ᠬᠦᠬᠡ ᠲᠡᠭᠷᠢ ᠠᠴᠠ ᠲᠤᠯᠤᠭᠠᠢ ᠪᠠᠨ ᠨᠡᠬᠡᠵᠦ | ᠬᠦᠮᠦᠨ ᠴᠢᠯᠠᠭᠤ ᠲᠠᠯᠠ ᠶᠢᠨ ᠳᠤᠮᠳᠠ ᠲᠤᠷᠦ᠋ᠢᠨᠠ | ᠠᠯᠳᠠᠭᠳᠠᠭᠰᠠᠨ ᠭᠠᠷ ᠢᠶᠠᠨ ᠬᠦᠯᠢᠶᠡᠵᠦ | ᠠᠳᠤᠭᠤᠨ ᠤ ᠲᠤᠭᠤᠰᠤᠨ ᠳᠤ ᠲᠤᠭᠵᠢᠷᠠᠨᠠ᠂ | ᠬᠡᠨ ᠢ ᠴᠤ ᠲᠤᠭᠤᠵᠤ ᠬᠠᠷᠠᠭᠠ ᠦᠭᠡᠢ | ᠨᠢᠳᠦ ᠶᠢ ᠨᠢ ᠡᠷᠢᠵᠦ ᠬᠡᠷᠢᠶᠡ ᠭᠤᠸᠠᠭᠯᠠᠨᠠ | ᠬᠡᠵᠢᠶᠡ ᠴᠦ ᠬᠠᠶᠢᠵᠤ ᠤᠯᠳᠠᠬᠤ ᠦᠭᠡᠢ | ᠰᠢᠳᠦ ᠶᠢ ᠨᠢ ᠦᠭᠡᠶᠢᠯᠡᠵᠦ ᠡᠷᠢᠯᠴᠢᠳ ᠲᠦᠭᠡᠷᠢᠨᠡ᠃ | ᠴᠢᠰᠦ ᠨᠢ ᠭᠠᠵᠠᠷ ᠤᠨ ᠰᠤᠳᠠᠰᠤᠨ ᠳᠤ ᠯᠤᠭᠰᠢᠵᠤ | ᠰᠦᠨᠡᠰᠦ ᠨᠢ ᠨᠡᠭᠦᠳᠡᠯ ᠳᠠᠭᠠᠵᠤ ᠠᠮᠢᠯᠠᠭᠰᠠᠨ | ᠨᠠᠰᠤ ᠨᠢ ᠭᠠᠯᠪᠠ ᠶᠢᠨ ᠴᠡᠭᠡᠯ ᠳᠤ ᠴᠢᠯᠠᠭᠤᠵᠢᠵᠤ | ᠨᠠᠷᠠᠳᠤ ᠳᠤ ᠤᠨᠢᠰᠤᠭᠠ ᠪᠤᠯᠤᠨ ᠬᠤᠴᠤᠷᠤᠭᠰᠠᠨ | ᠬᠦᠮᠦᠨ ᠴᠢᠯᠠᠭᠤᠨ ᠤ ᠨᠠᠮᠲᠠᠷ ᠢ | ᠮᠦᠩᠬᠡ ᠬᠦᠬᠡ ᠲᠡᠭᠷᠢ ᠯᠡ ᠮᠡᠳᠡᠨᠡ᠂ | ᠮᠦᠷᠳᠡᠵᠦ ᠢᠷᠡᠭᠰᠡᠨ ᠤᠨ ᠵᠢᠯ ᠤᠳ ᠢ ᠨᠢ | ᠮᠦᠷᠦ ᠪᠠᠷ ᠢᠶᠠᠨ ᠲᠤᠯᠤᠭᠰᠠᠨ ᠲᠡᠪᠴᠢᠶᠡᠷᠢ ᠨᠢ ᠯᠡ ᠮᠡᠳᠡᠨᠡ᠃ | ᠪᠡᠭᠡᠷᠡᠭᠰᠡᠨ ᠪᠡᠶᠡ ᠶᠢ ᠨᠢ ᠬᠤᠴᠢᠵᠤ ᠴᠠᠰᠤ ᠬᠠᠶᠠᠯᠠᠬᠤ ᠳᠤ | ᠳᠤᠲᠤᠷᠠ ᠠᠴᠠ ᠪᠠᠨ ᠬᠦᠯᠦᠷᠡᠵᠦ ᠳᠤᠯᠠᠭᠠᠴᠠᠭᠰᠠᠨ | ᠪᠤᠬᠢᠷᠠᠭᠰᠠᠨ ᠬᠦᠯ ᠢ ᠨᠢ ᠠᠮᠠᠷᠠᠭᠠᠵᠤ ᠡᠪᠡᠰᠦ ᠨᠢᠯᠬᠠᠷᠠᠬᠤ ᠳᠤ | ᠳᠤᠤᠷᠠ ᠠᠴᠠ ᠪᠠᠨ ᠬᠦᠴᠦ ᠠᠪᠴᠤ ᠲᠡᠩᠬᠡᠭᠡᠷᠡᠭᠰᠡᠨ | ᠬᠠᠭᠠᠷᠬᠠᠢ ᠮᠦᠷᠦ ᠶᠢ ᠨᠢ ᠬᠦᠪᠦᠷᠢᠳᠬᠦ ᠭᠡᠵᠦ | ᠨᠠᠷᠠᠨ ᠤ ᠤᠭᠤᠷᠠᠭ ᠬᠡᠯᠡᠬᠡᠶᠢᠷᠡᠭᠰᠡᠨ | ᠬᠠᠯᠴᠠᠷᠬᠠᠢ ᠲᠤᠬᠤᠢ ᠶᠢ ᠨᠢ ᠠᠨᠠᠭᠠᠬᠤ ᠭᠡᠵᠦ | ᠰᠠᠯᠬᠢᠨ ᠤ ᠤᠷᠠ ᠴᠠᠯᠠᠭᠠᠶᠢᠷᠠᠭᠰᠠᠨ | ᠲᠤᠭᠤᠯ ᠤᠨ ᠪᠡᠯᠴᠢᠭᠡᠷ ᠬᠠᠷᠠᠭᠤᠯᠳᠠᠵᠤ ᠤᠳᠠᠭᠰᠠᠨ ᠬᠦᠮᠦᠨ ᠴᠢᠯᠠᠭᠤᠨ ᠤ | ᠲᠤᠯᠤᠭᠠᠢ ᠨᠢ ᠬᠠᠮᠢᠭᠠᠰᠢ ᠶᠠᠪᠤᠭᠰᠠᠨ ᠢ ᠬᠠᠷᠠᠭᠰᠠᠨ ᠬᠦᠮᠦᠨ ᠠᠯᠠᠭᠠ | ᠳᠤᠷᠤᠨᠠ ᠶᠢᠨ ᠲᠠᠯᠠ ᠶᠢᠨ ᠶᠤᠭᠲᠠ ᠪᠤᠯᠤᠭᠰᠠᠨ ᠡᠨᠡ ᠴᠢᠯᠠᠭᠤᠨ ᠤ | ᠳᠤᠮᠤᠭ ᠲᠤᠤᠯᠢ ᠶᠢ ᠦᠭᠦᠯᠡᠬᠦ ᠬᠦᠮᠦᠨ ᠴᠦ ᠪᠠᠰᠠ ᠠᠯᠠᠭᠠ ᠡ︕ | ᠡᠭᠰᠢᠭᠰᠡᠨ ᠨᠢᠯᠪᠤᠰᠤ ᠪᠠᠨ ᠳᠡᠪᠲᠤᠭᠡᠵᠦ | ᠪᠤᠷᠤᠭᠠᠨ ᠳᠤ ᠨᠤᠷᠬᠤ ᠨᠢ ᠦᠪᠡᠷ ᠢ ᠪᠠᠨ ᠠᠷᠭᠠᠳᠠᠭᠰᠠᠨ ᠤ ᠬᠢ | ᠡᠪᠳᠡᠷᠡᠭᠰᠡᠨ ᠪᠠᠭᠤᠷᠢ ᠪᠠᠨ ᠪᠠᠷᠠᠳᠠᠵᠤ | ᠪᠡᠶᠡ ᠪᠠᠨ ᠴᠦᠯᠡᠭᠰᠡᠨ ᠨᠢ ᠦᠷᠦᠭᠡᠯ ᠢ ᠢᠷᠯᠡᠭᠰᠡᠨ ᠤ ᠬᠢ | ᠡᠪᠡᠷᠰᠢᠶᠡᠭᠰᠡᠨ ᠪᠤᠳᠤᠯ ᠤᠨ ᠢᠶᠠᠨ ᠤᠴᠢᠭ ᠢ ᠳᠠᠯᠳᠠᠯᠠᠵᠤ | ᠪᠢᠲᠡᠭᠦᠦ ᠭᠤᠨᠢᠭᠯᠠᠭᠰᠠᠨ ᠨᠢ ᠮᠦᠷᠦᠭᠡᠳᠦᠯ ᠢᠶᠠᠨ ᠨᠢᠭᠤᠭᠰᠠᠨ ᠤ ᠬᠢ | ᠡᠪᠬᠡᠷᠡᠭᠰᠡᠨ ᠡᠭᠦᠯᠡᠰ ᠤᠨ ᠰᠡᠭᠦᠳᠡᠷ ᠢᠶᠠᠷ ᠤᠷᠢᠶᠠᠯᠭᠠᠵᠤ | ᠪᠤᠰᠤᠭᠠ ᠮᠦᠩᠬᠡᠷᠡᠭᠰᠡᠨ ᠨᠢ ᠵᠤᠷᠢᠭ ᠢᠶᠠᠨ ᠲᠤᠯᠤᠭᠰᠠᠨ ᠤ ᠬᠢ | ᠤᠳᠤᠳ ᠤᠨ ᠴᠡᠭᠡᠨ ᠭᠡᠷᠡᠯ ᠤᠭᠤᠴᠢᠯᠠᠵᠤ | ᠤᠶᠢᠳᠬᠠᠷ ᠪᠤᠬᠢᠨᠢᠳᠤᠯ ᠤᠨ ᠰᠡᠪᠬᠡ ᠪᠠᠨ ᠠᠷᠢᠯᠭᠠᠭᠰᠠᠨ ᠬᠦᠮᠦᠨ ᠴᠢᠯᠠᠭᠤ | ᠦᠨᠢ ᠬᠤᠯᠠ ᠶᠢᠨ ᠦᠯᠢᠭᠡᠷ ᠴᠦᠷᠬᠡᠯᠡᠭᠰᠡᠨ | ᠦᠨᠡᠨ ᠤ ᠲᠠᠮᠠᠭᠠ ᠲᠠᠢ ᠡᠨᠡ ᠴᠢᠯᠠᠭᠤ᠂ ᠬᠦᠨ ᠤᠬᠠᠭᠠᠨ ᠤ ᠴᠢᠯᠠᠭᠤ ᠡ︕ | ︵ᠵᠣᠬᠢᠶᠠᠭᠴᠢ᠄ ᠮᠦᠩᠬᠡᠵᠢᠷᠭᠠᠯ︶ | | |