᠣᠭᠯᠠᠵᠤ ᠥᠰᠥᠭᠰᠡᠨ ᠵᠤᠯᠵᠠᠭᠠᠨ ᠲᠣᠣᠷᠠᠢ ᠪᠠᠶᠢᠵᠠᠢ᠃ | ᠪᠣᠷᠪᠢ ᠮᠥᠷᠥᠯᠡᠭᠰᠡᠨ ᠳᠠᠨᠳᠠᠷ ᠤᠰᠤ ᠪᠠᠨ ᠳᠤᠰᠤᠯᠠᠭᠤᠯᠤᠭᠰᠠᠭᠠᠷ ᠭᠡᠷ ᠤᠨ ᠢᠶᠠᠨ ᠬᠠᠶᠠᠭᠠᠨ ᠳᠤ ᠢᠷᠡᠨᠡ | ᠮᠢᠨᠤ ᠯᠡ ᠤᠤᠭᠤᠵᠤ ᠠᠮᠰᠠᠬᠤ ᠤᠴᠢᠷᠳᠠᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠷᠠᠰᠢᠶᠠᠨ ᠪᠠᠶᠢᠵᠠᠢ᠃ | ᠰᠠᠷᠠᠨ ᠲᠤᠩᠭᠠᠯᠠᠭ ᠰᠥᠨᠢ ᠪᠢ ᠳᠠᠨᠳᠠᠷ ᠪᠠᠨᠳᠢ ᠲᠠᠢ ᠵᠤᠯᠭᠠᠨᠠ | ᠰᠠᠷᠠᠯ ᠬᠥᠬᠡ ᠲᠡᠭᠷᠢ ᠶᠢᠨ ᠳᠤᠤᠷᠠ ᠡᠨᠡ ᠵᠣᠯᠭᠠᠯᠳᠠ ᠤᠳᠠᠭᠠ ᠦᠭᠡᠢ ᠁ | ᠲᠤᠤᠯᠢ ᠬᠠᠶᠢᠯᠠᠭᠰᠠᠨ ᠡᠪᠥᠭᠡᠳ ᠣᠳᠣ ᠰᠢᠩᠭᠡᠷᠡᠳᠡᠯᠡ ᠬᠠᠭᠤᠴᠢᠯᠠᠬᠤ ᠳᠤ ᠲᠤᠯᠭᠠᠨ ᠭᠠᠯ ᠤᠨ ᠲᠡᠷᠭᠡᠳᠡ ᠪᠢ | ᠵᠡᠭᠦᠷᠮᠡᠭᠯᠡᠵᠥ ᠰᠡᠷᠡᠨᠡ | ᠤᠭ ᠨᠢ ᠲᠡᠳᠡ ᠳᠠᠨᠳᠠᠷ ᠯᠾᠠᠷᠠᠮᠪᠠ ᠶᠢᠨ ᠲᠤᠬᠠᠢ ᠤᠴᠢᠷᠯᠠᠨ ᠥᠭᠦᠯᠡᠯᠳᠥᠭᠰᠡᠨ ᠪᠠᠶᠢᠵᠠᠢ᠃ | ᠤᠶᠢᠵᠠᠩ ᠵᠠᠶᠢᠰᠠᠩ ᠤᠨ ᠭᠠᠳᠠᠭᠠ ᠤᠶᠠᠭᠠ ᠲᠠᠢ ᠬᠦᠯᠥᠭ ᠡᠷᠭᠢᠴᠡᠭᠰᠡᠭᠡᠷ ᠳᠤᠷᠤᠨᠠ ᠶᠢᠨ ᠵᠡᠷᠭᠡᠯᠭᠡᠨ ᠳᠤ ᠵᠠᠮᠬᠠᠷᠠᠵᠦ | ᠰᠢᠩᠬᠡᠨᠡ | ᠳᠤᠯᠤᠭᠠᠨ ᠨᠠᠰᠥ ᠲᠠᠢ ᠳᠠᠨᠳᠠᠷ ᠶᠠᠮᠤᠨ ᠬᠡᠶᠢᠳ ᠢ ᠵᠣᠷᠢᠬᠤ ᠳᠤ ᠵᠣᠷᠢᠭ ᠢᠶᠠᠷ ᠰᠠᠯᠬᠢᠨ ᠤ ᠦᠵᠥᠭᠦᠷ ᠰᠦ ᠬᠠᠳᠠᠭ | ᠨᠠᠮᠢᠷᠠᠨᠠ | ᠲᠤᠩᠭᠠᠯᠠᠭ ᠰᠠᠷᠠ ᠲᠠᠢ ᠰᠥᠨᠢ ᠪᠢ ᠳᠠᠨᠳᠠᠷ ᠠᠬᠠ ᠶᠢ ᠵᠡᠭᠦᠳᠥᠯᠡᠨᠡ | ᠲᠤᠨᠤᠮᠠᠯ ᠬᠥᠬᠡ ᠲᠡᠭᠷᠢ ᠶᠢᠨ ᠲᠤᠤᠷᠠ ᠡᠷᠲᠡᠨ ᠤ ᠬᠥᠮᠥᠨ ᠢᠷᠡᠨᠡ᠃ | ᠰᠠᠷᠠᠨ ᠲᠤᠩᠭᠠᠯᠠᠭ ᠰᠥᠨᠢ ᠪᠢ ᠳᠠᠨᠳᠠᠷ ᠠᠬᠠ ᠲᠠᠢ ᠵᠤᠯᠭᠠᠨᠠ | ᠰᠠᠶ᠋ᠢᠬᠠᠨ ᠪᠤᠯᠤᠭᠰᠠᠨ ᠶᠠᠪᠤᠳᠠᠯ ᠢ ᠰᠡᠳᠬᠢᠯ ᠠᠭᠤᠵᠢᠷᠠᠳᠠᠯᠠ ᠬᠠᠭᠤᠴᠢᠯᠠᠨᠠ᠂ | ᠠᠷᠪᠠᠨ ᠶᠢᠰᠥᠳᠡᠢ ᠳᠠᠨᠳᠠᠷ ᠠᠮᠳᠤᠤ ᠲᠥᠪᠡᠳ ᠢ ᠵᠤᠷᠢᠬᠤ ᠳᠤ ᠴᠠᠰᠤᠳᠤ ᠶᠢᠨ ᠪᠤᠭᠤᠷᠤᠯ ᠤᠷᠬᠢᠯ ᠴᠠᠭᠠᠨᠠ ᠪᠠᠨ | ᠰᠥᠷᠳᠡᠢ ᠲᠥᠩᠰᠦ᠋ᠢᠨᠡ | ᠠᠭᠸᠠᠩᠯᠤᠪᠰᠠᠩ ᠪᠠᠭᠰᠢ ᠶᠢᠨ ᠠᠯᠳᠠᠨ ᠵᠠᠬᠢᠶᠠ ᠤᠷᠤᠰᠢᠬᠤ ᠳᠤ ᠰᠢᠯᠥᠭ ᠤᠨ ᠴᠠᠭᠠᠨ ᠮᠥᠷ ᠰᠢᠭ ᠰᠡᠳᠬᠢᠯ ᠤᠨ | ᠭᠦᠨ ᠳᠤ ᠮᠥᠩᠭᠡᠷᠡᠨᠡ | ᠮᠥᠬᠦᠯᠢᠭᠳᠦ ᠰᠢᠭᠦᠳᠡᠷᠢ ᠶᠢᠨ ᠡᠷᠢᠭᠡ ᠪᠠᠷ ᠪᠠᠷᠳᠠᠮ ᠵᠠᠩ ᠢ ᠰᠢᠪᠬᠠᠷᠴᠥ ᠰᠦᠮᠪᠥᠮ ᠤᠨ ᠠᠯᠳᠠᠨ ᠦᠰᠥᠭ ᠲᠤ | ᠳᠠᠨᠳᠠᠷ ᠤᠨ ᠰᠤᠷᠭᠠᠯ ᠰᠢᠩᠭᠡᠭᠰᠡᠨ ᠶᠤᠮ | ᠮᠥᠷᠥᠭᠡᠳᠥᠯ ᠤᠨ ᠠᠯᠤᠰ ᠲᠤ ᠰᠡᠳᠬᠢᠯ ᠤᠨ ᠵᠤᠯᠠ ᠪᠠᠳᠮᠠᠯᠠᠠ ᠬᠤᠶᠢᠳ ᠳᠠᠨᠳᠠᠷ ᠤᠨ ᠤᠬᠠᠭᠠᠨ ᠨᠣᠮ ᠤᠨ | ᠤᠳᠬᠠ ᠳᠤ ᠤᠷᠤᠰᠢᠭᠰᠠᠨ ᠶᠤᠮ᠃ | | ᠲᠡᠷᠢᠬᠦᠨ ᠯᠾᠡᠷᠠᠮᠪᠠ ᠠᠭᠸᠠᠩᠳᠠᠨᠳᠠᠷ ᠨᠤᠶᠠᠨ ᠰᠠᠭᠤᠳᠠᠯ ᠳᠤ ᠵᠠᠯᠠᠷᠠᠬᠤ ᠳᠤ ᠲᠥᠪᠡᠳ ᠤᠨ ᠲᠦᠮᠡᠨ ᠮᠡᠷᠭᠡᠨ ᠠᠮᠠ ᠪᠠᠨ | ᠪᠠᠷᠢᠵᠤ ᠭᠠᠰᠠᠯᠤᠨᠠ | ᠲᠡᠩᠬᠡᠬᠡ ᠰᠢᠨᠳᠠᠰᠤᠳᠤ ᠬᠦᠯᠥᠭ ᠠᠶᠠᠨ ᠬᠤᠯᠠ ᠳᠤ ᠴᠤᠴᠠᠳᠠᠭ ᠦᠭᠡᠢ ᠰᠢᠭ ᠲᠠᠩᠰᠤᠭ ᠡᠷᠳᠡᠮ ᠤᠨ ᠰᠢᠮᠡ ᠶᠢ | ᠶᠡᠭᠡ ᠳᠠᠨᠳᠠᠷ ᠬᠦᠷᠲᠡᠪᠡ | ᠳᠦᠮᠡᠨ ᠳᠦᠮᠡᠨ ᠬᠦᠯᠦᠭ ᠰᠢᠭ ᠠᠯᠠᠱᠠ ᠠᠭᠤᠯᠠ ᠴᠡᠩᠬᠡᠷᠯᠡᠬᠦ ᠪᠠᠷ ᠬᠠᠷᠠ ᠬᠥᠮᠥᠨ ᠰᠢᠭ ᠳᠠᠨᠳᠠᠷ ᠬᠠᠵᠠᠭᠤ | ᠵᠠᠮ ᠢᠶᠠᠷ ᠰᠠᠵᠢᠯᠠᠭᠰᠠᠨ ᠭᠡᠨᠡ | ᠳᠥᠴᠢᠨ ᠬᠤᠶᠠᠷᠳᠠᠢ ᠯᠠᠷᠭᠢᠨ ᠠᠭᠠᠷᠤ ᠲᠠᠶᠠᠭ ᠲᠠᠢ ᠪᠤᠴᠠᠬᠤ ᠪᠠᠷ ᠪᠣᠳᠠᠩ ᠠᠭᠤᠯᠠ ᠶᠢᠨ ᠰᠢᠯᠢ ᠳᠤ ᠬᠤᠶᠢᠳᠤ ᠶᠢᠨ | ᠢᠷᠥᠭᠡᠯ ᠨᠢ ᠰᠢᠩᠭᠡᠭᠰᠡᠨ ᠭᠡᠳᠡᠭ | ᠮᠦᠩᠭᠦᠨ ᠰᠠᠷᠠ ᠲᠠᠢ ᠤᠷᠴᠢᠯᠠᠩ ᠳᠤ ᠪᠢ ᠳᠠᠨᠳᠠᠷ ᠯᠾᠡᠷᠠᠮᠪᠠ ᠶᠢ ᠵᠡᠭᠦᠳᠥᠯᠡᠪᠡ | ᠮᠥᠩᠬᠡ ᠪᠤᠰᠤ ᠨᠠᠰᠤ ᠪᠠᠨ ᠪᠠᠷᠢᠨᠳᠠᠭᠳᠤ ᠰᠤᠳᠤᠷ ᠢᠶᠠᠷ ᠠᠳᠢᠰᠯᠠᠭᠤᠯᠤᠯᠠ ᠁ | ᠳᠤᠷᠤᠨᠠ ᠶᠢᠨ ᠭᠤᠪᠢ ᠳᠤ ᠭᠠᠭᠴᠠ ᠮᠤᠷᠢᠳᠠᠨ ᠶᠥᠷᠭᠡᠬᠦ ᠨᠢ ᠳᠤᠭᠰᠢᠨ ᠬᠤᠲᠤᠭᠳᠤ ᠷᠠᠪᠵᠠᠢ《ᠰᠠᠷᠠᠨ | ᠬᠥᠬᠦᠭᠡ》 ᠪᠠᠨ ᠳᠠᠭᠤᠯᠠᠭᠠ ᠶᠤᠮᠰᠢᠭ | ᠲᠤᠷᠤᠨᠠᠳᠠᠬᠢᠨ ᠤ ᠬᠤᠶᠠᠷ ᠮᠡᠷᠭᠡᠨ ᠬᠤᠨᠳᠠᠭᠠ ᠲᠤᠯᠭᠠᠨ ᠬᠠᠭᠤᠴᠢᠯᠠᠬᠤ ᠳᠤ ᠪᠠᠶᠠᠨ ᠰᠥᠮᠪᠥᠷ ᠤᠨ ᠡᠩᠭᠡᠷ ᠲᠤ ᠪᠠᠳᠠᠭ | ᠰᠢᠯᠥᠭ ᠨᠢ ᠦᠯᠡᠳᠡᠨᠡ | ᠲᠠᠯᠠᠨ ᠭᠤᠷᠪᠠ ᠲᠠᠢ ᠳᠠᠨᠳᠠᠷ᠂ ᠭᠤᠴᠢᠨ ᠨᠠᠢᠮᠠ ᠲᠠᠢ ᠷᠠᠪᠵᠠᠢ ᠨᠣᠮ ᠤᠨ ᠲᠠᠩᠭᠠᠷᠢᠭ ᠢᠶᠠᠷ ᠮᠥᠷᠬᠦᠬᠦ ᠳᠤ ᠡᠷᠲᠡᠨ ᠤ | ᠢᠷᠥᠭᠡᠯ ᠠᠮᠢᠯᠠᠨᠠ | ᠳᠠᠯᠳᠠ ᠶᠢᠨ ᠳᠠᠯᠳᠠ ᠠᠴᠠ᠂ ᠳᠠᠯᠳᠠ ᠶᠢᠨ ᠳᠠᠯᠳᠠ ᠠᠴᠠ ᠨᠢᠭᠡᠨ ᠣᠩᠭᠤᠳ ᠨᠠᠮᠠᠢᠢ ᠳᠠᠭᠤᠳᠠᠨ ᠰᠡᠷᠡᠬᠡᠬᠦ ᠡᠨᠡ | ᠰᠢᠯᠥᠭ ᠪᠢᠴᠢᠭᠳᠡᠨᠡ᠃ | ᠬᠤᠷᠠᠭᠠᠨ ᠡᠭᠦᠯᠡᠰ ᠤᠨ ᠴᠠᠭᠠᠨᠠᠬᠢ ᠨᠠᠷᠠᠨ ᠤ ᠭᠡᠭᠡᠨ ᠭᠡᠷᠡᠯ ᠰᠢᠭ ᠬᠤᠷᠮᠤᠰᠢᠨ ᠭᠡᠷ ᠤᠨ ᠬᠤᠶᠢᠮᠤᠷ ᠠᠯᠠᠱᠠ ᠴᠤᠷᠵᠢ | ᠵᠠᠯᠠᠷᠠᠨᠠ | ᠬᠤᠭᠤᠴᠢᠷ ᠱᠠᠨᠵᠠ ᠶᠢᠨ ᠡᠭᠡᠰᠢᠭᠡᠨ ᠳᠤ ᠥᠬᠢᠨ ᠪᠥᠷᠢᠯᠸᠠ ᠪᠥᠵᠢᠨ ᠬᠤᠳᠤᠭᠳᠤ ᠮᠡᠷᠭᠡᠨ ᠳᠠᠨᠳᠠᠷ ᠣᠩᠭᠤᠳ ᠤᠨ | ᠬᠤᠷᠠ ᠪᠠᠷ ᠤᠮᠳᠠᠯᠠᠨᠠ | ᠪᠤᠳᠢ ᠬᠥᠷᠥᠭᠡᠰᠥᠨ ᠤ ᠨᠢᠳᠥ ᠮᠡᠳᠥ ᠠᠮᠤᠷ ᠠᠮᠤᠭᠤᠯᠠᠩ ᠮᠤᠩᠭᠤᠯ ᠤᠷᠤᠨ ᠪᠣᠳ᠋ᠳ᠋ᠾᠨ ᠶᠢᠨ ᠱᠠᠰᠢᠨ ᠤ ᠤᠬᠠᠭᠠᠨ ᠳᠤ | ᠰᠡᠳᠬᠢᠯ ᠤᠨ ᠲᠠᠮᠢᠷ ᠢᠶᠠᠷ ᠪᠠᠳᠠᠷᠠᠨᠠ | ᠪᠤᠶᠠᠨ ᠢ ᠦᠨᠳᠥᠰᠥᠯᠡᠭᠴᠢ ᠰᠥᠮᠡ ᠶᠢᠨ ᠠᠯᠳᠠᠨ ᠭᠠᠨᠵᠢᠷᠠ ᠬᠢᠯᠠᠰᠥᠨ ᠪᠠᠭᠤᠵᠤ ᠮᠣᠷᠳᠠᠬᠤ ᠶᠢᠨ ᠴᠢᠯᠥᠭᠡᠨ ᠳᠤ | ᠥᠨᠡᠨ ᠤ ᠮᠥᠷ ᠢ ᠴᠠᠶᠢᠯᠭᠠᠨᠠ | ᠭᠤᠣᠯᠠ ᠶᠢᠨ ᠥᠨᠳᠥᠷ ᠠᠭᠤᠯᠠ ᠶᠢ ᠡᠭᠡᠰᠢᠭᠯᠡᠭᠦᠯᠥᠨ ᠡᠬᠢᠯᠡᠬᠦ ᠳᠤ ᠭᠤᠷᠪᠠᠨ ᠮᠠᠷᠠᠯ ᠤᠳᠤᠨ ᠲᠤᠭᠤᠨᠤ ᠭᠤᠣᠯᠯᠠᠨ | ᠬᠤᠨᠤᠭᠯᠠᠨᠠ | ᠬᠦᠨᠳᠥᠳᠥ ᠶᠡᠬᠡᠰ ᠳᠡᠮᠪᠡᠭᠡᠯᠡᠵᠤ ᠬᠤᠶᠢᠮᠤᠷᠯᠠᠨ《ᠬᠥᠮᠥᠨ ᠤ ᠶᠤᠰᠤᠨ ᠤ ᠪᠠᠶᠠᠷ ᠬᠤᠷᠢᠮ》ᠴᠠᠭ ᠤᠨ ᠬᠦᠷᠳᠥᠨ ᠳᠤ | ᠤᠷᠤᠰᠢᠨᠠ | ᠮᠢᠩᠭᠠᠨ ᠵᠤᠤ ᠶᠢᠨ ᠪᠠᠷᠠ ᠳᠤ ᠮᠢᠨᠤ ᠨᠤᠲᠤᠭ᠂ ᠳᠠᠨᠳᠠᠷ ᠤᠨ ᠨᠤᠲᠤᠭ ᠮᠢᠷᠠᠯᠵᠠᠨ ᠪᠠᠳᠠᠷᠠᠭᠰᠠᠨ ᠵᠤᠯᠠ ᠶᠢᠨ | ᠭᠡᠷᠡᠯ ᠠᠴᠠ ᠴᠤ ᠲᠤᠳᠤᠬᠠᠨ | ᠨᠠᠶᠠ ᠲᠠᠢ ᠪᠤᠭᠤᠷᠤᠯ ᠡᠪᠥᠭᠡᠨ ᠨᠠᠮᠢᠷᠠᠭᠰᠠᠨ ᠰᠠᠬᠠᠯ ᠢᠶᠠᠨ ᠰᠢᠪᠳᠤᠷᠬᠤ ᠳᠤ《ᠬᠡᠯᠡᠨ ᠤ ᠴᠢᠮᠡᠭ》ᠳᠡᠯᠭᠡᠷᠡᠨᠡ | ᠠᠯᠠᠱᠠ ᠯᠾᠷᠠᠮᠪᠠ ᠳᠠᠨᠳᠠᠷ ᠰᠥᠨᠢ ᠶᠢᠨ ᠵᠡᠬᠦᠳᠤᠨ ᠳᠤ ᠢᠷᠡᠨᠡ | ᠠᠷᠴᠠ ᠲᠠᠢ ᠠᠭᠤᠯᠠᠰ ᠤᠨ ᠡᠩᠭᠡᠷ ᠢᠶᠠᠷ ᠠᠶᠢᠪᠤᠭᠤ ᠲᠠᠶᠢᠪᠤᠭᠤ ᠠᠯᠬᠤᠯᠠᠨᠠ ᠁ | ᠴᠠᠰᠥᠲᠤ ᠶᠢᠨ ᠥᠨᠳᠥᠷ ᠰᠠᠭᠤᠳᠠᠯ ᠳᠠᠨᠳᠠᠷ ᠠᠴᠠ ᠰᠥᠷᠳᠡᠳᠡᠭ ᠭᠡᠪᠡ ᠤᠤ | ᠴᠠᠭᠠᠨ ᠪᠤᠭᠤᠷᠤᠯ ᠪᠠᠭᠰᠢ ᠲᠠᠨᠢ ᠳᠠᠷᠤᠤ ᠪᠠᠶᠢᠬᠤ ᠶᠢ ᠰᠤᠷᠭᠠᠭᠰᠠᠨ ᠭᠡᠪᠡ ᠤᠤ | ᠲᠠᠪᠤᠨ ᠬᠠᠷᠠ ᠢᠮᠠᠭᠠ ᠨᠢ ᠪᠠᠶᠠᠠᠭᠤᠤᠯ ᠤᠨ ᠬᠥᠨᠳᠡᠢ ᠳᠤ ᠪᠡᠯᠴᠢᠳᠡᠭ ᠭᠡᠪᠡ ᠤᠤ | ᠲᠤᠭᠠ ᠶᠢ ᠨᠢ ᠪᠢ ᠲᠠᠩᠴᠢ ᠣᠯᠵᠣ ᠴᠢᠳᠠᠭᠰᠠᠨ ᠦᠭᠡᠢ ᠁ | ᠮᠤᠳᠤ ᠲᠤᠯᠤᠭᠠᠢ ᠪᠠᠨ ᠲᠣᠭᠤᠨᠤᠨ ᠭᠡᠷᠡᠯ ᠳᠤ ᠲᠤᠬᠤᠳᠠᠭ ᠭᠡᠪᠡ ᠤᠤ | ᠮᠣᠩᠭᠤᠯ ᠭᠡᠷ ᠠᠴᠠ ᠪᠢ ᠳᠠᠩᠴᠢ ᠭᠡᠷᠡᠯ ᠣᠯᠵᠣ ᠬᠠᠷᠠᠭᠰᠠᠨ ᠦᠭᠡᠢ ᠁ | ᠡᠪᠥᠭᠡᠷᠡᠴᠢᠬᠡᠭᠡᠳ ᠷᠠᠪᠵᠠᠢ ᠲᠠᠢ ᠬᠤᠨᠳᠠᠭᠠ ᠲᠤᠯᠭᠠᠵᠤ ᠪᠠᠶᠢᠭᠰᠠᠨ《 ᠳᠠᠩ ᠴᠠᠭᠠᠰᠥᠨ ᠤ ᠴᠠᠭᠠᠨᠠᠬᠢ ᠳᠠᠨᠳᠠᠷ | ᠪᠠᠨᠳᠢ》 | ᠳᠥᠷᠥᠯᠵᠢ ᠶᠢᠨ ᠲᠣᠯᠤᠭᠠᠳ ᠲᠤ ᠨᠠᠮᠠᠢᠢ ᠲᠥᠭᠡᠷᠢᠬᠦᠯᠴᠢᠭᠡᠭᠡᠳ ᠤᠳᠤᠨᠠ | ᠥᠷᠯᠥᠭᠡ ᠰᠡᠷᠢᠬᠦ ᠳᠤ ᠮᠥᠷ ᠨᠢ ᠪᠦᠯᠢᠶᠡᠬᠡᠨ ᠪᠠᠶᠢᠪᠠ᠂ | ᠵᠡᠭᠦᠨ ᠬᠡᠶᠢᠳ ᠢ ᠲᠠᠮᠠᠬᠢᠨ ᠤᠳᠤᠭᠠ ᠪᠠᠷ ᠷᠠᠪᠠᠨᠢᠯᠠᠵᠦ ᠪᠠᠶᠢᠭᠰᠠᠨ《ᠵᠤᠳᠠᠭ ᠦᠭᠡᠢ》 ᠪᠤᠭᠤᠷᠤᠯ ᠡᠪᠥᠭᠡᠨ | ᠪᠠᠶᠠᠠᠭᠤᠤᠯ ᠤᠨ ᠬᠥᠨᠳᠡᠢ ᠳᠤ ᠨᠠᠮᠠᠢᠢ ᠤᠷᠬᠢᠭᠠᠳ ᠪᠤᠴᠠᠨᠠ | ᠵᠡᠭᠦᠳᠥᠯᠡᠭᠡᠳ ᠰᠡᠷᠢᠬᠦ ᠳᠤ ᠥᠨᠡᠰᠥ ᠨᠢ ᠪᠥᠯᠢᠶᠡᠬᠡᠨ ᠪᠠᠶᠢᠪᠠ᠃ | ᠰᠠᠷᠠᠨ ᠲᠤᠩᠭᠠᠯᠠᠭ ᠰᠥᠨᠢ ᠪᠢ ᠳᠠᠨᠳᠠᠷ ᠯᠾᠠᠷᠠᠮᠪᠠ ᠲᠠᠢ ᠵᠤᠯᠭᠠᠨᠠ | ᠠᠯᠢ ᠴᠤ ᠰᠥᠨᠢ ᠠᠴᠠ ᠲᠤᠩᠭᠠᠯᠠᠭ ᠠᠷᠪᠠᠳ ᠤᠨ ᠰᠠᠷᠠ ᠲᠠᠢ ᠵᠤᠯᠭᠠᠨᠠ᠂ | ᠬᠠᠷᠠ ᠬᠠᠷᠠᠬᠠᠨ ᠠᠭᠤᠯᠠᠰ ᠲᠡᠨᠳᠡ ᠰᠥᠨᠳᠡᠷᠯᠡᠭᠡᠳ ᠯᠡ ᠁ | ᠬᠠᠪ ᠬᠠᠵᠠᠭᠤ ᠳᠤ ᠳᠠᠨᠳᠠᠷ ᠪᠠᠨᠳᠢ ᠰᠢᠯᠥᠭᠯᠡᠭᠡᠳ ᠯᠡ ᠁ | ᠨᠠᠮᠬᠠᠨ ᠪᠤᠷᠤ ᠲᠤᠯᠤᠭᠠᠳ ᠲᠤ ᠨᠠᠶᠢᠷᠠᠭ᠂ ᠨᠤᠳᠤᠭ ᠬᠤᠶᠠᠷ ᠢᠶᠠᠨ ᠬᠠᠭᠤᠴᠢᠯᠠᠵᠤ ᠰᠠᠭᠤᠬᠤ ᠳᠤ | ᠨᠠᠮᠤᠷ ᠤᠨ ᠰᠥᠨᠢ ᠶᠢᠨ ᠰᠠᠷᠠ ᠬᠤᠨᠳᠠᠭᠠ ᠳᠠᠷᠠᠰᠤᠨ ᠳᠤ ᠰᠤᠭᠳᠤᠭᠰᠠᠨ ᠪᠠᠶᠢᠯᠠ᠃ | ᠪᠠᠶᠠᠨᠨᠢᠷᠤᠭᠤᠨ ᠤ ᠨᠠᠯᠠᠷᠬᠠᠢ ᠡᠪᠡᠰᠥ ᠪᠠᠷ ᠪᠠᠳᠠᠭ ᠰᠢᠯᠥᠭ ᠥᠨᠡᠭᠡᠴᠢᠯᠡᠵᠤ ᠪᠢ ᠥᠭᠢᠷᠡᠭᠰᠡᠨ ᠮᠣᠳᠤᠨ ᠤ ᠳᠣᠣᠷᠠ | ᠤᠴᠢᠨᠠ | ᠤᠭ ᠨᠢ ᠲᠡᠷᠡ ᠳᠠᠨᠳᠠᠷ ᠪᠠᠨᠳᠢ ᠶᠢᠨ ᠲᠣᠭᠯᠠᠵᠤ ᠥᠰᠥᠭᠰᠡᠨ ᠵᠤᠯᠵᠠᠭᠠᠨ ᠲᠣᠣᠷᠠᠢ ᠪᠠᠶᠢᠵᠠᠢ᠃ | ᠪᠣᠷᠪᠢ ᠮᠥᠷᠥᠯᠡᠭᠰᠡᠨ ᠳᠠᠨᠳᠠᠷ ᠤᠰᠤ ᠪᠠᠨ ᠳᠤᠰᠤᠯᠠᠭᠤᠯᠤᠭᠰᠠᠭᠠᠷ ᠭᠡᠷ ᠤᠨ ᠢᠶᠠᠨ ᠬᠠᠶᠠᠭᠠᠨ ᠳᠤ ᠢᠷᠡᠨᠡ | ᠮᠢᠨᠤ ᠯᠡ ᠤᠤᠭᠤᠵᠤ ᠠᠮᠰᠠᠬᠤ ᠤᠴᠢᠷᠳᠠᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠷᠠᠰᠢᠶᠠᠨ ᠪᠠᠶᠢᠵᠠᠢ᠃ | ᠰᠠᠷᠠᠨ ᠲᠤᠩᠭᠠᠯᠠᠭ ᠰᠥᠨᠢ ᠪᠢ ᠳᠠᠨᠳᠠᠷ ᠪᠠᠨᠳᠢ ᠲᠠᠢ ᠵᠤᠯᠭᠠᠨᠠ | ᠰᠠᠷᠠᠯ ᠬᠥᠬᠡ ᠲᠡᠭᠷᠢ ᠶᠢᠨ ᠳᠤᠤᠷᠠ ᠡᠨᠡ ᠵᠣᠯᠭᠠᠯᠳᠠ ᠤᠳᠠᠭᠠ ᠦᠭᠡᠢ ᠁ | (ᠵᠣᠬᠢᠶᠠᠭᠴᠢ᠄ ᠰᠠᠷᠠᠨᠲᠤᠩᠭᠠᠯᠠᠭ) |