| ᠪᠦᠬᠡ ᠱᠠᠯᠪᠢᠩ ᠬᠤᠳᠳᠤᠭ ᠤᠨ ᠠᠮᠠ ᠶᠢ ᠪᠦᠭᠯᠡᠵᠦ ᠭᠤᠪᠢ ᠶᠢᠨ ᠠᠶᠢᠯ ᠢ ᠰᠠᠨᠳᠤᠷᠭᠠᠭᠰᠠᠨ | | | ᠲᠡᠨᠳᠡ ᠠᠴᠠ ᠪᠦᠬᠡ ᠱᠠᠯᠪᠢᠩ ᠭᠡᠷ ᠳᠡᠭᠡᠨ ᠬᠠᠷᠢᠬᠤ ᠪᠠᠷ ᠠᠯᠠᠱᠠ ᠵᠦᠭ ᠴᠢᠭᠯᠡᠨ ᠶᠠᠪᠤᠭᠰᠠᠭᠠᠷ ᠪᠠᠶᠢᠵᠦ | ᠨᠢᠭᠡ ᠡᠳᠦᠷ ᠨᠢᠭᠡ ᠠᠶᠢᠯ ᠤᠨ ᠬᠤᠳᠳᠤᠭ ᠳᠠᠭᠠᠷᠠᠵᠦ ᠬᠦᠷᠦᠵᠡᠢ᠃ ᠬᠤᠳᠳᠤᠭ ᠳᠡᠭᠡᠷᠡ ᠨᠢᠭᠡ ᠬᠡᠦᠬᠡᠨ ᠨᠢᠭᠡ | ᠰᠦᠷᠦᠭ ᠦᠬᠡᠷ ᠤᠰᠤᠯᠠᠭᠠᠳ ᠵᠤᠭᠰᠤᠵᠤ ᠪᠠᠶᠢᠵᠡᠢ᠃ | ᠱᠠᠯᠪᠢᠩ ᠤᠨᠤᠭᠰᠠᠨ ᠮᠤᠷᠢ ᠪᠠᠨ ᠤᠰᠤᠯᠠᠵᠦ ᠠᠪᠤᠭᠠᠳ ᠶᠠᠪᠤᠶᠠ ᠭᠡᠳ ᠤᠩᠭᠤᠴᠠᠨ ᠳᠡᠭᠡᠷᠡ ᠨᠢ ᠬᠦᠷᠬᠦᠯᠡ | ᠲᠡᠷᠡ ᠬᠡᠦᠬᠡᠨ᠄ ︽ᠲᠠ ᠶᠠᠭᠤᠨ ᠬᠦᠮᠦᠨ ᠪᠤᠢ︾ ᠭᠡᠵᠦ ᠠᠰᠠᠭᠤᠵᠡᠢ᠃ ᠱᠠᠯᠪᠢᠩ᠄ ︽ᠪᠢ ᠵᠠᠮ ᠤᠨ ᠬᠦᠮᠦᠨ | ᠪᠠᠶᠢᠨᠠ︾ ᠭᠡᠰᠡᠨ ᠳᠤ ᠬᠡᠦᠬᠡᠨ ᠬᠠᠷᠢᠨ᠄ ︽ᠵᠠᠮ ᠤᠨ ᠬᠦᠮᠦᠨ ᠳᠤ ᠦᠭᠬᠦ ᠲᠡᠶᠢᠮᠦ ᠢᠯᠡᠬᠦᠦ ᠳᠡᠭᠡᠨ ᠭᠠᠷᠤᠭᠰᠠᠨ | ᠤᠰᠤ ᠪᠠᠶᠢᠬᠤ ᠦᠭᠡᠢ︾ ᠭᠡᠳ ᠤᠩᠭᠤᠴᠠ ᠪᠠᠨ ᠬᠦᠮᠦᠷᠢᠵᠦ᠂ ᠨᠢᠭᠡᠨ ᠳᠤᠮᠤ ᠴᠢᠯᠠᠭᠤ ᠪᠠᠷ ᠬᠤᠳᠳᠤᠭ ᠤᠨ ᠢᠶᠠᠨ | ᠠᠮᠠ ᠶᠢ ᠳᠠᠷᠤᠵᠦ ᠤᠷᠬᠢᠭᠠᠳ ᠶᠠᠪᠤᠴᠢᠬᠠᠵᠦ ᠭᠡᠨᠡ᠃ | ᠱᠠᠯᠪᠢᠩ ᠳᠤᠳᠤᠷᠠ ᠪᠠᠨ ᠪᠤᠳᠤᠵᠦ᠂ ᠡᠨᠡ ᠶᠠᠭᠠᠬᠢᠭᠰᠠᠨ ᠬᠠᠷᠠᠮᠴᠢ ᠬᠡᠦᠬᠡᠨ ᠪᠤᠢ᠃ ᠭᠡᠪᠡᠴᠦ ᠡᠶᠢᠮᠦᠬᠡᠨ | ᠴᠢᠯᠠᠭᠤ ᠪᠠᠷ ᠶᠡᠷᠦ ᠶᠠᠭᠠᠬᠢᠬᠤ ᠪᠢᠯᠡ ᠳ᠋ᠡ ᠭᠡᠵᠦ ᠢᠨᠢᠶᠡᠳᠦ ᠨᠢ ᠬᠦᠷᠴᠦ ᠪᠠᠭᠠ ᠬᠦᠯᠢᠶᠡᠵᠦ ᠪᠠᠶᠢᠭᠠᠳ ᠬᠡᠦᠬᠡᠨ ᠢ | ᠳᠤᠯᠤᠭᠠᠢ ᠶᠢᠨ ᠴᠠᠭᠠᠳᠠᠢ ᠪᠡᠶᠡ ᠠᠯᠳᠠᠷᠠᠭᠰᠠᠨ ᠬᠤᠶᠢᠨᠠ ᠲᠡᠷᠡ ᠴᠢᠯᠠᠭᠤ ᠶᠢ ᠠᠪᠴᠦ ᠨᠢᠭᠡ ᠲᠡᠰᠢ ᠨᠢ ᠰᠢᠳᠡᠭᠡᠳ᠂ | ᠮᠤᠷᠢ ᠪᠠᠨ ᠤᠰᠤᠯᠠᠵᠦ᠂ ᠦᠪᠡᠷ ᠢᠶᠠᠨ ᠴᠦ ᠪᠠᠭ᠋ᠠᠨ ᠵᠠᠯᠭᠢᠯᠠᠵᠦ ᠴᠠᠩᠭᠠᠭᠠ ᠪᠠᠨ ᠳᠠᠷᠤᠵᠦ ᠠᠪᠤᠭᠠᠳ᠂ ᠬᠤᠶᠢᠲᠦ | ᠲᠤᠯᠤᠭᠠᠢ ᠶᠢᠨ ᠬᠢᠨᠢ ᠡᠩᠭᠡᠷ ᠠᠴᠠ ᠬᠡᠪᠲᠡᠭᠡ ᠦᠬᠡᠷ ᠤᠨ ᠴᠢᠨᠡᠭᠡᠨ ᠨᠢᠭᠡ ᠪᠦᠳᠦᠭᠦᠨ ᠴᠢᠯᠠᠭᠤ ᠳᠡᠪᠡᠷᠢᠨ ᠠᠪᠴᠢᠷᠠᠵᠦ | ᠬᠤᠳᠳᠤᠭ ᠤᠨ ᠠᠮᠠᠨ ᠳᠡᠭᠡᠷᠡ ᠨᠢ ᠳᠠᠷᠤᠵᠦ ᠳᠠᠯᠪᠢᠭᠠᠳ ᠮᠤᠷᠳᠠᠨ ᠶᠠᠪᠤᠵᠡᠢ᠃ | ᠮᠠᠷᠭᠠᠰᠢ ᠨᠢ ᠬᠡᠦᠬᠡᠨ ᠬᠤᠳᠳᠤᠭ ᠳᠡᠭᠡᠷᠡ ᠪᠠᠨ ᠢᠷᠡᠵᠦ ᠦᠵᠡᠬᠦᠯᠡ᠂ ᠦᠪᠡᠷ ᠤᠨ ᠬᠢᠨᠢ ᠲᠠᠯᠪᠢᠭᠰᠠᠨ | ᠴᠢᠯᠠᠭᠤ ᠨᠢ ᠬᠤᠯᠠ ᠲᠡᠨᠳᠡ ᠬᠡᠪᠳᠡᠬᠦ ᠪᠦᠭᠡᠳ ᠤᠷᠤᠨ ᠳᠤᠨᠢ ᠬᠠᠷᠢᠨ ᠦᠭᠡᠷᠡ ᠨᠢᠭᠡ ᠰᠦᠷᠡᠬᠡᠢ ᠪᠦᠳᠦᠬᠦᠨ ᠴᠢᠯᠠᠭᠤ | ᠬᠤᠳᠳᠤᠭ ᠤᠨ ᠠᠮᠠ ᠶᠢ ᠨᠢ ᠪᠦᠭᠯᠡᠭᠡᠳ ᠪᠠᠶᠢᠵᠦ ᠭᠡᠨᠡ᠃ ᠵᠠ᠂ ᠡᠨᠡ ᠴᠤ ᠯᠠᠪ ᠦᠴᠦᠭᠡᠳᠦᠷ ᠤᠨ ᠲᠡᠷᠡ | ᠬᠦᠮᠦᠨ ᠤ ᠬᠢᠭᠰᠡᠨ ᠬᠡᠷᠡᠭ ᠪᠡᠶᠢᠬᠤ ᠭᠡᠵᠦ ᠮᠡᠳᠡᠵᠡᠢ᠃ ᠭᠡᠪᠡᠴᠦ ᠦᠬᠦᠨ ᠶᠠᠳᠠᠨ ᠨᠤᠴᠤᠯᠳᠤᠭᠠᠳ ᠦᠴᠦᠬᠡᠨ ᠴᠦ | ᠬᠦᠳᠡᠯᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠲᠤᠯᠠ᠂ ᠮᠤᠷᠢ ᠪᠠᠷ ᠢᠶᠠᠷ ᠢᠶᠠᠨ ᠳᠠᠪᠬᠢᠵᠦ ᠤᠶᠢᠷᠠᠯᠴᠠᠭᠠ ᠠᠶᠢᠯ ᠤᠳ ᠠᠴᠠ ᠪᠠᠨ | ᠬᠤᠶᠠᠷ ᠭᠤᠷᠪᠠᠨ ᠶᠠᠳᠠᠷ ᠵᠠᠯᠠᠭᠤ ᠳᠠᠭᠤᠳᠠᠵᠦ ᠮᠤᠳᠤ ᠬᠦᠰᠢᠭᠦᠷᠭᠡ ᠳᠡᠭᠡᠰᠦ ᠠᠷᠭᠠᠮᠵᠢ ᠪᠡᠯᠡᠳᠭᠡᠨ ᠠᠪᠠᠴᠢᠭᠠᠳ | ᠲᠠᠲᠠᠬᠤ ᠨᠢ ᠲᠠᠲᠠᠵᠦ ᠲᠦᠯᠬᠢᠬᠦ ᠨᠢ ᠲᠦᠯᠬᠢᠵᠦ ᠬᠠᠮᠤᠭ ᠲᠡᠩᠬᠡᠬᠡ ᠪᠠᠨ ᠰᠢᠪᠬᠠᠭᠰᠠᠨ ᠪᠤᠯᠪᠠᠴᠦ ᠮᠦᠨ ᠯᠠ | ᠬᠦᠳᠡᠯᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃ ᠠᠶᠢᠯ ᠤᠳ ᠤᠨ ᠨᠠᠰᠤᠲᠠᠶᠢᠴᠦᠳ ᠢᠷᠡᠵᠦ ᠦᠵᠡᠭᠡᠳ᠂ ᠬᠤᠪᠢ | ᠪᠠᠷ ᠢᠶᠠᠨ ᠶᠠᠪᠤᠭᠰᠠᠨ ᠵᠠᠮ ᠤᠨ ᠬᠦᠮᠦᠨ ᠢ ᠤᠷᠤᠯᠳᠤᠬᠤ ᠨᠢ ᠶᠠᠭᠤ ᠪᠤᠢ᠂ ᠬᠦᠮᠦᠨ ᠮᠠᠯ ᠲᠠᠢ ᠪᠠᠨ ᠴᠤᠭᠭᠠᠷ ᠢᠳᠡᠬᠦ | ᠤᠰᠤ ᠦᠭᠡᠢ ᠬᠠᠲᠠᠵᠦ ᠦᠬᠦᠬᠦ ᠨᠢ ᠲᠤᠳᠠᠵᠦ ᠪᠠᠶᠢᠨᠠ ᠤᠤ ᠭᠡᠵᠦ ᠬᠡᠦᠬᠡᠨ ᠢ ᠬᠠᠷᠢᠶᠠᠵᠦ ᠬᠤᠷᠳᠤᠨ ᠶᠠᠪᠤᠵᠦ ᠲᠡᠷᠡ | ᠬᠦᠮᠦᠨ ᠢ ᠤᠯᠵᠦ ᠵᠠᠯᠠᠵᠦ ᠠᠪᠴᠢᠷᠠ ᠭᠡᠳ ᠬᠤᠶᠠᠷ ᠵᠠᠯᠠᠭᠤ ᠪᠠᠨ ᠶᠠᠪᠤᠭᠤᠯᠵᠡᠢ᠃ | ᠲᠡᠷᠡ ᠬᠤᠶᠠᠷ ᠵᠠᠯᠠᠭᠤ ᠡᠳᠦᠷ ᠤᠨ ᠭᠠᠵᠠᠷ ᠠᠴᠠ ᠱᠠᠯᠪᠢᠩ ᠢ ᠬᠦᠭᠡᠭᠡᠵᠦ ᠬᠦᠢᠴᠡᠭᠡᠳ᠂ ᠰᠠᠶᠢᠨ ᠦᠭᠡ ᠪᠠᠷ | ᠭᠤᠶᠤᠵᠦ ᠪᠠᠶᠢᠵᠦ ᠱᠠᠯᠪᠢᠩ ᠢ ᠪᠤᠴᠠᠭᠠᠨ ᠵᠠᠯᠠᠵᠦ ᠠᠪᠴᠢᠷᠠᠵᠡᠢ᠃ | ᠱᠠᠯᠪᠢᠩ ᠲᠡᠷᠡ ᠬᠡᠦᠬᠡᠨ ᠳᠤ᠄ ︽ᠪᠠᠶᠠᠨ ᠠᠭᠤᠳᠠᠮ ᠮᠤᠩᠭᠤᠯ ᠨᠤᠲᠤᠭ ᠪᠠᠶᠢᠨᠠ᠂ ᠦᠭᠡ ᠬᠡᠯᠡ ᠠᠳᠠᠯᠢ ᠦᠨᠳᠦᠰᠦ | ᠢᠵᠠᠭᠤᠷ ᠨᠢᠭᠡᠳᠡᠢ ᠮᠤᠩᠭᠤᠯ ᠠᠬᠠ ᠲᠡᠭᠦᠦ ᠪᠠᠶᠢᠵᠦ ᠪᠠᠶᠢᠭᠠᠳ ᠠᠷᠠᠢ ᠴᠦ ᠢᠩᠬᠢᠵᠦ ᠨᠢᠭᠡ ᠨᠢᠭᠡ ᠠᠴᠠ ᠪᠠᠨ ᠬᠠᠷᠠ | ᠤᠰᠤ ᠬᠠᠷᠠᠮᠨᠠᠬᠤ ᠪᠠᠷ ᠪᠤᠯᠤᠭᠠ ᠦᠭᠡᠢ ᠪᠢᠵᠡ ᠡ᠃ ᠪᠤᠰᠤᠳ ᠢ ᠮᠡᠳᠡᠶᠠ ᠭᠡᠪᠡᠯ ᠪᠡᠶᠠ ᠪᠠᠨ ᠬᠠᠷᠠ᠂ ᠪᠤᠷᠤᠭᠤ ᠪᠠᠨ | ᠮᠡᠳᠡᠶᠠ ᠭᠡᠪᠡᠯ ᠮᠦᠷ ᠢᠶᠠᠨ ᠬᠠᠷᠠ ᠭᠡᠳᠡᠭ ᠶᠤᠮ᠃ ᠪᠢᠳᠡᠬᠡᠢ ᠵᠦᠪᠬᠡᠨ ᠨᠤᠲᠤᠭ ᠤᠨ ᠠᠭᠤᠯᠠ ᠶᠢ ᠯᠠ ᠬᠠᠮᠤᠭ ᠤᠨ | ᠦᠨᠳᠦᠷ ᠭᠡᠵᠦ ᠪᠤᠳᠤᠭᠠᠳ ᠪᠠᠢ᠂ ᠠᠭᠤᠯᠠ ᠶᠢᠨ ᠴᠠᠭᠠᠨᠠ ᠪᠠᠰᠠ ᠠᠭᠤᠯᠠ ᠪᠠᠶᠢᠳᠠᠭ ᠭᠡᠳᠡᠭ ᠢ ᠮᠡᠳᠡᠵᠦ ᠠᠪᠬᠤ | ᠬᠡᠷᠡᠭ ᠲᠠᠢ ᠶᠤᠮ ᠰᠢᠦ ᠳ᠋ᠡ᠃ ᠡᠭᠦᠨ ᠢ ᠳᠡᠬᠦᠦ ᠮᠢᠨᠢ ᠮᠡᠳᠡᠵᠦ ᠠᠪᠤᠭᠠᠷᠠᠢ︕︾ ᠭᠡᠰᠡᠨ ᠳᠤ ᠬᠡᠦᠬᠡᠨ ᠢᠴᠢᠭᠡᠳ | ᠬᠠᠷᠠ ᠴᠠᠭᠠᠨ ᠳᠠᠭᠤ ᠦᠭᠡᠢ ᠬᠤᠯᠬᠤᠯᠵᠠᠨ ᠵᠤᠭᠰᠤᠵᠤ ᠪᠠᠶᠢᠵᠡᠢ ᠭᠡᠨᠡ᠃ | ᠱᠠᠯᠪᠢᠩ ᠲᠡᠷᠡ ᠬᠤᠳᠳᠤᠭ ᠤᠨ ᠠᠮᠠ ᠶᠢ ᠳᠠᠷᠤᠭᠰᠠᠨ ᠴᠢᠯᠠᠭᠤ ᠪᠠᠨ ᠬᠤᠵᠢᠮ ᠤᠨ ᠬᠦᠮᠦᠨ ᠳᠤ ᠳᠤᠷᠠᠳᠬᠠᠯ | ᠪᠤᠯᠳᠤᠭᠠᠢ ᠭᠡᠵᠦ ᠬᠤᠶᠢᠲᠦ ᠳᠤᠯᠤᠭᠠᠢ ᠶᠢᠨ ᠤᠷᠤᠢ ᠳᠡᠭᠡᠷᠡ ᠠᠪᠠᠴᠢᠵᠦ ᠪᠤᠰᠬᠠᠵᠦ ᠲᠠᠯᠪᠢᠭᠠᠳ᠂ ᠦᠷᠭᠦᠯᠵᠢᠯᠡᠨ | ᠵᠠᠮ ᠢᠶᠠᠨ ᠬᠦᠭᠡᠭᠡᠵᠦ ᠭᠡᠨᠡ᠃ | ︵ᠦᠷᠭᠦᠯᠵᠢᠯᠡᠯ᠄ ᠪᠦᠬᠡ ᠱᠠᠯᠪᠢᠩ ᠢ ᠨᠡᠬᠡᠮᠵᠢᠯᠡᠵᠦ ᠬᠡᠦᠬᠡᠨ ᠪᠦᠬᠡ ᠭᠠᠯᠪᠠ ᠶᠢᠨ ᠭᠤᠪᠢ ᠠᠴᠠ ᠪᠤᠴᠠᠭᠰᠠᠨ︶ | |