ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠢᠨ᠎ᠡ ᠬᠦᠳᠡᠭᠡ
ᠦᠢᠯᠡᠴᠢᠯᠡᠭᠡ
ᠪᠣᠲᠣᠭᠤᠨ ᠪᠣᠶᠢᠯᠠᠭᠠᠨ
ᠪᠦᠬᠡ ᠱᠠᠯᠪᠢᠩ ︵ᠠᠷᠪᠠᠨ ᠭᠤᠷᠪᠠ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/7/4
   ᠠᠷᠪᠡᠨ ᠭᠤᠷᠪᠠ ᠡᠵᠢ ᠪᠠᠨ ᠡᠭᠦᠷᠴᠦ ᠡᠯᠡᠰᠦ ᠮᠡᠩᠬ᠎ᠠ ᠶᠢ ᠲᠤᠭᠤᠯᠪᠠ    ᠪᠠᠰᠠ ᠨᠢᠭᠡᠨ ᠲᠤᠮᠤᠭ ᠶᠠᠷᠢᠶᠡᠨ ᠎ ᠳᠤ ᠪᠦᠬᠡ ᠱᠠᠯᠪᠢᠩ ᠡᠵᠢ  ᠪᠠᠨ ᠡᠭᠦᠷᠦᠭᠡᠳ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠭᠡᠳᠡᠭ᠃    ᠠᠯᠠᠱᠠ ᠬᠠᠶᠢᠷᠬᠠᠨ ᠤ ᠪᠠᠷᠠᠭᠤᠨ ᠬᠤᠷᠮᠤᠢ᠂ ᠲᠡᠭᠷᠢ ᠡᠯᠡᠰᠦᠨ ᠤ ᠵᠡᠭᠦᠨ ᠵᠠᠬ᠎ᠠ ᠪᠠᠷ ᠪᠠᠶᠢᠷᠢᠯᠡᠨ ᠤᠷᠤᠰᠢᠵᠤ ᠪᠠᠶᠢᠭ᠎ᠠ ᠭᠦᠪᠡᠭᠡᠨᠠᠮᠭ᠎ᠠ ᠪᠠᠭ ᠤᠨ ᠨᠠᠮᠤᠭ ᠤᠰᠤᠨ ᠨᠢ ᠰᠠᠶᠢᠨ᠂ ᠡᠪᠡᠰᠦ ᠤᠷᠭᠤᠮᠠᠯ ᠢᠶᠠᠷ ᠰᠤᠷᠭᠤᠭ ᠪᠡᠯᠴᠢᠭᠡᠷ ᠲᠤ ᠨᠡᠭᠦᠳᠡᠯᠯᠡᠨ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠱᠠᠯᠪᠢᠩ ᠲᠡᠮᠡᠭᠡᠨ ᠰᠦᠷᠦᠭ ᠢᠶᠠᠨ ᠪᠡᠯᠴᠢᠭᠡᠷᠯᠡᠭᠦᠯᠵᠦ ᠪᠠᠶᠢᠪᠠ᠃ ᠰᠦᠷᠦᠭ ᠢᠶᠠᠨ ᠮᠠᠨᠠᠭᠰᠠᠨ ᠪᠤᠭᠤᠴᠢᠶ᠎ᠡ ᠲᠠᠢ ᠭᠦᠷᠡᠩ ᠤᠯᠠᠭᠠᠨ ᠪᠤᠤᠷ᠎ᠠ ᠭᠡᠨᠡᠳᠭᠡᠨ ᠴᠢᠨ᠋ᠸ᠎ᠠ ᠦᠵᠡᠭᠰᠡᠨ ᠰᠢᠭ ᠭᠦᠭᠡᠰᠦ ᠪᠤᠷᠭᠢᠭᠤᠯᠤᠨ ᠭᠦᠷᠴᠢᠬᠢᠨᠠᠵᠦ᠂ ᠰᠢᠭᠡᠰᠦ ᠰᠠᠪᠢᠷᠠᠭᠤᠯᠤᠨ ᠱᠠᠪᠢᠭᠠᠳ ᠪᠤᠲᠠ ᠨᠤᠤᠷᠠᠨ ᠭᠦᠯᠪᠡᠷᠢᠬᠦ ᠳᠤ ᠪᠤᠰᠤᠳ ᠲᠡᠮᠡᠭᠡᠳ ᠨᠢ ᠰᠤᠴᠢᠨ ᠪᠦᠭᠡᠮᠨᠡᠷᠡᠭᠰᠡᠨ ᠢᠶᠠᠨ ᠲᠡᠷᠭᠡᠳᠡᠭᠦᠷ ᠠᠭᠠᠵᠢᠮ ᠢᠶᠠᠷ ᠦᠩᠭᠡᠷᠡᠵᠦ ᠶᠠᠪᠤᠭ᠎ᠠ ᠦᠷᠭᠦᠪᠡᠯ ᠴᠦ ᠦᠷᠭᠦᠮᠡᠷ ᠲᠦᠩᠬᠦ᠋ᠢᠭᠰᠡᠨ ᠶᠡᠭᠡ ᠡᠭᠦᠷᠭᠡ ᠲᠠᠢ ᠭᠦᠮᠦᠨ ᠢ ᠬᠤᠰᠢᠭᠤᠷᠡᠨ ᠲᠠᠭᠠᠵᠦ ᠰᠡᠷᠳᠡᠭᠡᠨᠡᠨ᠎ᠡ᠃ ᠦᠷᠭᠦᠭᠡᠭᠰᠡᠨ ᠭᠦᠮᠦᠨ ᠨᠢ ᠡᠰᠡ ᠮᠡᠳᠡᠭᠰᠡᠨ ᠢᠶᠠᠷ ᠶᠠᠪᠤᠭᠰᠠᠭᠠᠷ ᠪᠠᠶᠢᠬᠤ ᠳᠤ ᠦᠷᠭᠦᠭᠰᠡᠨ ᠲᠡᠮᠡᠭᠡ ᠨᠦᠭᠦᠳ ᠴᠦ ᠭᠠᠶᠢᠬᠠᠨ ᠬᠠᠷᠠᠵᠠᠭᠠᠵᠤ ᠡᠭᠦᠷᠭᠡᠨ ᠭᠤᠣᠯ ᠳᠠᠬᠢ ᠡᠬᠡᠨᠡᠷ ᠭᠦᠮᠦᠨ ᠤ ᠭᠠᠷ ᠬᠤᠷᠦ᠋ᠢᠯᠠᠭᠰᠠᠨ ᠲᠠᠭᠤ ᠲᠠᠢ ᠲᠤᠬᠢᠶ᠎ᠡ ᠲᠠᠢ ᠠᠭᠤᠵᠢᠷᠠᠭᠰᠠᠨ ᠭᠡᠯᠳᠡᠢ ᠭᠦᠵᠦᠭᠦᠦ ᠰᠤᠩᠭᠠᠨ ᠦᠨᠦᠷᠯᠡᠭᠰᠡᠭᠡᠷ ᠬᠤᠴᠤᠷᠤᠯ᠎ᠠ᠃    ᠡᠭᠦᠷᠭᠡᠴᠢᠨ ᠭᠦᠮᠦᠨ ᠨᠢ ᠬᠠᠷᠢᠨ ᠱᠠᠯᠪᠢᠩ ᠪᠠᠶᠢᠵᠦ ᠪᠢᠯᠡ᠃ ᠴᠡᠭᠡᠵᠢᠨ ᠭᠡᠷ ᠢᠶᠠᠨ ᠪᠦᠬᠦ ᠬᠤᠭᠰᠢᠯ ᠲᠠᠢ ᠨᠢ ᠲᠦᠷᠪᠡᠯᠵᠢᠨ ᠪᠠᠭᠯᠠᠵᠤ ᠲᠡᠭᠡᠷ᠎ᠡ ᠨᠢ ᠡᠵᠢ ᠪᠠᠨ ᠰᠠᠭᠤᠯᠭᠠᠭᠠᠳ ᠡᠭᠦᠷᠴᠦ ᠶᠠᠪᠤᠭ᠎ᠠ ᠡᠨ᠋ᠨ ᠡᠷ᠎ᠡ᠂ ᠨᠠᠮᠬᠠᠢ ᠶᠢᠨ ᠬᠢᠨ ᠠᠴᠠ ᠭᠠᠷᠴᠦ ᠭᠡᠳᠦᠨ ᠬᠤᠨᠤᠭ ᠠᠶᠠᠯᠠᠭᠠᠳ ᠲᠡᠭᠷᠢ ᠡᠯᠡᠰᠦ ᠶᠢ ᠭᠦᠪᠡᠭᠡᠯᠡᠨ ᠠᠳᠡ ᠢᠷᠡᠵᠡᠢ᠃ ᠰᠦᠨᠢ ᠪᠠᠷ ᠡᠵᠢ ᠪᠠᠨ ᠲᠠᠭᠠᠭᠤᠯᠵᠤ ᠭᠠᠷᠤᠭᠠᠳ ᠵᠤᠭᠰᠤᠯ ᠦᠭᠡᠢ ᠠᠶᠠᠯᠠᠵᠤ ᠦᠷᠯᠦᠭᠡ ᠪᠤᠯᠬᠤ ᠳᠤ ᠡᠵᠢ ᠶᠢᠨ ᠢᠶᠠᠨ ᠶᠠᠳᠠᠷᠠᠵᠤ ᠲᠦᠢᠯᠳᠠᠭᠰᠠᠨ ᠢ ᠬᠠᠷᠠᠭᠠᠳ ᠡᠭᠦᠷᠭᠡᠨ ᠭᠤᠣᠯ ᠳᠤ ᠠᠯᠪᠠ ᠪᠠᠷ ᠰᠠᠭᠤᠯᠭᠠᠵᠤ᠂ ᠦᠷᠭᠦᠯᠵᠢᠯᠡᠨ ᠵᠡᠮ ᠢᠶᠠᠨ ᠬᠦᠭᠡᠭᠡᠭᠰᠡᠨ ᠪᠠᠶᠢᠵᠡᠢ᠃    ᠬᠤᠮ ᠠᠴᠢᠶ᠎ᠡ ᠲᠠᠢ ᠲᠡᠮᠡᠭᠡᠨ ᠨᠢᠷᠤᠭᠤᠨ ᠲᠡᠭᠡᠷ᠎ᠡ ᠰᠠᠭᠤᠭᠰᠠᠨ ᠰᠢᠭ᠋ ᠲᠠᠭᠠᠲᠠᠢ ᠰᠠᠨᠠᠭᠳᠠᠪᠠᠴᠤ ᠬᠤᠶᠡᠷ ᠲᠡᠮᠡᠭᠡᠨ ᠳᠤ ᠠᠴᠢᠮᠡᠷ ᠭᠡᠳᠦᠨ ᠵᠠᠭᠤᠨ ᠵᠢᠩ ᠢ ᠡᠭᠦᠷᠦᠭᠰᠡᠨ ᠬᠦᠦ ᠳᠡᠭᠡᠨ ᠲᠠᠷᠤᠭᠠᠰᠦ ᠨᠠᠮᠡᠨ ᠶᠠᠪᠤᠭ᠎ᠠ ᠡᠬᠡ ᠶᠢᠨ ᠰᠡᠳᠬᠢᠯ᠂ ᠡᠷᠬᠡ ᠦᠭᠡᠢ ᠤᠶᠠᠷᠠᠨ ᠪᠠᠶᠢᠨ ᠪᠠᠶᠢᠨ ᠨᠢᠯᠪᠤᠰᠦ ᠪᠠᠨ ᠠᠷᠴᠢᠵᠦ ᠡᠭᠦᠷᠭᠡ ᠠᠴᠠ ᠪᠠᠨ ᠪᠠᠭᠤᠬᠤ ᠶᠢ ᠠᠬᠢᠨ ᠲᠠᠬᠢᠨ ᠱᠠᠭᠠᠷᠳᠠᠪᠠᠴᠦ ᠬᠦᠦ ᠨᠢ ᠴᠢᠬᠢ ᠦᠭᠡᠢ ᠰᠢᠭ ᠠᠭᠤᠯᠠ ᠲᠡᠯ᠎ᠠ᠂ ᠡᠯᠡᠰᠦ ᠮᠠᠩᠬ᠎ᠠ ᠶᠢ ᠲᠤᠭᠤᠴᠢᠨ ᠨᠢᠭᠡᠨ ᠠᠮᠢᠰᠬᠤᠭ᠎ᠠ ᠪᠠᠷ ᠠᠯᠬᠤᠭᠰᠠᠭᠠᠷ ᠪᠠᠶᠢᠵᠡᠢ᠃ ᠦᠷᠯᠦᠭᠡ ᠪᠠᠷ ᠶᠠᠪᠤᠬᠤ ᠶᠢᠨ ᠠᠯᠳᠠᠰ ᠡᠬᠡ ᠬᠦᠦ ᠬᠤᠶᠡᠷ ᠤᠨ ᠲᠤᠮᠳᠠ ᠡᠭᠦᠷᠬᠦ ᠪᠠ ᠠᠯᠬᠤᠬᠤ ᠶᠢᠨ ᠮᠠᠷᠭᠤᠭᠠᠨ ᠪᠣᠯᠳᠠᠭ ᠴᠦ ᠬᠦᠦ ᠨᠢ ᠭᠦᠴᠦ ᠪᠠᠷ ᠲᠦᠷᠢᠵᠦ᠂ ᠡᠬᠡ ᠪᠠᠨ ᠡᠷᠭᠦᠵᠦ ᠡᠭᠦᠷᠦᠭᠰᠡᠭᠡᠷ ᠶᠠᠪᠤᠭ᠎ᠠ ᠢ ᠡᠨ᠋ᠨ ᠪᠢᠯᠡ᠃ ᠲᠠᠪᠢ ᠭᠠᠷᠤᠢ ᠨᠠᠰᠦᠨ ᠤ ᠲᠦᠷᠦᠭᠡ ᠰᠢᠭᠦᠷᠡᠵᠦ ᠶᠠᠪᠤᠭ᠎ᠠ ᠡᠬᠡ ᠨᠢ ᠲᠠᠷᠳᠠᠬᠤ ᠪᠤᠯᠤᠭ᠎ᠠ ᠦᠭᠡᠢ ᠴᠦ ᠬᠦᠦ ᠶᠢᠨ ᠢᠶᠠᠨ ᠠᠶ᠎ᠠ ᠪᠠᠷ ᠭᠦᠯ ᠠᠮᠠᠷᠠᠨ ᠪᠠᠶᠢᠬᠤ ᠨᠢ ᠵᠤᠪᠠᠯᠠᠩ ᠤᠨ ᠲᠣᠮᠳᠠ ᠠᠴᠠ ᠵᠠᠪᠰᠢᠵᠤ ᠪᠠᠶᠢᠭ᠎ᠠ ᠵᠢᠷᠭᠠᠯ ᠤᠨ ᠨᠢᠭᠡᠨ ᠪᠤᠶᠤ᠃ ᠭᠡᠪᠡᠴᠦ ᠡᠨ᠋ᠨ ᠪᠣᠯ ᠬᠦᠦ ᠶᠢᠨ ᠢᠶᠠᠨ ᠬᠠᠮᠳᠤ ᠮᠦᠷᠦᠭᠡᠳᠦᠨ ᠪᠠᠶᠢᠭ᠎ᠠ ᠠᠰᠢᠳᠠ ᠶᠢᠨ ᠵᠢᠷᠭᠠᠯ ᠪᠢᠰᠢ ᠭᠡᠳᠡᠭ ᠢ ᠡᠬᠡ ᠨᠢ ᠮᠡᠳᠡᠷᠡᠭᠰᠡᠨ ᠳᠡᠭᠡᠨ ᠲᠤᠭᠳᠠᠵᠤ ᠶᠠᠳᠡᠨ ᠪᠠᠶᠢᠪᠠᠴᠦ ᠬᠦᠦ ᠨᠢ ᠠᠴᠢᠲᠦ ᠡᠵᠢ ᠶᠢᠨ ᠠᠴᠢ ᠶᠢ ᠬᠠᠷᠢᠭᠤᠯᠵᠤ ᠪᠠᠶᠢᠭ᠎ᠠ ᠭᠡᠵᠦ ᠪᠤᠳᠤᠵᠤ ᠪᠠᠶᠢᠵᠡᠢ᠃    ᠬᠤᠷᠸ᠎ᠠ ᠶᠢᠨ ᠤᠯᠠᠩᠬᠢ ᠨᠢ ᠬᠤᠭᠤᠰᠤᠨ ᠶᠠᠳᠠᠭᠤᠴᠤᠳ ᠪᠠᠶᠢᠵᠦ ᠲᠣᠭᠠᠨ ᠤ ᠤᠯᠠᠨ ᠢᠶᠠᠷ ᠡᠵᠡᠯᠡᠨ ᠪᠠᠶᠢᠪᠠᠴᠦ ᠵᠠᠶᠠᠭ᠎ᠠ ᠴᠢᠨᠢ ᠲᠡᠷᠨ ᠭᠡᠵᠦ ᠪᠤᠷᠬᠠᠨ ᠲᠡᠭᠷᠢ ᠨᠤᠮᠯᠠᠵᠤ᠂ ᠬᠠᠤᠯᠢ ᠪᠠᠷ ᠲᠤᠭᠳᠠᠭᠠᠭᠰᠠᠨ ᠢ ᠶᠠᠭᠠᠬᠢᠯᠲᠠᠢ ᠪᠤᠢ︖ ᠨᠠᠷᠠ ᠲᠠᠢ ᠬᠤᠷᠸ᠎ᠠ ᠶᠢᠨ ᠡᠳᠦᠷ ᠰᠦᠨᠢ ᠶᠢᠨ ᠡᠭᠡᠯᠵᠢ ᠬᠡᠨ ᠳᠤ ᠴᠦ ᠠᠳᠠᠯᠢᠬᠠᠨ ᠬᠤᠪᠢ ᠲᠡᠭᠰᠢ ᠤᠨᠤᠭᠳᠠᠵᠤ ᠪᠠᠶᠢᠳᠠᠭ ᠶᠤᠮ᠃ ᠨᠠᠮᠬᠠᠢ ᠴᠢᠮ᠎ᠡ ᠳᠤ ᠪᠠᠶᠡᠨ ᠢᠶᠠᠨ ᠭᠠᠶᠢᠬᠠᠭᠤᠯᠵᠤ ᠬᠢᠬᠠᠬᠤ ᠡᠳᠦᠷ ᠪᠠᠶᠢᠬᠤ ᠳᠤ ᠱᠠᠯᠪᠢᠩ ᠨᠠᠳᠠ ᠵᠣᠷᠢᠭ ᠢᠶᠠᠨ ᠭᠠᠶᠢᠬᠠᠭᠤᠯᠵᠤ ᠬᠠᠷᠢᠭᠤ ᠪᠠᠨ ᠪᠠᠷᠢᠬᠤ ᠡᠳᠦᠷ ᠯᠠᠪ ᠪᠤᠢ᠃ ᠦᠬᠢᠨ ᠤ ᠴᠢᠨᠢ ᠪᠡᠶ᠎ᠡ ᠠᠷᠪᠠᠭ᠋ᠠᠨ ᠪᠣᠳᠠ ᠶᠢᠨ ᠦᠨ᠎ᠡ ᠲᠠᠢ ᠪᠣᠯ ᠱᠠᠯᠪᠢᠩ ᠮᠢᠨᠦ ᠡᠷ᠎ᠡ ᠵᠣᠷᠢᠭ ᠵᠠᠭᠤᠨ ᠲᠡᠬᠢᠨ ᠢᠶᠠᠷ ᠵᠤᠭᠰᠤᠬᠤ ᠦᠭᠡᠢ ᠭᠡᠰᠡᠨ ᠢ ᠡᠷᠳᠠ ᠤᠷᠣᠢ ᠦᠭᠡᠢ ᠮᠡᠳᠡᠭᠦᠯᠬᠦ ᠰᠠᠨ᠃ ᠴᠢᠨᠦ ᠨᠠᠷᠠ ᠡᠷᠳᠠ ᠪᠠᠶᠢᠨ᠎ᠠ ᠤᠤ᠂ ᠮᠢᠨᠤ ᠨᠠᠷᠠ ᠡᠷᠳᠠ ᠪᠠᠶᠢᠨ᠎ᠠ ᠤᠤ᠂ ᠬᠦᠯᠢᠶᠡᠵᠦ ᠪᠠᠢ᠃ ᠬᠦᠬᠡ ᠲᠡᠭᠷᠢ ᠨᠢᠳᠦ ᠦᠭᠡᠢ ᠴᠦ ᠭᠦᠮᠦᠨ ᠤ ᠬᠦᠦ ᠶᠢᠨ ᠭᠡᠯᠡᠭᠰᠡᠨ ᠢ ᠭᠡᠷᠡᠴᠢᠯᠡᠬᠦ ᠡᠳᠦᠷ ᠯᠠᠪ ᠪᠣᠢ᠃    — ᠭᠦᠪᠡᠭᠦᠨ ᠮᠢᠨᠢ ᠶᠠᠳᠠᠷᠡᠵᠦ ᠪᠠᠶᠢᠭ᠎ᠠ ᠤᠤ︖ ᠭᠡᠰᠡᠨ ᠡᠬᠡ ᠶᠢᠨ ᠦᠭᠡᠨ ᠳᠤ ᠪᠤᠳᠤᠯ ᠲᠠᠰᠤᠯᠤᠭᠳᠠᠵᠤ᠂ ᠡᠭᠦᠷᠭᠡ ᠪᠠᠨ ᠲᠠᠯᠪᠢᠭᠠᠳ᠂ ᠡᠵᠢ ᠪᠠᠨ ᠲᠦᠰᠢᠵᠦ ᠪᠠᠭᠤᠯᠭᠠᠨ᠎ᠠ᠃    — ᠲᠡᠮᠡᠭᠡ ᠲᠤᠭᠳᠠᠭᠰᠠᠨ ᠪᠤᠶᠠᠨ ᠲᠠᠢ ᠭᠠᠵᠡᠷ ᠪᠠᠶᠢᠨ᠎ᠠ᠂ ᠬᠤᠨᠤᠭᠠᠳ ᠶᠠᠪᠤᠶ᠎ᠠ ᠭᠡᠵᠦ ᠡᠵᠢ ᠨᠢ ᠭᠡᠯᠡᠭᠡᠳ ᠲᠦᠯᠡᠰᠢ ᠴᠤᠭᠯᠠᠭᠤᠯᠤᠨ ᠶᠠᠭᠠᠷᠠᠬᠤ ᠳᠤ ᠬᠦᠦ ᠨᠢ ᠭᠡᠳᠠ ᠴᠤᠬᠢᠵᠦ ᠭᠠᠯ ᠢᠶᠠᠨ ᠰᠢᠲᠠᠭᠠᠪᠠ᠃    — ᠡᠵᠢ ᠲᠠ ᠠᠳᠠ ᠰᠠᠭᠤᠭᠠᠳ ᠴᠠᠢ ᠴᠢᠨᠡᠵᠦ ᠪᠠᠶᠢᠨ᠎ᠠ ᠤᠤ᠂ ᠪᠢ ᠲᠦᠯᠡᠭᠡ ᠲᠡᠭᠦᠵᠦ ᠢᠷᠡᠭᠡᠳ ᠭᠡᠷ ᠢᠶᠠᠨ ᠪᠠᠷᠢᠶ᠎ᠡ ᠭᠡᠳ ᠪᠤᠵᠢᠭᠢᠨᠠᠭᠰᠠᠨ ᠱᠠᠯᠪᠢᠩ ᠲᠦᠳᠡᠭᠡᠨ ᠵᠠᠭᠤᠷ᠎ᠡ ᠲᠡᠷᠡ ᠪᠦᠬᠦᠨ ᠢ ᠭᠦᠢᠴᠡᠯᠳᠦᠭᠦᠯᠵᠦ᠂ ᠭᠡᠷ ᠳᠡᠭᠡᠨ ᠰᠠᠭᠤᠭᠠᠳ ᠴᠠᠶᠢᠯᠠᠵᠤ ᠡᠬᠢᠯᠡᠯ᠎ᠡ᠃    — ᠠᠭᠤᠯᠡᠨ ᠳᠤ ᠭᠦᠲᠦᠯ ᠲᠠᠢ᠂ ᠡᠯᠡᠰᠦᠨ ᠳᠤ ᠭᠠᠷᠤᠯᠭ᠎ᠠ ᠲᠠᠢ ᠭᠡᠳᠡᠭ ᠶᠤᠮ᠃ ᠡᠨ᠋ᠨ ᠶᠡᠭᠡ ᠡᠯᠡᠰᠦᠨ ᠲᠠᠯᠠᠢ ᠶᠢᠨ ᠭᠠᠷᠤᠯᠭ᠎ᠠ ᠨᠢ ᠬᠠᠮᠢᠭ᠎ᠠ ᠪᠠᠨ ᠪᠠᠶᠢᠳᠠᠭ ᠪᠣᠯ ᠭᠡᠵᠦ ᠡᠵᠢ ᠨᠢ ᠰᠠᠨᠠᠭᠠᠰᠢᠷᠡᠨ ᠪᠠᠶᠢᠪᠠ᠃    — ᠭᠠᠷᠤᠯᠭ᠎ᠠ ᠪᠠᠷ ᠶᠠᠪᠤᠬᠤ ᠦᠭᠡᠢ ᠴᠦ ᠭᠡᠰᠡᠨ ᠶᠠᠪᠠᠭᠠᠨ ᠭᠦᠮᠦᠨ ᠪᠢᠳᠡᠬᠦᠳᠡᠬᠦ ᠦᠭᠡᠢ ᠪᠠᠶᠢᠯᠭᠦᠢ᠃ ᠵᠠᠮ ᠲᠠᠢ ᠴᠦ ᠡᠯᠡᠰᠦ᠂ ᠵᠠᠮ ᠦᠭᠡᠢ ᠴᠦ ᠡᠯᠡᠰᠦ ᠪᠦᠷ ᠠᠳᠠᠯᠢᠬᠠᠨ ᠰᠢᠬᠢᠳᠦᠨ᠎ᠠ᠃ ᠶᠠᠪᠤᠵᠤ ᠯᠡ ᠪᠤᠯᠤᠭᠰᠠᠨ ᠴᠠᠭ ᠲᠤ ᠶᠠᠭᠠᠬᠢᠭᠠᠳ ᠴᠦ ᠭᠡᠰᠡᠨ ᠭᠠᠳᠤᠯᠬᠤ ᠠᠷᠭ᠎ᠠ ᠤᠯᠳᠠᠨ᠎ᠠ᠂ ᠡᠵᠢ ᠰᠠᠨᠠᠭ᠎ᠠ ᠠᠮᠤᠷ ᠪᠠᠶᠢᠭᠠᠷᠠᠢ ᠭᠡᠵᠦ ᠬᠦᠦ ᠨᠢ ᠢᠨᠢᠶᠠᠮᠰᠦᠭᠯᠡᠨ ᠪᠠᠶᠢᠯ᠎ᠠ᠃    — ᠠᠴᠢᠶᠠᠯᠠᠬᠤ ᠲᠡᠮᠡᠭᠡ ᠲᠠᠢ ᠪᠠᠶᠢᠭᠰᠠᠨ ᠪᠣᠯ ᠭᠡᠳᠦᠢ ᠰᠠᠶᠢᠬᠠᠨ ᠪᠣᠢ᠂ ᠶᠠᠳᠠᠬᠤ ᠳᠤ ᠮᠠᠭᠤ ᠭᠦᠭᠰᠢᠨ ᠠᠲᠠ ᠴᠦ ᠬᠡᠭᠡᠷ᠎ᠡ ᠬᠦᠳᠡᠭᠡ ᠶᠠᠪᠤᠭᠠᠳ ᠤᠯᠳᠠᠬᠤ ᠦᠭᠡᠢ ᠪᠤᠢ ᠳ᠋ᠠ᠃ ᠮᠠᠩᠭᠠᠳᠤᠷ ᠦᠷᠦᠭᠦᠨ ᠡᠵᠢ ᠨᠢ ᠲᠦᠷᠦᠭᠦᠯᠡᠭᠡᠳ ᠶᠠᠪᠤᠶ᠎ᠡ᠂ ᠮᠢᠨᠦ ᠬᠦᠦ ᠬᠤᠶᠢᠨ᠎ᠠ ᠠᠴᠠ ᠶᠠᠭᠠᠷᠠᠯ ᠦᠭᠡᠢ ᠶᠠᠪᠤ᠂ ᠡᠯᠡᠰᠦᠨ ᠳᠤ ᠶᠠᠪᠤᠬᠤ ᠳᠤ ᠶᠠᠭᠠᠷᠠᠵᠣ ᠪᠣᠯᠳᠠᠭ ᠦᠭᠡᠢ ᠶᠤᠮ᠃    — ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠭᠡᠨᠡᠳᠲᠡ ᠰᠠᠯᠬᠢᠨ ᠰᠢᠭᠤᠷᠭᠠᠨ ᠲᠡᠭᠳᠡᠪᠡᠯ ᠬᠤᠶᠠᠭᠤᠯᠨ ᠲᠦᠭᠡᠷᠢᠭᠡᠳ ᠬᠡᠨ ᠠᠯᠢᠨ ᠢᠶᠠᠨ ᠤᠯᠬᠤ ᠪᠠᠨ ᠪᠠᠶᠢᠴᠢᠬᠠᠪᠠᠯ ᠶᠠᠭᠠᠬᠢᠨ᠎ᠠ᠃    — ᠦᠨᠡᠭᠡᠷ ᠴᠦ ᠲᠠᠶᠢᠮᠦ ᠪᠢᠰᠢ ᠤᠤ᠂ ᠭᠠᠢ ᠲᠠᠭᠠᠷᠠᠬᠤ ᠳᠤ ᠶᠠᠮᠠᠷ ᠴᠢᠭ ᠪᠠᠶᠢᠬ᠎ᠠ᠂ ᠡᠵᠢ ᠨᠢ ᠮᠠᠩᠭᠠᠳᠤᠷ ᠡᠭᠦᠷᠦᠭᠦᠯᠬᠦ ᠦᠭᠡᠢ᠂ ᠭᠦᠯ ᠦᠭᠡᠢ ᠶᠤᠮ ᠪᠢᠰᠢ ᠦᠪᠡᠷ ᠢᠶᠠᠨ ᠠᠯᠬᠤᠨ᠎ᠠ᠃ ᠬᠤᠨᠢᠨ ᠳᠤ ᠪᠦᠭᠦᠯᠢ ᠡᠳᠦᠷ ᠶᠠᠪᠠᠭᠠᠨ ᠶᠠᠪᠤᠭᠠᠳ ᠪᠣᠯᠳᠠᠭ ᠯᠡ ᠪᠠᠶᠢᠭᠰᠠᠨ ᠶᠤᠮ ᠴᠢᠨᠢ ᠡᠭᠦᠷᠭᠡ ᠲᠠᠢ ᠴᠢᠮ᠎ᠡ ᠠᠴᠠ ᠬᠠᠶᠠᠭᠳᠠᠬᠤ ᠪᠠᠷ ᠦᠭᠡᠢ ᠪᠠᠶᠢᠬ᠎ᠠ᠃    — ᠡᠨ᠋ᠨ ᠴᠢᠨᠢ ᠡᠯᠡᠰᠦ ᠰᠢᠦ᠂ ᠲᠠ ᠶᠠᠪᠤᠵᠤ ᠲᠠᠶᠢᠯᠬᠦ ᠦᠭᠡᠢ᠃    — ᠡᠯᠡᠰᠦ ᠪᠣᠯ ᠡᠯᠡᠰᠦ ᠯᠡ ᠪᠢᠵᠡ᠂ ᠴᠢᠮᠠᠶᠢ ᠪᠢ ᠡᠯᠡᠰᠦᠨ ᠳᠤ ᠴᠢᠷᠴᠦ ᠪᠠᠶᠢᠭᠠᠳ ᠦᠰᠭᠡᠭᠰᠡᠨ ᠰᠢᠦ᠃    — ᠲᠡᠷᠡ ᠲᠡᠮᠡᠭᠡᠨ ᠠᠴᠠ ᠨᠢᠭᠡ ᠶᠢ ᠤᠭᠤᠰᠤᠷᠯᠠᠵᠦ ᠠᠴᠢᠭᠠᠳ ᠶᠠᠪᠤᠭᠰᠠᠨ ᠪᠣᠯ ᠳ᠋ᠠ᠃    — ᠬᠤᠭᠤᠰᠤᠨ ᠪᠤᠯᠪᠠᠴᠦ ᠭᠦᠮᠦᠨ ᠤ ᠶᠠᠭᠤᠮᠡᠨ ᠳᠤ ᠭᠠᠷ ᠬᠦᠷᠭᠡᠬᠦ ᠪᠠᠨ ᠪᠠᠶᠢᠶ᠎ᠡ᠂ ᠬᠤᠯᠠᠭᠠᠢ ᠬᠢᠶ᠎ᠡ ᠭᠡᠵᠦ ᠪᠤᠳᠤᠪᠠᠴᠦ ᠨᠢᠭᠦᠯ ᠰᠢᠦ ᠬᠦᠦ ᠮᠢᠨᠢ᠃    — ᠤᠨᠤᠭ᠎ᠠ ᠪᠤᠯᠤᠮᠠᠷ ᠠᠲᠠ ᠪᠠᠶᠢᠪᠡᠯ ᠨᠢᠭᠡ ᠶᠢ ᠬᠤᠳᠠᠯᠳᠤᠵᠤ ᠶᠠᠪᠤᠶ᠎ᠡ ᠭᠡᠵᠦ ᠪᠤᠳᠤᠯ᠎ᠠ᠃    ᠭᠡᠨᠡᠳᠲᠡ ᠭᠦᠮᠦᠨ ᠬᠠᠰᠬᠢᠷᠬᠤ ᠨᠢ ᠰᠤᠨᠤᠰᠳᠠᠪᠠ᠃ ᠱᠠᠯᠪᠢᠩ ᠰᠠᠨᠳᠤᠷᠤᠨ ᠠᠶᠠᠭ᠎ᠠ ᠪᠠᠨ ᠲᠠᠯᠪᠢᠵᠤ᠂ ᠭᠠᠳᠠᠭᠰᠢ ᠭᠠᠷᠴᠦ ᠬᠠᠷᠠᠭᠰᠠᠨ ᠢᠶᠠᠨ ᠲᠡᠮᠡᠭᠡ ᠬᠤᠷᠢᠶᠡᠵᠤ ᠶᠠᠪᠤᠭ᠎ᠠ ᠭᠦᠮᠦᠨ ᠪᠠᠶᠢᠨ᠎ᠠ᠂ ᠪᠢ ᠤᠴᠢᠵᠦ ᠠᠭᠤᠯᠵᠠᠭᠠᠳ ᠢᠷᠡᠶ᠎ᠡ ᠭᠡᠵᠦ ᠬᠡᠯᠡᠭᠡᠳ ᠠᠯᠬᠤᠵᠤ ᠤᠴᠢᠯ᠎ᠡ᠃    — ᠨᠡᠷ᠎ᠡ ᠴᠢᠨᠢ ᠬᠡᠨ ᠭᠡᠳᠡᠭ ᠪᠤᠢ︖ ᠤᠨᠤᠭᠠᠨ ᠲᠡᠭᠡᠷ᠎ᠡ ᠠᠴᠠ ᠮᠡᠨᠳᠤᠯᠡᠭᠰᠡᠨ ᠬᠡᠭᠵᠢᠭᠦᠨ ᠲᠠᠭᠤ ᠲᠠᠢ ᠬᠠᠯᠲᠠᠷ ᠡᠷ᠎ᠡ᠂ ᠭᠡᠷ ᠤᠨ ᠬᠢᠨᠢ ᠵᠦᠭ ᠨᠢᠳᠦ ᠬᠠᠶᠠᠯᠡᠨ ᠪᠠᠶᠢᠪᠠ᠃    — ᠮᠢᠨᠦ ᠨᠡᠷ᠎ᠡ ᠱᠠᠯᠪᠢᠩ ᠭᠡᠳᠡᠭ᠂ ᠲᠠᠨ ᠤ ᠠᠯᠳᠠᠷ ᠬᠡᠨ ᠭᠡᠳᠡᠭ ᠪᠤᠢ︖ ᠭᠡᠵᠦ ᠱᠠᠯᠪᠢᠩ ᠴᠦ ᠴᠢᠩᠭ᠎ᠠ ᠲᠠᠭᠤ ᠪᠠᠷ ᠠᠰᠠᠭᠤᠪᠠ᠃    — ᠳ᠋ᠠᠨᠠᠰᠢᠷ᠎ᠡ ᠲᠠᠶᠢᠵᠢ ᠭᠡᠭᠴᠢ ᠶᠢ ᠰᠤᠨᠤᠰᠤᠭᠰᠠᠨ ᠦᠭᠡᠢ ᠤᠤ︖    — ᠲᠠᠶᠢᠵᠢ ᠪᠠᠶᠢᠨᠠᠤ ᠭᠡᠵᠦ ᠰᠤᠷᠠᠭᠯᠠᠭᠰᠠᠨ ᠦᠭᠡᠢ ᠪᠤᠯᠬᠤᠷ ᠰᠤᠨᠤᠰᠤᠭᠰᠠᠨ ᠦᠭᠡᠢ᠃ ᠲᠠᠮᠠᠭ᠎ᠠ ᠪᠠᠶᠢᠨ᠎ᠠ ᠤᠤ ᠭᠡᠵᠦ ᠠᠵᠢᠭᠯᠠᠭᠰᠠᠨ ᠦᠭᠡᠢ ᠪᠤᠯᠬᠤᠷ ᠲᠠᠨᠢᠭᠰᠠᠨ ᠦᠭᠡᠢ ᠭᠡᠳ ᠰᠦᠭᠦᠷᠡᠨ ᠠᠯᠳᠠᠪᠠᠯ ᠲᠡᠷᠡ ᠨᠢ ᠶᠡᠭᠡᠯ᠎ᠡ ᠰᠠᠨᠳᠤᠷᠴᠦ ᠲᠡᠮᠡᠭᠡᠨ ᠠᠴᠠ ᠦᠰᠦᠷᠦᠨ ᠪᠠᠭᠤᠭᠠᠳ᠂    — ᠲᠠᠶᠢᠵᠢ ᠪᠢᠰᠢ᠂ ᠲᠡᠮᠡᠭᠡᠴᠢᠨ ᠨᠢ ᠪᠠᠶᠢᠨ᠎ᠠ ᠭᠡᠵᠦ ᠢᠨᠢᠶᠡᠭᠡᠳ᠂ ᠲᠠᠨᠡᠷ ᠴᠢᠨᠢ ᠬᠠᠮᠢᠭᠠᠬᠢ ᠶᠢᠨ ᠣᠲᠣᠷᠴᠢᠨ ᠪᠤᠢ︖ ᠭᠡᠯ᠎ᠡ᠃    — ᠣᠲᠣᠷᠴᠢᠨ ᠪᠢᠰᠢ᠂ ᠨᠤᠶᠡᠨ ᠳᠤ ᠪᠠᠷᠠᠯᠬᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠶᠢᠨ᠎ᠠ᠃    — ᠮᠠᠨ ᠤ ᠨᠤᠶᠡᠨ ᠴᠢᠨᠦ ᠲᠡᠭᠡᠳᠦᠭᠦᠯᠠ ᠤᠤ︖    — ᠲᠠᠶᠢᠵᠢ ᠶᠢᠨ ᠲᠡᠭᠡᠳᠦᠭᠦᠯᠠ ᠨᠤᠶᠡᠨ ᠪᠠᠶᠢᠳᠠᠭ᠂ ᠲᠠᠶᠢᠯᠤᠭ ᠤᠨ ᠲᠡᠭᠡᠳᠦᠭᠦᠯᠠ ᠪᠤᠤᠷ᠎ᠡ ᠪᠠᠶᠢᠳᠠᠭ ᠭᠡᠳᠡᠭ᠃ ᠨᠠᠳᠠ ᠳᠤ ᠲᠠᠶᠢᠮᠦ ᠪᠤᠶᠡᠨ ᠪᠠᠶᠢᠬᠤ ᠦᠭᠡᠢ ᠴᠦ ᠲᠠ ᠪᠢᠳᠡᠨ ᠤ ᠲᠡᠭᠡᠳᠦᠭᠦᠯᠠ ᠪᠢᠰᠢ ᠭᠡᠵᠦ ᠲᠠ ᠠᠷᠠᠢ ᠬᠡᠯᠡᠬᠦ ᠦᠭᠡᠢ ᠪᠢᠵᠡ᠃ ᠠᠳᠤᠭᠤᠴᠢᠨ ᠢᠶᠠᠨ ᠪᠤᠯᠭᠠᠶ᠎ᠠ ᠭᠡᠬᠦ ᠳᠤᠨᠢ ᠵᠠᠷᠯᠢᠭ ᠢ ᠵᠦᠷᠢᠴᠡᠬᠦ ᠠᠷᠭ᠎ᠠ ᠦᠭᠡᠢ ᠪᠤᠯᠬᠤᠷ ᠵᠤᠷᠢᠵᠦ ᠶᠠᠪᠤᠭ᠎ᠠ ᠶᠤᠮ᠃ ᠬᠠᠷᠢᠨ ᠤᠨᠤᠭ᠎ᠠ ᠤᠨᠤᠰᠢ ᠪᠠᠷ ᠭᠠᠴᠢᠭᠳᠠᠵᠤ ᠡᠳᠦᠷ ᠬᠤᠨᠤᠭ ᠠᠴᠠ ᠨᠢ ᠤᠰᠤᠯᠳᠠᠬᠤ ᠭᠡᠵᠦ ᠰᠠᠨᠳᠤᠷᠭᠠᠭᠠᠳ ᠪᠠᠶᠢᠨ᠎ᠠ᠃ ᠲᠠᠨ ᠢ ᠭᠤᠶᠤᠪᠡᠯ ᠨᠢᠭᠡ ᠲᠡᠮᠡᠭᠡ ᠬᠠᠶᠢᠷᠠᠯᠠᠵᠤ ᠵᠠᠯᠭᠠᠭᠤᠯᠬᠤ ᠪᠤᠯᠪᠠᠦ︖    — ᠠᠴᠢᠶ᠎ᠡ ᠳᠠᠭᠠᠭᠠᠬᠤ ᠶᠢ ᠨᠢ ᠭᠦᠲᠦᠯᠦᠭᠡᠳ ᠠᠶᠡᠨ ᠳᠤ ᠶᠠᠪᠤᠭᠰᠠᠨ᠂ ᠪᠤᠲᠤᠭᠤ ᠲᠤᠷᠤᠮ ᠰᠠᠯᠭᠠᠬᠤ ᠦᠭᠡᠢ ᠶᠤᠮ ᠪᠣᠯ ᠤᠨᠤᠭ᠎ᠠ ᠪᠤᠯᠭᠠᠵᠤ ᠠᠭᠠᠷᠴᠠᠭ ᠲᠤ ᠬᠠᠪᠴᠢᠮᠡᠷ ᠶᠠᠭᠤᠮ᠎ᠠ ᠪᠠᠶᠢᠬᠤ ᠦᠭᠡᠢ ᠰᠢᠦ᠃    — ᠲᠤᠷᠤᠮ ᠲᠠᠢ ᠢᠩᠭᠡ ᠴᠦ ᠭᠡᠰᠡᠨ ᠪᠤᠯᠤᠨ᠎ᠠ᠂ ᠮᠦᠩᠬᠦ ᠪᠠᠷ ᠠᠪᠤᠶ᠎ᠡ᠃    — ᠪᠢ ᠡᠵᠡᠨ ᠪᠤᠯᠵᠣ ᠴᠢᠳᠠᠬᠤ ᠦᠭᠡᠢ᠂ ᠲᠤᠯᠤᠭᠠᠢ ᠮᠡᠳᠡᠳᠡᠭ ᠨᠢ ᠠᠶᠠᠨ ᠳᠤ ᠮᠤᠷᠢᠯᠠᠭᠰᠠᠨ ᠪᠢᠯᠡ᠃ ᠱᠠᠯᠪᠢᠩ ᠭᠡᠵᠦ᠂ ᠮᠤᠨᠳᠠᠭ ᠴᠢᠳᠠᠯ ᠲᠠᠢ ᠡᠷ᠎ᠡ ᠭᠡᠵᠦ ᠰᠤᠨᠤᠰᠤᠯ᠎ᠠ᠂ ᠭᠡᠷ ᠢᠶᠠᠨ ᠡᠭᠦᠷᠦᠭᠡᠳ ᠶᠠᠪᠤᠵᠤ ᠪᠠᠶᠢᠬᠤ ᠪᠠᠷ ᠲᠠ ᠮᠦᠨ ᠤᠤ︖    ᠱᠠᠯᠪᠢᠩ ᠢᠨᠢᠶᠡᠮᠰᠤᠭ᠍ᠯᠡᠨ᠂ ᠪᠠᠷᠤᠭ ᠯᠡ ᠪᠠᠶᠢᠬ᠎ᠠ᠂ ᠪᠠᠷᠢᠯᠳᠤᠵᠤ ᠦᠵᠡᠨ᠎ᠡ ᠤᠤ︖ ᠭᠡᠯ᠎ᠡ᠃    — ᠪᠠᠷᠢᠯᠳᠤᠬᠤ ᠪᠠᠨ ᠴᠦ ᠪᠠᠶᠢᠶ᠎ᠡ᠃ ᠪᠦᠭᠡᠴᠢᠨ ᠭᠦᠮᠦᠨ ᠤᠨᠤᠭ᠎ᠠ ᠪᠠᠷ ᠭᠠᠴᠢᠭᠳᠠᠵᠤ ᠶᠠᠪᠤᠭ᠎ᠠ ᠲᠤᠯᠠ ᠤᠨᠤᠭ᠎ᠠ ᠤᠯᠬᠤ ᠠᠷᠭ᠎ᠠ ᠵᠢᠭᠠᠵᠤ ᠦᠭᠪᠡ᠃ ᠬᠠᠷᠢᠨ ᠮᠠᠭᠤ ᠰᠠᠨᠠᠭ᠎ᠠ ᠭᠡᠵᠦ ᠪᠢᠳᠡᠭᠡᠢ ᠪᠤᠳᠤ ᠳ᠋ᠠ᠂ ᠲᠡᠷᠡ ᠦᠨᠳᠤᠷ ᠡᠯᠡᠰᠦᠨ ᠤ ᠪᠠᠷᠠᠭᠤᠨ ᠲᠦᠭᠦᠮ ᠳᠤ ᠨᠢᠭᠡ ᠵᠤᠯᠪᠢᠩ ᠪᠤᠤᠷ᠎ᠠ ᠮᠠᠨ ᠤ ᠭᠡᠳᠦᠨ ᠢᠩᠭᠡ ᠬᠤᠷᠢᠶᠠᠭᠠᠳ ᠪᠤᠢ᠃ ᠵᠤᠷᠢᠭ ᠪᠠᠶᠢᠭᠠᠳ ᠴᠢᠳᠠᠯ ᠴᠢᠨᠢ ᠬᠦᠷᠪᠡᠯ ᠠᠴᠢᠶ᠎ᠡ ᠪᠠᠨ ᠠᠴᠢᠭᠠᠳ ᠴᠠᠭᠠᠰᠢ ᠨᠢ ᠲᠠᠪᠠᠵᠦ ᠭᠠᠷᠪᠡᠯ ᠵᠡᠮ ᠢ ᠲᠦᠳᠠ ᠪᠠᠶᠢᠳᠠᠭ ᠶᠤᠮ ᠭᠡᠳ ᠡᠯᠡᠰᠦᠨ ᠤ ᠦᠨᠳᠤᠷ ᠢ ᠲᠠᠰᠢᠭᠤᠷ ᠢᠶᠠᠷ ᠵᠢᠭᠠᠯ᠎ᠠ᠃    — ᠮᠦᠷᠭᠦᠵᠦ ᠪᠠᠶᠢᠮᠠᠷ ᠭᠦᠮᠦᠨ ᠪᠠᠶᠢᠨ᠎ᠠ᠂ ᠮᠦᠷᠭᠦᠭᠦᠯᠵᠦ ᠶᠠᠪᠤᠬᠤ ᠪᠤᠯᠳᠤᠭᠠᠢ︕    ᠲᠠᠷᠠᠭ᠎ᠠ ᠦᠷᠯᠦᠭᠡ ᠨᠢ ᠡᠷᠲᠡ ᠶᠠᠪᠤᠬᠤ ᠪᠠᠷ ᠬᠦᠦ ᠨᠢ ᠡᠭᠦᠷᠭᠡ ᠪᠠᠨ ᠲᠢᠭᠯᠡᠵᠦ ᠪᠠᠶᠢᠳᠡᠯ᠎ᠡ ᠡᠬᠡ ᠨᠢ ᠲᠦᠷᠦᠭᠦᠯᠡᠨ ᠠᠯᠬᠤᠵᠤ ᠤᠳᠤᠯ᠎ᠠ᠃ ᠦᠨᠦᠳᠤᠷ ᠬᠦᠦ ᠨᠢ ᠬᠤᠷᠢᠭᠯᠠᠭᠰᠠᠨ ᠦᠭᠡᠢ᠂ ᠡᠯᠡᠰᠦᠨ ᠵᠠᠭᠠᠭ ᠢᠶᠠᠷ ᠤᠷᠤᠵᠤ ᠨᠠᠯᠢᠶᠡᠳ ᠶᠠᠪᠤᠭᠰᠠᠨ ᠡᠬᠡ ᠨᠢ ᠦᠨᠳᠤᠷ ᠡᠯᠡᠰᠦ ᠶᠢ ᠬᠤᠶᠡᠷᠳᠠ ᠲᠠᠪᠠᠵᠤ ᠭᠠᠷᠤᠭᠠᠳ᠂ ᠬᠤᠶᠢᠰᠢ ᠡᠷᠬᠢᠨ ᠬᠦᠨᠳᠦ ᠡᠭᠦᠷᠭᠡ ᠲᠠᠢ ᠬᠦᠦ ᠪᠠᠨ ᠬᠠᠷᠠᠵᠤ ᠲᠦᠷ ᠵᠤᠭᠰᠤᠭᠠᠳ ᠴᠠᠭᠠᠰᠢ ᠪᠠᠭᠤᠵᠤ ᠲᠦᠭᠦᠮ ᠳᠤ ᠤᠷᠤᠭᠰᠠᠨ ᠢᠶᠠᠨ ᠵᠤᠭ ᠲᠤᠰᠤᠯ᠎ᠠ᠃ ᠬᠤᠷᠠᠭᠰᠠᠨ ᠲᠡᠮᠡᠭᠡᠨ ᠵᠠᠬ᠎ᠠ ᠠᠴᠠ ᠨᠢᠭᠡ ᠪᠤᠤᠷ᠎ᠡ ᠲᠤᠪᠳᠤᠯᠭᠠᠵᠤ ᠠᠶᠢᠰᠦᠢ᠃    ᠪᠤᠷᠬᠢᠯᠤᠭᠰᠠᠨ ᠭᠦᠭᠡᠰᠦ ᠪᠠᠷ ᠲᠤᠯᠤᠭᠠᠢ ᠭᠦᠵᠦᠬᠦᠦ ᠴᠡᠭᠡᠵᠢᠨ ᠪᠡᠶ᠎ᠡ ᠪᠠᠨ ᠴᠠᠭᠠᠨ ᠢᠶᠠᠷ ᠪᠢᠯᠳᠠᠭᠰᠠᠨ ᠪᠤᠶᠢᠯᠠ ᠪᠤᠷᠠᠨᠳᠠᠭ ᠦᠭᠡᠢ᠂ ᠠᠭᠤᠯᠠ ᠰᠢᠭ᠋ ᠪᠡᠶ᠎ᠡ ᠲᠠᠢ᠂ ᠠᠷᠰᠯᠡᠨ ᠲᠤᠯᠤᠭᠠᠢ ᠲᠠᠢ ᠰᠤᠭᠲᠤᠭᠤ ᠬᠦᠷᠡᠩ ᠪᠤᠤᠷ᠎ᠡ᠂ ᠨᠤᠭᠲᠤ ᠲᠤᠮᠤᠭ᠎ᠠ ᠦᠭᠡᠢ ᠠᠮᠠ ᠪᠠᠨ ᠲᠤᠭᠤᠢ ᠠᠩᠭᠠᠯᠵᠠᠭᠤᠯᠤᠨ ᠡᠷᠡᠦ ᠬᠠᠪᠰᠢᠵᠦ᠂ ᠬᠠᠳᠠ ᠴᠢᠯᠠᠭᠤ ᠬᠠᠪᠢᠷᠤᠯᠳᠤᠬᠤ ᠰᠢᠭ᠋ ᠠᠷᠠᠭ᠎ᠠ ᠰᠢᠳᠦ ᠪᠠᠨ ᠲᠠᠰ ᠨᠢᠰ ᠲᠠᠲᠠᠭᠤᠯᠤᠨ᠂ ᠬᠠᠪᠤᠷ ᠤᠨ ᠲᠡᠭᠷᠢ ᠨᠦᠷᠬᠢᠯᠡᠬᠦ‍ ᠰᠢᠭ ᠲᠠᠰᠤᠷᠠᠯ ᠦᠭᠡᠢ ᠬᠦᠷᠴᠢᠭᠢᠨᠡᠭᠰᠡᠭᠡᠷ ᠲᠠᠰᠢᠵᠦ ᠢᠷᠡᠭᠡᠳ ᠪᠤᠲᠠ ᠲᠠᠷᠤᠨ ᠰᠦᠬᠦᠷᠡᠵᠦ ᠤᠨᠠᠨ ᠬᠦᠯᠪᠡᠷᠢᠵᠦ ᠪᠤᠰᠤᠭᠠᠳ᠂ ᠬᠤᠶᠢᠳᠦ ᠭᠦᠯ ᠢᠶᠠᠨ ᠴᠢᠨᠡᠭᠡ ᠪᠠᠷ ᠠᠯᠴᠠᠶᠢᠵᠤ ᠰᠠᠭᠤᠨ ᠠᠯᠳᠡᠨ ᠰᠢᠭᠡᠰᠦ ᠪᠠᠷ ᠢᠶᠠᠨ ᠱᠠᠪᠢᠵᠤ ᠭᠦᠨᠳᠦ ᠲᠠᠰᠢᠭᠤᠷ ᠢᠶᠠᠷ ᠱᠠᠯᠪᠠᠭ ᠤᠰᠤ ᠲᠠᠰᠢᠭᠤᠷᠳᠠᠨ ᠪᠠᠶᠢᠬᠤ ᠰᠢᠭ᠋ ᠰᠠᠭᠦᠯ ᠰᠢᠪᠬᠠᠷᠠᠨ ᠵᠤᠭᠰᠤᠵᠤ ᠪᠠᠶᠢᠯ᠎ᠡ᠃    ᠦᠨᠳᠦᠷ ᠴᠤᠬᠢᠶᠡᠨ ᠠᠴᠠ ᠨᠢᠭᠡᠨᠳᠠ ᠪᠠᠭᠤᠭᠰᠠᠨ ᠡᠮᠡᠭᠡᠨ ᠵᠢᠷᠦᠭᠡ ᠲᠦᠭᠰᠢᠨ ᠠᠶᠤᠵᠤ ᠤᠬᠤᠷᠢᠬᠤ ᠵᠠᠮ ᠦᠭᠡᠢ ᠬᠠᠰᠢᠭᠳᠠᠭᠰᠠᠨ ᠪᠤᠯᠪᠠᠴᠦ ᠠᠷᠭ᠎ᠠ ᠮᠡᠭᠡ ᠶᠢ ᠰᠦᠪᠡᠭᠴᠢᠯᠡᠨ ᠭᠠᠯᠵᠠᠭᠤ ᠪᠤᠤᠷ᠎ᠠ ᠠᠴᠠ ᠵᠠᠶᠢᠳᠠᠪᠠ᠃    ᠵᠤᠯᠪᠢᠩ ᠰᠤᠭᠳᠤᠭᠤ ᠡᠨ᠋ᠨ ᠪᠤᠤᠷ᠎ᠠ ᠵᠤᠨ ᠪᠣᠯᠵᠣ ᠬᠠᠭᠰᠠᠭ᠎ᠠ ᠨᠢ ᠭᠠᠷᠪᠡᠯ ᠢᠩᠭᠡᠨ ᠰᠦᠷᠦᠭ ᠢᠶᠠᠨ ᠤᠷᠬᠢᠵᠤ ᠡᠯᠡᠰᠦᠨ ᠳᠤ ᠰᠢᠷᠭᠤᠨ ᠵᠡᠷᠯᠢᠭᠰᠢᠭᠡᠳ᠂ ᠡᠪᠦᠯ ᠪᠤᠯᠪᠠᠯ ᠢᠩᠭᠡᠨ ᠲᠡᠮᠡᠭᠡ ᠶᠢ ᠰᠦᠷᠦᠭ ᠢᠶᠠᠷ ᠬᠤᠷᠢᠶᠡᠵᠤ ᠡᠷᠯᠢᠭᠰᠢᠭᠡᠳ ᠭᠦᠮᠦᠨ ᠠᠮᠢᠲᠡᠨ ᠬᠠᠪᠢᠳᠠᠭᠤᠯᠤᠯ ᠦᠭᠡᠢ ᠤᠰᠤ ᠴᠠᠰᠤ ᠪᠠᠷ ᠬᠠᠲᠠᠭᠠᠨ ᠡᠵᠡᠨ ᠲᠠᠢ ᠨᠢ ᠭᠠᠴᠢᠳᠠᠭ ᠪᠠᠶᠢᠵᠡᠢ᠃ ᠭᠡᠳᠦᠨ ᠵᠢᠯ ᠤᠨ ᠡᠮᠦᠨ᠎ᠡ ᠰᠠᠨᠠᠮᠰᠠᠷ ᠦᠭᠡᠢ ᠤᠴᠠᠷᠠᠭᠰᠠᠨ ᠲᠡᠮᠡᠭᠡᠴᠢᠨ ᠡᠷ᠎ᠡ ᠶᠢ ᠲᠡᠮᠡᠭᠡ ᠲᠠᠢ ᠨᠢ ᠰᠡᠭᠯᠡᠵᠦ ᠠᠯᠠᠭᠰᠠᠨ ᠠᠴᠠ ᠬᠤᠶᠢᠰᠢ ᠬᠠᠪᠢᠳᠠᠵᠦ ᠴᠢᠳᠠᠬᠤ ᠡᠷ᠎ᠡ ᠪᠠᠶᠢᠭ᠎ᠠ ᠦᠭᠡᠢ᠃ ᠯᠾᠠᠮᠦ ᠪᠤᠷᠬᠠᠨ ᠤ ᠬᠦᠯᠦᠭ ᠲᠣᠭᠰᠢᠷᠠᠯ᠎ᠠ ᠭᠡᠳ ᠯᠠᠮᠠ ᠵᠠᠯᠠᠵᠤ ᠠᠯᠤᠰ ᠠᠴᠠ ᠰᠠᠩ ᠲᠠᠯᠪᠢᠵᠤ ᠠᠷᠢᠭᠤᠳᠬᠠᠭᠰᠠᠨ ᠪᠤᠯᠪᠠᠴᠦ ᠲᠤᠰᠠ ᠪᠤᠯᠤᠭ᠎ᠠ ᠦᠭᠡᠢ᠂ ᠵᠤᠨ ᠪᠣᠯᠬᠤ ᠳᠤ ᠬᠠᠭᠰᠠᠭ᠎ᠠ ᠨᠢ ᠭᠠᠷᠬᠤ ᠶᠢ ᠭᠦᠯᠢᠶᠡᠳᠡᠭ ᠪᠠᠶᠢᠵᠡᠢ᠃ ᠱᠠᠯᠪᠢᠩ ᠤᠨ ᠮᠤᠨᠳᠠᠭ ᠴᠢᠳᠠᠯ ᠲᠠᠢ ᠶᠢ ᠰᠤᠨᠤᠰᠴᠦ ᠪᠠᠶᠢᠭᠰᠠᠨ ᠲᠡᠮᠡᠭᠡᠴᠢᠨ᠂ ᠢᠩᠭᠡ ᠪᠠᠨ ᠰᠠᠯᠭᠠᠵᠤ ᠠᠪᠬᠤ ᠶᠢᠨ ᠰᠢᠯᠲᠠᠭ ᠢᠶᠠᠷ ᠴᠢᠳᠠᠯ ᠢ ᠨᠢ ᠲᠡᠩᠰᠡᠵᠦ ᠦᠵᠡᠬᠦ ᠭᠡᠪᠡ ᠤᠤ᠂ ᠰᠠᠶᠢᠨ ᠰᠠᠨᠠᠭ᠎ᠠ ᠪᠠᠷ ᠤᠨᠤᠭ᠎ᠠ ᠵᠢᠭᠠᠵᠦ ᠦᠭᠭᠦᠭᠡᠳ ᠬᠤᠯᠠᠳᠠᠭᠤᠯᠬᠤ ᠶᠢ ᠪᠤᠳᠤᠪᠠ ᠤᠤ᠂ ᠪᠤᠤ ᠮᠡᠳᠡ ᠡ᠃ ᠶᠠᠭᠤ ᠴᠦ ᠪᠤᠯᠤᠭᠰᠠᠨ ᠭᠠᠯᠵᠠᠭᠤ ᠪᠤᠤᠷ᠎ᠡ ᠶᠢ ᠲᠠᠶᠢᠯᠵᠤ ᠠᠪᠤᠭᠰᠠᠨ ᠱᠠᠯᠪᠢᠩ ᠪᠠᠶᠡᠷ ᠲᠠᠢ ᠯᠡ ᠪᠠᠶᠢᠯ᠎ᠠ᠃    ᠲᠤᠮᠤᠭ᠎ᠠ ᠦᠭᠡᠢ ᠭᠡᠦᠭᠡᠳ ᠡᠷᠡᠦ ᠪᠠᠨ ᠰᠢᠬᠠᠳᠠᠭ᠂ ᠲᠤᠮᠤᠭ᠎ᠠ ᠦᠭᠡᠢ ᠪᠤᠤᠷ᠎ᠠ ᠡᠷᠡᠦ ᠪᠠᠨ ᠵᠠᠭᠠᠳᠠᠭ᠃ ᠡᠪᠰᠢᠶᠡᠭᠡᠳ ᠵᠠᠭᠠᠷᠠᠭᠰᠠᠨ ᠪᠢᠰᠢ᠂ ᠡᠷ᠎ᠡ ᠶᠢᠨ ᠴᠢᠳᠠᠯ ᠢᠶᠠᠷ ᠡᠷᠡᠦ ᠨᠢ ᠰᠡᠨᠵᠢᠬᠢᠨᠡᠭ᠌ᠰᠠᠨ ᠡᠮᠨᠡᠭ ᠬᠠᠩᠭᠠᠯ ᠪᠤᠤᠷ᠎ᠡ ᠶᠢᠨ ᠨᠢᠮᠭᠡᠨ ᠴᠡᠪᠢ ᠶᠢ ᠬᠠᠪᠲᠠᠭ᠎ᠠ ᠲᠠᠢ ᠨᠢ ᠲᠠᠰᠢᠷ ᠠᠳᠬᠤᠵᠤ ᠡᠪᠡᠳᠭᠡᠵᠦ ᠬᠡᠪᠳᠡᠭᠦᠯᠦᠭᠡᠳ ᠡᠵᠢ ᠶᠢᠨ ᠢᠶᠠᠨ ᠠᠪᠴᠦ ᠢᠷᠡᠭᠰᠡᠨ ᠲᠡᠭᠡᠰᠦ ᠪᠠᠷ ᠠᠳᠤᠷᠢᠲᠠᠯ᠎ᠡ ᠨᠠᠬᠢᠰᠯᠠᠵᠤ ᠠᠴᠢᠶ᠎ᠡ ᠪᠠᠨ ᠶᠠᠭᠠᠷᠠᠯ ᠦᠭᠡᠢ ᠠᠴᠢᠵᠤ ᠴᠢᠳᠠᠨ ᠶᠠᠳᠠᠨ ᠪᠠᠭᠲᠠᠭᠠᠭᠠᠳ᠂ ᠪᠤᠤᠷ᠎ᠡ ᠪᠠᠨ ᠪᠤᠰᠬᠠᠵᠤ ᠬᠡᠳᠦ ᠠᠯᠬᠤᠭᠰᠠᠨ ᠱᠠᠯᠪᠢᠩ ᠠᠴᠢᠶᠡᠨ ᠭᠤᠣᠯ ᠳᠤ ᠡᠵᠢ ᠪᠠᠨ ᠡᠷᠭᠦᠵᠦ ᠰᠠᠭᠤᠯᠭᠠᠭᠠᠳ ᠶᠠᠪᠤᠶ᠎ᠡ ᠭᠡᠯ᠎ᠡ᠃    — ᠪᠠᠶᠢᠭ ᠴᠠᠭᠠᠰᠢ ᠪᠠᠨ ᠭᠡᠳ ᠡᠬᠡ ᠨᠢ ᠬᠦᠦ ᠶᠢᠨ ᠭᠠᠷ ᠢ ᠭᠦᠴᠦᠳᠡᠢ ᠲᠦᠯᠬᠢᠪᠡ᠃    — ᠲᠦᠢᠯᠠᠬᠤ ᠠᠴᠠ ᠨᠢ ᠠᠶᠤᠵᠤ ᠪᠠᠶᠢᠭ᠎ᠠ ᠤᠤ︖ ᠡᠨ᠋ᠨ ᠪᠣᠣᠷ᠎ᠠ ᠶᠢ ᠪᠢ ᠨᠢᠭᠡ ᠴᠦ ᠦᠰᠦᠷᠦᠭᠦᠯᠬᠦ ᠦᠭᠡᠢ ᠴᠤᠷᠪᠤᠭ ᠠᠴᠠ ᠨᠢ ᠲᠠᠰᠦ ᠠᠳᠬᠤᠭᠠᠳ ᠭᠦᠲᠦᠯᠵᠦ ᠶᠠᠪᠤᠶ᠎ᠡ ᠭᠡᠵᠦ ᠬᠦᠦ ᠨᠢ ᠲᠠᠬᠢᠨ ᠭᠠᠷ ᠰᠤᠩᠭᠠᠪᠠ᠃    — ᠪᠠᠶᠢᠵᠠ᠂ ᠭᠦᠪᠡᠭᠦᠨ ᠮᠢᠨᠢ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠡᠭᠦᠨ ᠤ ᠤᠴᠢᠷ ᠢ ᠴᠢᠮᠡᠳᠦ ᠭᠡᠯᠡᠵᠦ ᠦᠭᠭᠦᠶ᠎ᠡ ᠭᠡᠳ ᠡᠵᠢ ᠢ ᠠᠯᠬᠤᠬᠤ ᠶᠢᠨ ᠲᠠᠭᠠᠦ᠂ ᠠᠵᠢᠷᠭ᠎ᠠ ᠪᠤᠤᠷ᠎ᠠ ᠭᠡᠭᠴᠢ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠤᠩᠭᠤᠨ ᠭᠡᠢ ᠮᠣᠷᠢ ᠭᠡᠳᠡᠭ᠂ ᠦᠰᠬᠦ ᠰᠦᠷᠦᠭ ᠤᠨ ᠲᠠᠷᠬᠠᠨ ᠰᠦᠯᠳᠠ ᠪᠤᠯᠬᠤᠷ ᠡᠵᠡᠨ ᠪᠣᠯᠬᠤ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠭᠦᠯᠭᠡᠯᠡᠵᠦ ᠪᠠᠶᠢᠳᠠᠭ ᠶᠤᠮ᠃ ᠡᠶᠢᠮᠦ ᠠᠴᠠ ᠡᠬᠡᠨᠡᠷ ᠭᠦᠮᠦᠨ ᠬᠡᠵᠢᠶ᠎ᠡ ᠴᠦ ᠭᠡᠰᠡᠨ ᠤᠨᠣᠵᠣ ᠵᠠᠶᠢᠳᠠᠯᠠᠬᠤ ᠶᠤᠰᠤ ᠦᠭᠡᠢ᠃ ᠵᠤᠯᠪᠢᠩ ᠪᠤᠯᠪᠠᠴᠦ ᠪᠤᠤᠷ᠎ᠡ ᠶᠤᠮ ᠴᠢᠨᠢ ᠤᠩᠭᠤᠨ ᠰᠠᠲᠡᠷ ᠡᠰᠡ ᠶᠠᠪᠤᠭᠰᠠᠨ ᠴᠤ ᠤᠨᠤᠵᠤ ᠶᠠᠭᠠᠬᠢᠨ ᠪᠣᠯᠬᠤ ᠪᠤᠢ᠂ ᠠᠴᠢᠶ᠎ᠡ ᠪᠠᠨ ᠠᠴᠢᠭᠰᠠᠨ ᠨᠢ ᠪᠤᠯᠵᠡᠢ᠃ ᠮᠠᠨᠤᠰ ᠲᠤ ᠦᠰᠭᠡᠵᠦ ᠦᠷᠡᠵᠢᠭᠦᠯᠬᠦ ᠲᠡᠮᠡᠭᠡ ᠦᠭᠡᠢ ᠴᠦ ᠲᠡᠭᠡᠳᠦᠰ ᠤᠨ ᠬᠤᠷᠢᠭ᠎ᠠ ᠴᠡᠭᠡᠷ ᠢ ᠳᠤᠷ᠎ᠠ ᠵᠣᠷᠢᠭ ᠢᠶᠠᠷ ᠢᠶᠠᠨ ᠡᠪᠳᠡᠵᠦ᠂ ᠬᠡᠰᠢᠭ ᠪᠤᠶᠠᠨ ᠢᠶᠠᠨ ᠪᠠᠷᠠᠬᠤ ᠶᠠᠪᠤᠳᠡᠯ ᠢ ᠶᠠᠭᠠᠬᠢᠭᠰᠠᠨ ᠴᠦ ᠬᠢᠵᠦ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠳ ᠡᠷᠬᠢᠵᠦ ᠬᠠᠷᠠᠪᠠ᠃    ᠵᠢᠮᠡᠯᠡᠯ ᠤᠨ ᠪᠤᠰᠤ ᠡᠨᠡᠷᠢᠯ ᠤᠨ ᠵᠦᠭᠡᠯᠡᠨ ᠬᠠᠷᠠᠴᠠ ᠳᠤᠨᠢ ᠱᠠᠯᠪᠢᠩ ᠤᠨ ᠴᠢᠷᠠᠢ ᠬᠠᠯᠠᠭᠤ ᠨᠢᠯᠴᠢᠬᠢᠨᠡᠭᠡᠳ᠂ ᠡᠵᠢ ᠶᠢᠨ ᠰᠤᠷᠭᠠᠯ ᠢ ᠴᠡᠭᠡᠵᠢᠯᠡᠵᠦ ᠶᠠᠪᠤᠶ᠎ᠡ ᠭᠡᠰᠡᠨ ᠢᠶᠠᠨ ᠲᠤᠯᠤᠭᠠᠢ ᠲᠤᠬᠢᠵᠦ ᠮᠡᠳᠡᠭᠳᠡᠪᠡ᠃    — ᠡᠵᠢ ᠶᠢ ᠪᠢ ᠡᠭᠦᠷᠴᠦ ᠶᠠᠪᠤᠶ᠎ᠡ ᠭᠡᠵᠦ ᠵᠦᠭᠡᠯᠡᠨ ᠲᠠᠭᠤ ᠪᠠᠷ ᠬᠡᠯᠡᠪᠡ᠃ ᠡᠵᠢ ᠨᠢ ᠬᠠᠷᠢᠨ ᠠᠯᠬᠤᠮ ᠢᠶᠠᠨ ᠲᠦᠷᠭᠡᠳᠭᠡᠭᠡᠳ᠂    — ᠡᠷᠡᠦ ᠡᠪᠦᠳᠦᠭ ᠨᠠᠶᠢᠯᠡᠵᠦ ᠪᠠᠶᠢᠭ᠎ᠠ ᠴᠦ ᠪᠢᠰᠢ᠂ ᠡᠨᠡᠭᠦᠭᠡᠨ ᠡᠯᠡᠰᠦ ᠶᠢ ᠲᠤᠭᠤᠯᠤᠭᠠᠳ ᠭᠠᠷᠴᠢᠬᠠᠨ᠎ᠠ ᠭᠡᠵᠦ ᠶᠠᠪᠤᠭᠤᠳᠠ ᠭᠡᠯᠡᠭᠡᠳ ᠨᠠᠮ ᠲᠡᠭᠰᠢ ᠡᠯᠡᠰᠦᠨ ᠵᠠᠭᠠᠭ ᠢᠶᠠᠷ ᠤᠷᠤᠯ᠎ᠡ᠃    ᠠᠯᠳᠠᠢ ᠶᠢᠨ ᠡᠩᠭᠡᠷ ᠠᠴᠠ ᠠᠯᠠᠱᠠ ᠨᠣᠲᠤᠭ ᠲᠤ ᠢᠷᠡᠨ ᠢᠷᠡᠳᠡᠯᠬᠢ ᠬᠤᠯᠠ ᠶᠢᠨ ᠵᠠᠮ ᠢ ᠲᠦᠭᠳᠡᠷᠡᠯ ᠦᠭᠡᠢ ᠲᠤᠭᠤᠯᠬᠤ ᠳᠠᠭᠠᠨ ᠠᠭᠤᠯᠠ ᠶᠢᠨ ᠪᠠᠯ ᠢ ᠮᠠᠴᠦᠵᠦ ᠶᠠᠪᠤᠯ᠎ᠡ᠂ ᠤᠨᠤᠭᠠᠨ ᠲᠡᠭᠡᠷ᠎ᠡ ᠭᠦᠯ ᠠᠮᠠᠷᠡᠵᠦ ᠴᠦ ᠶᠠᠪᠤᠯ᠎ᠡ᠃ ᠦᠲᠡᠯᠬᠦ ᠶᠢᠨ ᠴᠠᠭ ᠲᠤ ᠬᠦᠦ ᠪᠠᠷ ᠢᠶᠠᠨ ᠡᠭᠦᠷᠦᠭᠦᠯᠵᠦ᠂ ᠦᠬᠦᠬᠦ ᠶᠢᠨ ᠡᠮᠦᠨ᠎ᠡ ᠲᠡᠭᠡᠭᠡᠰᠢ ᠪᠣᠯᠬᠤ ᠶᠢ ᠪᠤᠳᠤᠭ᠎ᠠ ᠦᠭᠡᠢ᠃ ᠬᠠᠷᠢᠨ ᠶᠠᠳᠠᠷᠡᠵᠤ ᠵᠦᠳᠡᠷᠡᠬᠦ ᠶᠢᠨ ᠴᠠᠭ ᠲᠤ ᠤᠮᠳᠠ ᠴᠠᠢ ᠦᠢᠷᠡᠳᠤᠭᠤᠯᠵᠤ᠂ ᠬᠦᠯᠳᠡᠵᠦ ᠪᠡᠭᠡᠷᠡᠬᠦ ᠶᠢᠨ ᠴᠠᠭ ᠲᠤ ᠬᠤᠴᠢᠯᠭ᠎ᠠ ᠲᠡᠪᠢᠰᠭᠡᠷ ᠲᠠᠪᠬᠤᠷᠯᠠᠵᠦ ᠦᠭᠬᠦ ᠶᠤᠮ ᠰᠢᠦ᠂ ᠬᠦᠪᠡᠬᠦᠨ ᠮᠢᠨᠢ ᠭᠡᠵᠦ ᠭᠦᠯ ᠬᠦᠨᠳᠦᠷᠡᠬᠦ ᠶᠢᠨ ᠦᠶ᠎ᠡ ᠪᠠᠷ ᠠᠴᠢᠯᠡᠯ ᠢ ᠨᠢ ᠬᠦᠷᠲᠡᠬᠦ ᠪᠠᠨ ᠵᠦᠢᠴᠢᠯᠡᠨ ᠪᠤᠳᠤᠵᠤ ᠪᠠᠶᠢᠭᠰᠠᠨ ᠨᠢ ᠦᠨᠡᠨ ᠪᠢᠯᠡ᠃ ᠭᠦᠪᠡᠬᠦᠨ ᠮᠢᠨᠢ ᠡ ᠂ ᠭᠠᠭᠴᠠ ᠮᠤᠳᠤ ᠭᠠᠯ ᠪᠣᠯᠳᠠᠭ ᠦᠭᠡᠢ᠂ ᠭᠠᠭᠴᠠ ᠬᠦᠮᠦᠨ ᠠᠶᠢᠯ ᠪᠣᠯᠳᠠᠭ ᠦᠭᠡᠢ ᠭᠡᠳᠡᠭ ᠬᠠᠭᠤᠴᠢᠳ ᠤᠨ ᠦᠭᠡᠨ ᠳᠤ ᠪᠠᠶᠢᠳᠠᠭ᠃ ᠭᠦᠪᠡᠬᠦᠨ ᠮᠢᠨᠢ ᠨᠤᠶᠡᠨ ᠤ ᠠᠳᠣᠭᠤᠴᠢᠨ ᠪᠤᠯᠵᠤ ᠪᠤᠶᠡᠨ ᠠᠴᠠ ᠨᠢ ᠬᠤᠪᠢᠶᠠᠯᠴᠠᠭᠠᠳ᠂ ᠪᠡᠷᠢ ᠪᠠᠨ ᠪᠠᠭᠤᠯᠭᠠᠨ ᠠᠪᠴᠢᠷᠡᠵᠦ ᠠᠶᠢᠯ ᠭᠡᠷ ᠪᠤᠯᠵᠤ᠂ ᠤᠳᠤᠭ᠎ᠠ ᠲᠠᠯᠪᠢᠬᠤ ᠶᠢᠨ ᠲᠡᠷᠨ ᠴᠠᠭ ᠲᠤ ᠦᠨᠦᠷ ᠢᠶᠠᠷ ᠨᠢ ᠵᠢᠷᠭᠠᠵᠤ᠂ ᠠᠨᠢᠷ ᠢᠶᠠᠷ ᠨᠢ ᠭᠦᠯ ᠢᠶᠠᠨ ᠵᠢᠬᠢᠵᠦ ᠬᠡᠪᠲᠡᠨ᠎ᠡ ᠭᠡᠵᠦ ᠤᠯᠠᠨ ᠢ ᠪᠤᠳᠤᠭᠰᠠᠨ ᠡᠬᠡ ᠨᠢ ᠠᠯᠬᠤᠮ ᠢᠶᠠᠨ ᠲᠦᠷᠭᠡᠳᠭᠡᠨ ᠪᠠᠶᠢᠬᠤ ᠳᠤ ᠬᠦᠦ ᠨᠢ ᠶᠠᠪᠤ ᠶᠠᠳᠠᠭᠰᠠᠨ ᠪᠤᠤᠷ᠎ᠡ ᠪᠠᠨ ᠴᠢᠷᠬᠦ ᠶᠢᠨ ᠨᠠᠭᠠᠭᠤᠷ ᠭᠦᠳᠦᠯᠵᠦ ᠬᠤᠶᠢᠨ᠎ᠠ ᠠᠴᠠ ᠵᠢᠳᠬᠦᠭᠰᠡᠭᠡᠷ ᠪᠠᠶᠢᠪᠠ᠃    ᠠᠯᠠᠱᠠ ᠨᠤᠲᠤᠭ ᠲᠤ ᠢᠷᠡᠭᠡᠳ ᠶᠡᠭᠡ ᠡᠯᠡᠰᠦᠨ ᠤ ᠭᠦᠨ ᠳᠤ ᠤᠳᠠᠭᠠᠨ ᠵᠢᠯ ᠠᠮᠢᠳᠤᠷᠠᠭᠰᠠᠨ ᠤ ᠬᠢ ᠪᠢᠵᠠ᠂ ᠡᠬᠡ ᠬᠦᠦ ᠬᠤᠶᠡᠷ ᠲᠤ ᠡᠭᠡᠯᠢ ᠲᠠᠢ ᠬᠠᠷᠠᠭᠳᠠᠭᠰᠠᠨ ᠡᠨ᠋ᠨ ᠲᠦᠬᠦᠮ ᠳᠤ ᠠᠮᠠᠷᠠᠬᠤ ᠪᠠᠷ ᠪᠤᠯᠤᠯ᠎ᠠ᠃    — ᠪᠢ ᠴᠢᠮᠠᠶᠢ ᠲᠠᠭᠠᠵᠦ ᠲᠡᠭᠡᠭᠡᠰᠢ ᠪᠣᠯᠬᠤ ᠪᠠᠷ ᠠᠳᠠ ᠪᠠᠨ ᠰᠠᠭᠤᠵᠤ ᠬᠤᠴᠤᠷᠤᠮᠠᠷ ᠪᠠᠶᠢᠨ᠎ᠠ ᠭᠡᠳ ᠲᠦᠯᠡᠭᠡ ᠲᠡᠪᠡᠷᠢᠵᠦ ᠢᠷᠡᠭᠰᠡᠨ ᠡᠬᠡ ᠨᠢ ᠡᠷᠬᠢᠨ ᠲᠤᠭᠤᠷᠢᠨ ᠢᠶᠠᠨ ᠬᠠᠷᠠᠵᠤ ᠵᠤᠭᠰᠤᠨ᠎ᠠ᠂ ᠡᠨ᠋ᠨ ᠨᠢ ᠬᠦᠦ ᠶᠢᠨ ᠣᠭᠲᠣ ᠰᠠᠨᠠᠭᠠᠨ ᠳᠤ ᠦᠭᠡᠢ ᠦᠭᠡ ᠪᠠᠶᠢᠯ᠎ᠠ᠃    — ᠡᠵᠢ ᠪᠠᠨ ᠬᠦᠷᠲᠡᠯ᠎ᠡ ᠲᠡᠭᠡᠭᠡᠰᠢ ᠪᠠᠷ ᠦᠵᠡᠬᠦ ᠶᠤᠮ ᠪᠣᠯ ᠨᠠᠮᠠᠶᠢ ᠭᠦᠮᠦᠨ ᠭᠡᠵᠦ ᠬᠡᠯᠡᠨ᠎ᠡ ᠤᠤ᠂ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠬᠠᠮᠢᠭ᠎ᠠ ᠬᠦᠷᠪᠡᠴᠦ ᠬᠠᠮᠳᠤ ᠶᠠᠪᠤᠵᠠᠭᠠᠶ᠎ᠡ ᠭᠡᠵᠦ ᠬᠦᠦ ᠨᠢ ᠲᠤᠯᠤᠭᠠᠢ ᠰᠡᠭᠰᠦᠷᠪᠡ᠃    — ᠬᠦᠪᠡᠬᠦᠨ ᠮᠢᠨᠢ ᠲᠡᠭᠡᠵᠦ ᠪᠢᠳᠡᠭᠡᠢ ᠬᠡᠯᠡ᠃ ᠡᠵᠢ ᠳᠤ ᠴᠢᠨᠢ ᠶᠠᠭ ᠯᠡ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠰᠡᠨ ᠰᠢᠭ ᠰᠠᠨᠠᠭᠳᠠᠭᠠᠳ ᠪᠠᠶᠢᠨ᠎ᠠ᠃ ᠪᠢ ᠠᠳᠠ ᠭᠦᠯ ᠢᠶᠠᠨ ᠠᠮᠠᠷᠠᠭᠠᠵᠤ ᠰᠠᠭᠤᠶ᠎ᠡ᠃ ᠴᠢ ᠮᠢᠨᠢ ᠪᠡᠶ᠎ᠡ ᠬᠤᠷᠭᠤᠳᠠᠬᠤ ᠭᠠᠵᠡᠷ ᠢᠶᠠᠨ ᠤᠯᠤᠭᠠᠳ᠂ ᠤᠨᠤᠭ᠎ᠠ ᠤᠨᠤᠰᠢ ᠲᠠᠢ ᠪᠤᠯᠪᠠᠯ ᠨᠠᠮᠠᠶᠢ ᠢᠷᠡᠵᠦ ᠠᠪᠠᠴᠢᠬᠤ ᠪᠢᠵᠠ᠂ ᠶᠠᠭᠤ ᠭᠡᠵᠦ ᠨᠠᠮᠠᠶᠢ ᠬᠠᠶᠠᠬᠤ ᠪᠤᠢ᠃    ᠡᠮᠡᠭᠡᠯ ᠬᠠᠵᠠᠭᠠᠷ ᠢᠶᠠᠨ ᠲᠢᠭᠯᠡᠵᠦ ᠠᠪᠤᠭᠠᠳ ᠬᠦᠦ ᠨᠢ ᠶᠠᠪᠤᠬᠤ ᠪᠠᠷ ᠪᠤᠯᠤᠯ᠎ᠠ᠃ ᠡᠵᠢ ᠨᠢ ᠪᠤᠭᠤᠳᠠᠯ ᠢᠶᠠᠨ ᠠᠭᠤᠳᠠᠯᠵᠤ ᠬᠦᠦ ᠶᠢᠨ ᠢᠶᠠᠨ ᠵᠡᠭᠦᠵᠦ ᠦᠰᠦᠭᠰᠨᠨ ᠠᠮᠢᠨ ᠰᠠᠬᠢᠶ᠎ᠡ ᠶᠢ ᠭᠠᠷᠭᠠᠵᠤ ᠪᠠᠷᠢᠭᠠᠳ᠂    — ᠡᠭᠦᠨ ᠢ ᠪᠡᠶ᠎ᠡ ᠳᠡᠭᠡᠨ ᠵᠡᠭᠦᠵᠦ ᠶᠠᠪᠤ ᠭᠡᠯ᠎ᠡ᠃    — ᠰᠠᠯᠠᠩ ᠪᠢ ᠠᠪᠴᠦ ᠶᠠᠪᠤᠬᠤ ᠪᠠᠷ ᠡᠵᠢ ᠲᠠ ᠬᠠᠳᠠᠭᠠᠯᠠᠭᠠᠳ ᠰᠠᠬᠢᠭᠤᠰᠤ ᠪᠤᠷᠬᠠᠨ ᠳᠠᠭᠠᠨ ᠵᠠᠯᠪᠠᠷᠢᠵᠦ ᠪᠠᠶᠢᠪᠡᠯ ᠵᠡᠮ ᠮᠦᠷ ᠮᠢᠨᠢ ᠦᠯᠵᠡᠢ ᠭᠡᠢ ᠮᠣᠷᠢ ᠲᠠᠢ ᠪᠠᠶᠢᠬᠤ ᠪᠢᠰᠢ ᠤᠤ ᠭᠡᠵᠦ ᠬᠦᠦ ᠨᠢ ᠢᠨᠢᠶᠠᠮᠰᠤᠭ᠍ᠯᠡᠪᠡ᠃    — ᠴᠤᠬᠤᠮ ᠲᠠᠶᠢᠮᠦ ᠴᠦ ᠶᠤᠮ ᠤᠤ ᠭᠡᠳ ᠡᠵᠢ ᠨᠢ ᠰᠠᠮᠪᠠᠢ ᠬᠠᠳᠠᠭ ᠲᠤ ᠪᠤᠭᠤᠭᠰᠠᠨ ᠵᠢᠵᠢᠭ ᠪᠤᠭᠤᠯᠳᠠ ᠭᠠᠷᠭᠠᠵᠤ ᠪᠠᠷᠢᠭᠠᠳ ᠡᠭᠦᠨ ᠢ ᠵᠠᠪᠠᠯ ᠵᠡᠭᠦᠵᠦ ᠶᠠᠪᠤ ᠭᠡᠯ᠎ᠡ᠃    — ᠲᠡᠷᠨ ᠴᠢᠨᠢ ᠶᠠᠭᠤ ᠪᠤᠢ︖    — ᠲᠠᠰᠤᠷᠡᠵᠦ ᠤᠨᠠᠭᠰᠠᠨ ᠬᠦᠢ ᠴᠢᠨᠢ ᠬᠠᠶᠢᠴᠢᠯᠠᠵᠤ ᠠᠪᠤᠭᠰᠠᠨ ᠲᠠᠭᠠᠬᠢ ᠲᠠᠢ ᠪᠠᠨ ᠪᠠᠶᠢᠭ᠎ᠠ ᠶᠤᠮ᠂ ᠡᠷ᠎ᠡ ᠬᠦᠮᠦᠨ ᠤ ᠵᠠᠪᠠᠯ ᠲᠤᠭᠤᠯᠬᠤ ᠭᠤᠷᠪᠡᠨ ᠵᠤᠪᠠᠯᠠᠩ ᠪᠠᠶᠢᠳᠠᠭ ᠴᠦ ᠲᠠᠰᠤᠷᠡᠵᠦ ᠤᠨᠠᠭᠰᠠᠨ ᠬᠦᠢ ᠨᠢ ᠡᠮ ᠲᠣᠮ ᠪᠣᠯᠳᠠᠭ ᠤᠴᠢᠷ ᠲᠠᠢ ᠳᠠᠭᠠᠨ ᠴᠢᠮᠠᠶᠢ ᠨᠢᠯᠬ᠎ᠠ ᠪᠠᠯᠴᠢᠷ ᠪᠠᠶᠢᠬᠤ ᠳᠤ ᠨᠢᠭᠡ ᠤᠳᠠᠭ᠎ᠠ ᠠᠶᠤᠯ ᠠᠴᠠ ᠭᠡᠲᠦᠯᠭᠡᠭᠰᠡᠨ ᠶᠤᠮ᠃    — ᠪᠢ ᠲᠡᠬᠢᠵᠦ ᠬᠤᠯᠠ ᠶᠠᠭᠤᠮᠡᠨ ᠳᠤ ᠶᠠᠪᠤᠬᠤ ᠦᠭᠡᠢ᠂ ᠣᠳᠠᠯ ᠦᠭᠡᠢ ᠢᠷᠡᠵᠦ ᠡᠵᠢ ᠶᠢ ᠠᠪᠠᠴᠢᠨ᠎ᠠ ᠭᠡᠳ ᠨᠡᠭᠡᠢ ᠲᠠᠪᠡᠯ ᠢᠶᠠᠨ ᠲᠠᠶᠢᠯᠵᠦ ᠪᠠᠷᠢᠯ᠎ᠡ᠃    — ᠭᠦᠪᠡᠭᠦᠨ ᠮᠢᠨᠢ ᠰᠠᠶᠢᠨ ᠶᠠᠪᠤᠭᠠᠳ ᠰᠠᠶᠢᠨ ᠬᠠᠷᠢᠵᠦ ᠢᠷ᠎ᠡ᠂ ᠡᠵᠢ ᠨᠢ ᠲᠤᠯᠤᠭᠠᠨ ᠪᠤᠷᠬᠠᠨ ᠳᠠᠭᠠᠨ ᠡᠲᠦᠷ ᠪᠦᠷᠢ ᠵᠠᠯᠪᠠᠷᠢᠵᠦ ᠪᠠᠶᠢᠶ᠎ᠡ ᠭᠡᠵᠡᠢ᠃    ᠭᠦᠪᠡᠭᠦᠨ ᠮᠢᠨᠢ ᠶᠠᠪᠤᠭᠠᠳ ᠠᠷᠪᠠᠭᠠᠳ ᠬᠤᠨᠤᠯ᠎ᠠ᠃ ᠬᠤᠨ ᠰᠢᠪᠠᠭᠤ ᠴᠦ ᠶᠠᠪᠤᠭᠰᠠᠨ ᠮᠦᠷ ᠢᠶᠠᠷ ᠢᠶᠠᠨ ᠡᠷᠬᠢᠵᠦ ᠨᠢᠰᠦᠭᠡᠳ ᠢᠷᠡᠬᠦ ᠦᠭᠡᠢ ᠤᠤ︖ ᠵᠢᠪᠡᠷ ᠰᠦᠷᠴᠦ ᠭᠠᠷᠤᠭᠰᠠᠨ ᠶᠤᠮ᠂ ᠬᠡᠢ ᠮᠣᠷᠢ ᠲᠠᠢ ᠶᠠᠪᠤᠵᠤ ᠪᠤᠢ ᠪᠠᠶᠢᠬ᠎ᠠ᠃ ᠣᠳᠣ ᠬᠠᠮᠢᠭ᠎ᠠ ᠶᠠᠪᠤᠵᠣ ᠯᠡ ᠪᠠᠶᠢᠬᠤ ᠪᠤᠢ᠂ ᠦᠵᠡᠮᠡᠷ ᠰᠠᠨᠠᠭᠳᠠᠭᠠᠳ ᠪᠠᠶᠢᠨ᠎ᠠ᠃ ᠬᠦᠦ ᠮᠢᠨᠢ ᠲᠡᠷᠡ ᠡᠯᠡᠰᠦᠨ ᠴᠤᠬᠢᠶ᠎ᠡ ᠪᠠᠷ ᠭᠠᠷᠴᠦ ᠢᠷᠡᠬᠦ ᠶᠤᠮ ᠭᠡᠳ ᠡᠯᠡᠰᠦᠨ ᠤ ᠡᠩᠭᠡᠷ ᠲᠡᠭᠡᠷ᠎ᠡ ᠨᠠᠷᠠ ᠡᠭᠡᠪᠦᠷᠢᠯᠡᠨ ᠠᠯᠤᠰ ᠢ ᠪᠠᠷᠠᠭᠠᠳᠠᠵᠤ ᠰᠠᠭᠤᠯ᠎ᠡ᠃ ᠡᠨᠡᠭᠡᠨ ᠵᠠᠭᠤᠷ᠎ᠡ ᠶᠠᠭ ᠬᠦᠦ ᠶᠢᠨ ᠬᠢᠨᠢ ᠶᠠᠪᠤᠭᠰᠠᠨ ᠮᠦᠷ ᠢᠶᠠᠷ ᠦᠬᠡᠷ ᠲᠠᠭᠤᠭᠰᠠᠨ ᠬᠦᠮᠦᠨ ᠨᠠᠭᠠᠰᠢᠯᠠᠵᠤ ᠪᠠᠶᠢᠬᠤ ᠨᠢ ᠬᠠᠷᠠᠭᠳᠠᠯ᠎ᠠ᠃ ᠬᠠᠷᠠᠭᠠᠳ ᠪᠠᠶᠢᠬᠤ ᠳᠤ ᠬᠦᠦ ᠨᠢ ᠮᠦᠨ ᠪᠠᠶᠢᠯᠲᠠᠢ᠃ ᠦᠪᠡᠷ ᠤᠨ ᠡᠷᠬᠡ ᠦᠭᠡᠢ ᠲᠤᠰᠴᠦ ᠤᠴᠢᠯ᠎ᠡ᠃ ᠬᠦᠦ ᠨᠢ ᠮᠦᠨ ᠪᠠᠶᠢᠨ᠎ᠠ᠂ ᠪᠢᠷᠠᠭᠤ ᠲᠠᠭᠠᠭᠤᠯᠤᠭᠰᠠᠨ ᠬᠤᠶᠡᠷ ᠴᠦ ᠦᠨᠢᠶ᠎ᠡ ᠲᠠᠭᠤᠭᠠᠳ ᠢᠷᠡᠵᠦ ᠶᠠᠪᠤᠨ᠎ᠠ᠃    — ᠡᠵᠢ ᠶᠢ ᠭᠠᠭᠴᠠᠭᠠᠷᠳᠠᠬᠤ ᠪᠣᠯᠪᠠ ᠤᠤ ᠭᠡᠳ ᠦᠬᠡᠷ ᠬᠤᠳᠠᠯᠳᠤᠵᠤ ᠠᠪᠬᠤ ᠪᠠᠷ ᠶᠠᠪᠤᠭᠠᠳ ᠨᠢᠭᠡ ᠵᠢᠯ ᠪᠤᠯᠤᠭᠰᠠᠨ ᠶᠤᠮ ᠰᠢᠭ᠋ ᠪᠠᠶᠠᠷᠯᠠᠵᠤ ᠡᠵᠢ ᠳᠡᠭᠡᠨ ᠬᠦᠦ ᠨᠢ ᠢᠨᠢᠶᠠᠮᠰᠦᠭᠯᠡᠨ ᠬᠡᠯᠡᠪᠡ᠃    — ᠡᠨ᠋ᠨ ᠬᠠᠷᠢᠨ ᠪᠤᠯᠬᠤ ᠶᠤᠮ ᠪᠠᠶᠢᠨ᠎ᠠ ᠭᠡᠵᠦ ᠡᠵᠢ ᠨᠢ ᠴᠦ ᠲᠠᠭᠠᠰᠢᠶᠡᠯ᠎ᠡ᠃    — ᠰᠦᠢᠭᠡ ᠲᠠᠢ ᠶᠢ ᠨᠢ ᠰᠢᠯᠢᠵᠦ ᠠᠪᠤᠭᠰᠠᠨ ᠶᠤᠮ᠂ ᠬᠠᠪᠤᠷ ᠲᠤᠭᠤᠯᠯᠠᠬᠤ ᠪᠠᠶᠢᠬ᠎ᠠ᠃ ᠰᠠᠭᠠᠵᠤ ᠰᠢᠪᠳᠤᠷᠠᠭᠠᠳ ᠤᠮᠳᠠ ᠴᠠᠢ ᠪᠠᠨ ᠴᠠᠶᠢᠯᠭᠠᠵᠤ ᠪᠠᠶᠢᠭᠠᠷᠠᠢ᠂ ᠵᠤᠨ ᠪᠤᠯᠭᠠᠭᠠᠳ ᠢᠷᠡᠵᠦ ᠠᠪᠤᠨ᠎ᠠ ᠰᠢᠦ ᠭᠡᠳ ᠦᠷᠯᠦᠭᠡ ᠪᠠᠷ ᠭᠠᠷᠤᠭᠰᠠᠨ ᠬᠦᠦ ᠶᠢᠨ ᠬᠤᠶᠢᠨ᠎ᠠ ᠠᠴᠠ ᠬᠠᠷᠠᠵᠤ ᠬᠤᠴᠤᠷᠤᠭᠰᠠᠨ ᠡᠬᠡ ᠨᠢ ᠢᠨᠢᠶᠡᠭᠰᠡᠨ ᠦᠭᠡᠢ ᠴᠦ ᠤᠬᠢᠯᠠᠭᠰᠠᠨ ᠦᠭᠡᠢ᠃ ᠲᠦᠷᠪᠡᠨ ᠦᠬᠡᠷ ᠲᠠᠢ ᠪᠤᠯᠤᠭᠰᠠᠨ ᠬᠦᠮᠦᠨ ᠲᠦᠷᠪᠡᠨ ᠬᠦᠦ ᠲᠠᠢ ᠯᠡ ᠭᠡᠵᠦ ᠮᠡᠳᠠ᠂ ᠶᠠᠮᠠᠷ ᠨᠡᠷ᠎ᠡ ᠦᠭᠳᠡᠭ ᠪᠢᠯᠡ ᠭᠡᠳ ᠪᠤᠳᠤᠵᠤ ᠰᠠᠭᠤᠪᠠ᠃ ︵ᠦᠷᠬᠦᠯᠵᠢᠯᠡᠯ ᠪᠣᠢ︶
  
ᠢᠷᠡᠯᠲᠡ᠄ ᠠᠯᠠᠱᠠ ᠪᠦᠬᠡ ᠱᠠᠯᠪᠢᠩ ᠤᠨ ᠳᠣᠮᠤᠭ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号